Хакасияның пазы Валентин Коновалов чобаан читірче
Хакасияның пазы Валентин Коновалов Шира аймаандағы улуғ частығ чуртағҷы Евгения Гавриловна Кобежикова 103 чазын апарчадып, ах чарыхтаң парыбысханы хоостыра позының паза республика правительствозы адынаң туған-чағыннарына улуғ чобаан читiрче.
– Евгения Гавриловна, чуртас чолын турыстығ иртiп, кӧзiдiм полған. Ол, Илбек Ада чааның хатығ чылларын тобырып, чаа соондағы изелiстi турғысханнарның пірсі полған, – таныхтаан Хакасия пазы Валентин Коновалов.
Евгения Гавриловна 1921 чылда 7 январьда Шира аймаанда тӧреен. 1937 чылда iсттенiс чолын колхозта тоғынып пастаан. Ширадағы машино-тракторный станцияда тоғынған. Анаң Шира аймаандағы «Тойым» совхозта 1957 чылдаң cығара 1975 чылға теере тынаға сыхханҷа, тракторист полып, тоғынған.
Матыр тоғызы eчeн Евгения Гавриловна Кобежикова Ленин орденiнең (1974 ч.), Октябрь революциязы орденiнең (1971 ч.), «Знак почёта» орденнернең (1950, 1966 ч.ч.) паза «За освоение целинных и залежных земель», «За добросовестный труд. В ознаменование 100-летия со дня рождение В.И.Ленина», iдӧк пайрамнығ медальларнаң сыйыхтатхан.
1964 чылда СССР-ның Ӧӧркi Чӧбiнiң читiнҷi хығыртииның депутадына табылған, 1969 чылда Хакас облазындағы хыраҷылар мариинда «Хакасияның иң чахсы хыраҷызы» аарластығ ат алған. 1974 чылда КПСС-тың ӧӧн хачызы Л.И.Брежнев аны позының докладында таныхтаан.
2016 чылда Евгения Гавриловнаа «Шира аймааның аарластығ чуртағҷызы» ат пиргеннер.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |