ПРАЙЗЫ – САНА ЧОЛЫНА
10.03.2023
Хабарлар
Татьяна СУБРАКОВА Максим оолғыҷаанаң
Спорт. 4-5 мартта Таштып аймаанда, «Сюгеш» тынағ базазынаң ырах нимес, Николай Швыдковтың паза Георгий Шулбаевтiң хумартхызына чарыдылған саналығ чыларынҷа кибiрлiг марығлар ирткеннер
Пӱӱл пу марығлар 30-ҷы хати иртiрiлдiлер. Саналар чолының пайрамын азарға Хакасияның физическай культура паза спорт министрi Сергей Кочан, Таштып аймаа пазының орынҷызы Эдуард Топоев, Хакасияның Ӧӧркi Чӧбiнiң депутады Василий Шулбаев кил парғаннар. Iкiнҷi кӱнiнде, 5 мартта, аймах пазы Николай Чебодаев араласхан.
Аймах частығ кiзiлер аразында иртiрiлчеткен арға-мӧрiй Николай Швыдковтың паза Георгий Шулбаевтiң хумартхызына чарыдылча, 1995 чылдаң сығара иртiрiлче.
Николай Сергеевич Швыдков (1924-2004) – СССР-ның саблығ тренерi, саналығ чыларының пастағҷызы, Илбек Ада чааның араласчызы, Ағбандағы ӱгретчiлер институдының ӱгретчiзi. Георгий Прокопьевич Шулбаев кӧп чыл Таштып аймаанаң устаан. Ағбанда ӱгренчеткенде, ол, Швыдковтың ӱгренҷiзi полып (1958 – 1962 чылларда), саналығ чыларына кӧп хайығ айландырҷаң. Георгий Шулбаев ӱреенде, марығларға аның ады хозыл парған.
Марығ тузында Таштып аал чуртағҷызы Татьяна Субракованаң танызып алғам. Ол аны оолғынаң хада сомға суурыбызарға сурынған. Талаанға тiп санапча.
Суурыбысхам, анаң чоох-чаахнаң турыбысхабыс. Палазы хайди сананаң чыларға пастаанын сурғам. 12 частығ оолғыҷахтың ады Максим полтыр, ол Субраковтар сӧбiрезiнде iкiнҷi чылы чуртапча. Татьяна аны, опекаа алғандох, сана секциязына пирiбiстiр.
– Пастағы туста аар пiлдiрҷең, анаң кӧнiк парған, позы тартыл сыххан. Тренер Александр Карачаков олғаннарға кӱннiң сай тренировкалар иртiрче, оларны чахсы ӱгретче. Марығның пастағы кӱнiнде Максим классика оңдайынаң чылғанда, пастағы орын алып алған. Улии оолғымны медальларнаң ас парыбызар, неке. Улии оолғым ағаа чахсы кӧзiдiм пирген, че амды ол сӧбiрелiг. Максим, санадаң пасха, футболнаң, ниик атлетиканаң айғазарға хынча. Аннаң пасха сӧбiрезер ӱр ниместе Саша оолағасты алып алғабыс, анзы кӱреске чӧрче, – чоохтап пирген Татьяна.
Iдӧк чиит паба Олег Чанков хайиим тартхан. Ол ӱс частығ хызыҷаа соонҷа кӧрчеткен, анзы кiчiг саналығ чыларға чоо кӱстенчеткен, сигiс частығ Тимур аҷазы марығда аралазып аларын сахтапчатхан полтырлар.
Iҷе-пабалар палаларны спортха кӧнiктiрзе, чӱрекке уғаа истiг пiлдiрче. Олғаннар iди кӱстерiн тыытчалар, пос тустарын тузалығ иртiрчелер нооза.
Мындағ оңдайнаң пу iкi кӱн аразына сана чолына 300 азыра араласчы дистанцияа сыххан, олғаннар даа, улуғлар даа. Таштып аал чуртағҷызы Нина Степановна Тохтобина, тынаға сыххан даа полза, чыл сай Швыдков-Шулбаевтiң сана чолында марығласча, пӱӱл 3-ҷi орынға сығып алған. ГТО фестивальында даа удаа кӱзiн сынапча. Андағ кiзiлерзер кӧрiп алза, уғаа поғдархастығ.
Автор :
Тарина БУТОНАЕВА
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде
