ГАГАРИН КУБОГЫ - ЧИҢӀС ТАНИИ
15.02.2023
Хабарлар
Танығлығ кирек. 10 февральда Хакасия чуртағҷылары Континентальнай хоккей лигазының ӧӧн сыйии Гагарин кубогын удурлааннар
Кӱмӱс ідіс
Пу танығлығ кирек Хакасияның спорт тархынында халар тіп ікінҷілес чоғыл. Пістің республиказар пастағызын на Гагарин кубогын ағылғаннар нооза. Ол оңдайынаң улуғ ідіске тӧӧй, аның ӱчӱн 16 иң кӱстіг хоккей командазы харбасча.
Континентальнай хоккей лигазы (КХЛ) 2008 чылда тӧстелген. Ортымахти анда 22-24 ӧме ойнапча. КХЛ Россияның, Европаның паза Азияның шайбалығ хоккей клубтарына кӧріл парған. Пастағы туста специалисттер наа лиганың таңдағызына тың на киртінминдірлер. Аннаңар арға-мӧрійнің сыйиина Юрий Гагариннің адын пирерге чаратханнар. Лиганың тӧстегҷілері ізенгеннер, илбек хантигірҷінің ады хоккеисттерні улуғ чиңістер тударға кӧстир. Сағыс орта полтыр. Амғы туста шайбалығ хоккейде Гагарин кубогы иң улуғ сыйыхтар санына кірче.
Хоккей ідізі кӱмӱстең чайалған, аның пӧзии – 94,5 сантиметр, улии – 12 литр кір парча. Ол 19 килограмм пасча. Кубоктың пір cаринда Юрий Гагариннің омазы паза учухчатхан комета киртіл парғаннар, ікінҷізінде хоккеистті кӧрерге чарир. Iдісте кічіг шайбалар пар, анда чиңіс тутхан клубтарның аттары кӧзіділген. Кубоктың авторы – Владимир Майзель. Гагарин кубогы – холдаң холға чӧрчеткен сыйых. Арға-мӧрій соонда аны чиңіс тутхан команданың капитанына читірчелер.
Чӧрім
2011-2012 чыллардағы сезонда КХЛ-да наа кибір салылған. Гагарин кубогын утхан ӧменің полған на хоккеизі паза тренері аны пір кӱнге тӧреен чирінзер апар килерге оңдайлығ. Он чыл аразына кӱмӱс ідіс Россияның аймах городтарында ла нимес, хырығ озаринда – Белоруссияда, Казахстанда, Латвияда, Словакияда, Чехияда, Финляндияда, Швецияда, Украинада – пол килген. Анзы КХЛ-ның устағ-пастаана асхынах пілдір парған, таң. «Ростелеком» компанияның хабазиинаң амды хоккей ідізін Россияның аймах городтарынҷа ал чӧрчелер. Чӧрімнің ӧӧн пӧгіні – чонны хазых чуртасха тартары, шайбалығ хоккейнең айғасчатханнар санын ӧскірері.
Пастағы туста чӧрімде миллион чуртағҷылығ городтар ла араласханнар. Итсе, оларның cаны пістің хазнада кӧп нимес. Кӧзідімге, Сибирьде миллион артиинаң чуртағҷы ӱс ле городта – Новосибирскте, Омскта паза Хызылчарда – саналча. Аннаңар чӧрімде улуғ нимес тее городтарға аралазарға чарадылған. Пылтыр «Ростелеком» компания Гагарин кубогын Россияның Европа чардығындағы регионнарҷа ал чӧрген. Пӱӱл, тізең, Уралның паза Сибирьнің чуртағҷыларына оң полды. Сибирьде хоккей ідізін иң пурун тюменьдегілер удурлааннар. Анаң кубокнаң Татарскта (Новосибирск облазы) паза Новокузнецкте танысханнар. 10 февральда, тізең, ол Ағбанзар читкен.
Кубок – Хакас чирінде
Пістің республикада Гагарин кубогын удурлааны ӱлӱкӱн чіли ирткен. Пайрамнығ мероприятиеде улуғ пастыхтар, артисттер, хоккеисттер, спортха хынчатхан улус араласханнар. Чоныбыстың кибірі хоостыра «Читіген» театрның чайаачылары сеек-сеек идіп аластааннар. Алғасчы Элмира Аманбаева республика чуртағҷыларына пай, ырыстығ чуртас алғаан. Чатхан ӱні, сіліг кӧглер паза теелбектер кӧрігҷілернің кӧңнін кӧдіргеннер. ідӧк сценаа «Иренек хан» ӧме паза «Лайм» ансамбльның теелбекчілері сыхханнар.
Гагарин кубогын «Саяны» стадионның пустығ чазызынзар сығарғанда, чыылған чон тынминыбысхан тиирге чарир. Кӱн сузында ол ырахтынох пызыңнапчатхан. Кӱмӱс ідіс морсымнығ кӧрінче. Сынап чиңіc тании. Хоккеисттер аны утар ӱчӱн нинҷе кӱс салчалар.
Устағҷылардаң спорт пайрамында Хакасия пазы Валентин Коновалов, Ағбан пазы Алексей Лёмин, спорт министрі Cергей Кочан, «Ростелеком» компанияның Хызылчардағы пӧлиинің пастых орынҷызы Валерий Клейкин араласханнар. Мероприятиенің аарлығ аалҷызы саблығ хоккеист Сергей Шепелев полған. Сергей Михайлович – 1984 чылдағы Олимпиаданың чемпионы, ол СССР-ның піріктірілген командазынаң хада ӱс хати тилекей чемпионадында чиңіс тутхан. Пір cӧснең, совет паза Россия спортының матыры.
Пастап сӧс алған Валентин Коновалов:
– Гагарин кубогын Хакасиязар ағылғаны – піске танығлығ кирек. Пу ідіс хоккеисттерге, «ағырчатхан» улусха чиңіс тании полча. ізенчем, сыйых спортсменнерні сидіксіністерні тобырарға, устарын таптирға, наа чидіглерге чидерге кӧстир. Чӧрімнің тӧстегҷілеріне улуғ алғызым читірчем. Прай спортсменнерге чиңістер алғапчам.
Алғыстастарға саблығ хоккеист Сергей Шепелев хозылған:
– Прайзын чалахай ӱлӱкӱннең алғыстапчам. КХЛ-ның кубогын удурлирға полған на городха ӱлӱс тӱcпинче. Хакасияда алында мағаа поларға киліскен. Минің кӧрізімнең, спорт мында тиліпче. Хоккейнең айғасчатханнарның саны ӧсче. Тоғыс тӱзiмніг парза, чиит спортсменнернің піреезі Гагарин кубогын тӧреен чирінзер ағылар. Хазых паза часкалығ полыңар.
Мероприятие пайрамни азылған соонда хабарҷылар Валентин Олеговичнең паза Сергей Михайловичнең чоох алызарға маңзырааннар. Хайди таныхтаан Хакасия пазы, 2025 чылда пустығ аренаны хайди даа пӱдірерге пастирлар. Ол улуғ кирексіністе. Наа объект аймах спорт кӧрімнерін тилідерге оңдай пирер. Сергей Шепелевтің чооғынаң, Хакасияда ӧӧнінде меспектіг хоккей ойнапчалар. Че республикада iдӧк шайбалығ хоккейге хынчатханнар пар. Сергей Михайлович Гагарин кубогын удурлирға Ағбанзар ла килтір. Пістің хоккеисттер чоннар аразындағы марығларда араласпинчатханы саблығ спортсменні хомзындырча. КХЛ-ның 2022-2023 чылларның сезонында 22 клуб ойнапча. Оларның 19-зы – Россия командалары, пірер ӧме – Белоруссиядаң, Казахстаннаң паза Хыдаттаң.
Хабарҷыларға кӧп чапсых ниме Валерий Клейкин чоохтап пирген. Валерий Николаевичтің таниинаң, «Ростелеком» иртірчеткен чӧрімге кіріп аларға оой нимес. Аралазар городтар хатығ таллағ иртчелер. Ол Хакасияның правительствозын, физическай культура паза спорт министерствозын, Ағбанның устағ-пастаан махтаан. Олар, хада-пірге тудынып, тузында хайыныбысхан сылтаанда, Гагарин кубогын республиканың ӧӧн городынзар ағылғаннар.
Пайрамнығ чардых соонда хоккей ідізін спорткомплекстің холлынзар кӧзіргеннер. Анда полған на кізее Гагарин кубогынаң сомға суурынып аларға оңдай пирілген. Программада ідӧк олғаннар паза ветераннар ӧмелерінің марығлары, сыйыхтар полғаннар.
Чоохтирға кирек, 17 февральда Индiркi Новгородта «Алтын шайба» тиксi Россия марии иртер. Хакасия ӱчӱн «Металлург» (Абаза) команда ойнапча.
Автор :
Майя Кильчичакова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
