Имҷілернің саны хозылча, че.
- Оксана Олеговна, пу чылда Хакасияның имнег тураларынзар нинҷе чиит имҷі тоғынарға килген?
- Пу чылда Хакасияның имнег организацияларынзар аймах специальностьтарҷа 84 имҷі істенерге килген. Ирткен чылларнаң тиңнестірзе, пӱӱл чиит специалисттернің саны хозылды. Ағбандағы поликлиниказар 17 имҷі тоғынарға килген, оларның сигізі - терапевт. Терапевттер хайдағ даа имнег туразында чидіспинчелер. Халғанҷы чылларда оларның саны хозылчатханы - ӧріністіг. Уламох кізі кӧңні кӧдірілче, хаҷан Хакасияның пала тапчаң туразынзар кирек специалисттер килчетселер. Пӱӱл анда «акушерство паза гинекология», «анестезиология паза реаниматология», «рентгенология», «терапия», «неврология», «неонатология» специальностьтаряа сигіс специалист істеніс чолын пастады. Наа ла тоғын сыхханнарның тӧрті Томсктағы, Хызылчардағы паза Ағбандағы пӧзік имнег ӱгредіг учреждениелерін тоосхан.
- Тоғысха наа ла килген чиит специалисттерге Хакасияда хайдағ хабазығ пирілче?
- Чиит специалист Хакасияда пастағызын на тоғысха кірчетсе, ағаа республика бюджедінең азахха турып алар ахча пирілче. Ол 150 муң салковайға тиңнелче. Ікінҷізі, чурт арендазы ӱчӱн тӧлирге полысчалар, ӱзінҷізі, коммунальнай тӧлеглернің чардығы айландырылча. Чӧптезіг хоостыра чиит специалист имнег туразында ӱс чыл тоғынарға кирек.
Ідӧк аалзар істенерге парған чиит имҷее хазна чахсы хабасча. «Земский доктор» программаҷа аалзар тоғынарға парған имҷее пір хати пір миллион салковай пирілче. Пӱӱнгі кӱнде мындағ полызығны Хакасияның 170 пӧзік ӱгредігліг специализі алып алған. Олар ӧӧнінде Асхыс, Пии, Хубачар ааллардағы имнег тураларында істенчелер. Мындағ хабазығны алған имҷілерге орыннарында пис чыл тоғынарға кирек полар.
Таныхтирға кирек, хай пірее чиит специалисттер тоғынар алнындох хазна хабазиин алып пастааннар. Ӧӧнінде кӧстегліг оңдайҷа ӱгренген оол-хыстар.
- Кӧстегліг оңдайдаңар чоох пастаанда, аннаңар чарыда чоохтап пиріңер.
- Студенттерні кӧстегліг оңдайҷа Сибирьдегі федеральнай округтың алты пӧзік имнег учреждениезінде ӱгретчелер. Олар - Хакасия, Хызылчар, Томск, Кемеров, Иркутск паза Новосибирск. Пӱӱнгі кӱнде 277 студент мындағ оңдайҷа ӱгренче, оларның 66 -зы - Ағбандағы Н.Ф.Катановтың адынаң Хакас хазна университедінде. 277 студенттің 145-зі ӧӧн стипендияларына хоза 2 муң салковай алчалар. Чоохтирға кирек, пӱӱл 76 студент кӧстегліг оңдайҷа ӱгренерге кірген. Анзы, ирткен чылларнаң тиңнестірзе, ікі хати кӧп.
- Хайди кӧстегліг оңдайҷа ӱгренерге кіріп аларға?
- Школа тоосхан абитуриент СФО-дағы имнег пӧзік ӱгредіг учреждениезінзер ӱгренерге кіріп алча. Анаң ағаа 20 январьдаң 1 мартха теере Хакасияның хазых хайраллаҷаң министерствозынзар айланарға кирек. Ол орныхча: Ағбан город, Крыловтың орамазы, 72, 3-ҷі хадыл, 307 кабинет. Студентке киректелчеткен пічіктерні чыып аларға кирек, анаң прай чӧптезіглер иділерлер.
Азынада таныхтирға кирек, кӧстегліг оңдайҷа ӱгренчеткеннернің саны чылдаң ӧсче. Ол студенттерге тикке ӱгреніп аларға паза, диплом алза, тоғыс чох одырбин, тоғысха кіріп алар оңдай пирче.
- Чыл сай пістің республиканың имнег учреждениелерінзер пасха регионнардағы чиит специалисттер тоғынарға килчелер. Сірернің кӧрізіңернең, нимезінең Хакасия оларны пеер тартча?
- Я, орта сизінчезер. Чыл сай хонҷых регионнардағы имҷілер пістің республиканың имнег учреждениелерінзер істенерге килчелер. Минің кӧрізімнең, ол чиит специалисттерге Хакасияда чахсы социальнай полызығ пирілчеткенінең палғалыстығ. Таныхтирға кирек, пасха регионнарда чиит имҷілерге мындағ хабазығ иділбинче.
- Имҷі профессиязының престижін кӧдіріп алар ӱчӱн, Хакасияда кӧп тоғыс апарылча. Аннаңар чоохтап пиріңер.
- Хакасияның имнег тураларынзар имҷілерні тартып алар ӱчӱн, піс азынадох тоғыс апарчабыс. Школаларда 9-11 класста ӱгренчеткен олғаннарны имнег киреенең таныстырчабыс, «азых ізіктер» кӱннерін иртірчебіс. Хакасияның хазых хайраллаҷаң министерствозының специалисттері паза имнег тураларының ӧӧн имҷілері СФО- дағы пӧзік ӱгредіг учреждениелерде иртчеткен вакансия ярмаркаларына чӧрчелер. Ідӧк Хакасияда чыл сай «Иң артых имҷі», «Иң артых имнег учреждениезі», «Иң артых медсестра» профессиональнай марығлар иртірілчелер.
Таныхтирға кирек, пӱӱнгі кӱнде Хакасияның имнег тураларында имҷілер чидіспинчеткен дее полза, халғанҷы чылларға оларның саны хозыл парған. 2012-2015 чылларда 400 имҷі тоғынарға килген. Ідӧк аалларзар тоғынарға парарға сағынчатхан чииттернің саны ӧсчеткені ӧріндірче.
Оксана Сунчугашева.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |