Кӧптең кӧп книга сыхсын
17.02.2023
Хабарлар
Презентация. Пу кӱннерде Ағбанда ХакНИИЯЛИ-ның актовай залында 2022 чылда сығарылған наа книгаларнаң таныстырғаннар
ХакНИИЯЛИ-да ирткен чыылығны апарған аның устағҷызы, филология наукаларының кандидады Нина Майнагашева. Ол пастап хысхаҷахти чоохтап пирген, хайди институттың наука тоғынҷылары ирткен чылда тоғыныбысханнарынаңар. Институт чахсы тоғынтыр. Кӧрілген пӧгiннер прай даа толдырыл парғаннар. Хакасияда чоннар аразындағы паза регионнар аразындағы конференциялар ирткеннер. Читі монография паза ӱс чыынды сығарыл парған.
Iди «Алыптығ нымахтар» чыындының пастағы томы сых парған. Пӱӱл аның ікінҷi томы сығар, iдӧк В.А.Кышпанаковтың «Население Хакасии: из прошлого к современности» (1897 – 2022 чч.), В.К.Чертыковтың «Историко-этнографическое изучение. 50 – 80-е годы ХIХ века», Н.С.Майнагашеваның, Л.В.Челтыгмашеваның «Литературные портреты хакасских писателей», А.Л.Кошелеваның «Николай Фёдорович Катанов: «Образцы народной литературы тюркских племен – форпост тюркской духовности», «Сказки Хакасии» в детских рисунках» (тимнеен Е.С.Торокова), «Научное обозрение Саяно-Алтая» (1 – 4 сығарыстар), «Хакасский фольклор», М.П.Чебодаеваның «Традиционная женская рубаха хакасов», И.М.Чебочакованың «Роль глагола в словообразовательной системе хакасского языка» книгалары паза Хакасияда Археология чылына чарыдылған ӧңніг хоостығ сіліг альбом сығарыл парғаннар.
Анаң пу адалған книгаларның авторлары хайди тоғынғаннарынаңар хысхаҷахти чоохтап пиргеннер. Итсе-де, чыылығда прайзы ла полбаан, тоғыстары хоостыра пасха орыннарзар парғлаптырлар.
Иң пастап чоох тутхан тархын наукаларының кандидады Валерий Чертыков. Аның пу тоғызы Хакасияның 19 чӱс чылындағы тархынына чарыдылған. Кӧбізін ол тустағы ученайлар Н.А.Костровтың, В.В.Радловтың, Н.М.Ядринцевтің, А.В.Адрияновтың, Д.А.Клеменцтің паза даа пасхазының істезігліг тоғыстарына тӧстенген. Сибирь чоннарының чуртазынаңар ӧӧнінде Россияның Географическай пірігізі істезігліг тоғыстарны апарған. Ученай Костров, хакастар аразында чуртап, иң пурун архив материалларынаң тузаланып пастаан.
Экономика наукаларының докторы Владимир Кышпанаков Хакасия чоннарының 1897 – 2022 чыллардағы демография сурығларын істескен. Ол позының тоғызында алындағы чылларда город-аалларда паза сағам хакастар хайди чуртапчатханнарын істескен. Амғы туста хакастар хайда ла чуртабинчалар! Iскеркідегі Чукотка чирінең пасти, Россияның полған на регионнарында чуртап, кидеркі Калининград облазына теере тарас парғаннар. Пістің чииттер, пасха городтарзар парыбызып, андох халчалар, чир-суғларынзар айланминчалар.
Филология наукаларының кандидады Ирина Чебочакованың глаголлардаңар паза олар хайди хакас тілін пӱдірчеткеннеңер тоғызы полған. Аның наука тоғыстары кӧбізін тiл киреенҷе специалисттерге туза полар. Чоохтирға кирек, ол пу книгазын пос ахчазына сығарған, че библиотекаларнаң ӱлезерге молҷаан.
Институттың литература пӧлиинің тоғызын чарыт пирген филология наукаларының кандидады Лариса Челтыгмашева. Ол Нина Майнагашеванаң хада ікі книга сығарыбысхан. Пастағызы Хакасияның олған литературазынаңар паза ікінҷізi хакас писательлернің литература омалары. Iди литература омаларынға пістің амғы писательлер киріл парғаннар: Г.Г.Казачинова, Л.В.Костякова, К.Т.Нербышев, А.Е.Султреков, И.П.Топоев, А.А.Халларов, В.Г.Шулбаева паза Митхас Туран (А.Я.Черпаков). Пу тоғысты литература пӧлии аннаң андар апарар. Книгаа кирілбеен писательлерібіс ам даа парлар.
Iдӧк маңат тоғыныбысхан институттың фольклор пӧлии. Аның устағҷызы, филология наукаларының кандидады Надежда Чистобаеваның чооғынаң, ирткен чылда олар кӧп тоғыс толдыр салғаннар. Иң салымнығ полар «Алыптығ нымах» чыындының пастағы томы. Анда 1945-1946 чылларда пазылған 10 алыптығ нымах киріл парған. Кӧзідімге алза, «Улуғ чурттығ Пора Хан», «Хара аттығ Хара Хан», «Алтын Iргекнең Кӱмӱс Iргек» паза даа пасхалары. Институттың архивінде 200-ке чағын алыптығ нымах чатча одыр. Пӱӱл ікінҷі томны сығарзалар, аннаң андар iдӧк пасха томнар сығарыларын сахтирбыс. Ахча ла табылзын.
Фольклор пӧлии «Хакасский фольклор» книганы хатап сығарыбысхан. Аны пастап, Н.Ф.Катановтың фольклор тоғыстарын тимнеп, 1962 чылда П.А.Трояков сығарған полған. Андада піcтің саблығ ученай Н.Ф.Катановтың 100 чазын таныхтаан полғаннар.
Iдӧк фольклор пӧлии, ӧӧнінде филология наукаларының кандидады Евгения Торокова, «Сказки Хакасии» книганы хакас паза орыс тіллерiнең тимнеен. Ол «Сказки народов России и мира» серия хоостыра сыххан. «Хакастарның нымахтары» онынҷызы полған. Мындағ книгаларны сағынып алғаннар Россия дипломанттарының паза Чоннар аразындағы педагог-хоосчылар пірiгістері. Хоостарны нымахтарға чайап салар марығда тилекейдегi олғаннар араласханнар. «Сказки Хакасии» книгада пістің кічіг хоосчылар Есения Ондрактың паза Тадина Иптышеваның хоостары пиріл парғаннар.
Институт чыл сай «Научное обозрение Саяно-Алтая» журналлар сығарча. Анда алынҷа археология, филология (I-II сығарыс) паза тархын материаллары пирілчелер.
Iдӧк сых парғаннар филология наукаларының докторы Альбина Кошелеваның «Николай Фёдорович Катанов: «Образцы народной литературы тюркских племен – форпост тюркской духовности» паза филология наукаларының докторы Виктория Карамашеваның «Художественные особенности басен Н.Е.Тиникова» книгалары.
Мында пір ле ниме хомзындырча – пу адалған книгаларның тиражтары уғаа асхынах паза олар садығда чох поларлар. Библиотекаларҷа тарирлар, че кізілер оларны постарына садып аларға сағынчалар. Нӧӧc, хоза ахча таап, улуғ тиражнаң чонға кирек книгаларны сығарбасха?
Автор :
Илья Топоев
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы