НАА ЧЫЛНЫ «АЛТЫН СТОЛНАҢ» УДУРЛААННАР
24.03.2023
Хабарлар
Ӱлӱкӱн. Н.Ф.Катановтың адынаң Хакас гимназиязында Чыл пазын таныхтааннар
Ӱгредiг заведениезі алнындағы ачыхта чыылызып, олғаннар ӱлӱкӱн пасталарын чидiкпин сахтапчатханнар. Мына оларның алнынзар хакас кӧг тирiглерiн тудын салған оол-хыстар сыхтылар. Пайрамны чайаачы номерлерiнең республиканың олған искусство школазының ӱгренҷiлерi асханнар.
Оларның соонаң олғаннарзар, тоғынҷыларзар, аалҷыларзар гимназия директоры Марина Сагатаева айланған. Ол прайзын хакас чонның ӧӧн ӱлӱкӱнiнең алғыстаан.
Ачыхта от тамызылған. Тахпахчы, поэт, Хакасияның писательлер пiрiгiзiнiң кнезi, Россияның писательлер пiрiгiзiнiң кiзiзi Альбина Курбижекова От иненi азырир тайығ иртiрген. Анаң ӱгретчiлернең паза ӱгренҷiлернең хада, отты ибiрiп, прайзына чахсы чуртас, пик хазых сурғаннар. Соонаң класстар соон сӱрiстiре хазыңзар пастырғаннар. Альбина Васильевна аймах ӧңнiг чаламаларны хайди палғирға, ниме чоохтанарға кирек полчатханын чӧптеп турған.
Пайрамнығ чардых тоозылған соонаң прайзы гимназиязар ирткен. Анда «Алтын стол» марығ ирткен. Аның ӧӧн кирексiнiзi хакас чонның чиизiн тимнирi полған. Iдӧк полған на класс столларын хакас тiлiнең «арачылирға» тимненгеннер. Кем-де кибелiс хығырған, кем-де тахпах салған, хайзы-да, хомыснаң ойнап, сарыннар толдырған. Палалар iҷе-пабалары полызиинаң пай столлар тимнептiрлер. Хайдағ ла татхыннығ чииc полбаан мында – талғаннаң тимнелген конфеттер, печеньелер, тадылығ халазахтар, хан, потхы, чарбалығ ӱгре паза аннаң даа пасхазы. Марығ араласчыларының кӱстенiзiн жюри паалаан. Чиңiсчiнi таллирға оой ла полбаан оларға. Че андағ даа полза, сыйыхтығ орыннар пирiл парған. Пастағы орынны 7Г класс холға кирген, iкiнҷi орында – 7В класс, ӱзiнҷiзiнде – 8А. Кӧрiгҷiлер хайиин тартхан 5В паза 6В класстар iдӧк таныхтатханнар. Чахсы салтарлар кӧзiткен олған ӧмелерiне грамоталар, тадылығ сыйыхтар паза «Благодарение» фондтаң, «Кюг» ООО-даң ахчалығ сыйых читiрiлгеннер.
Таныхтирға кирек, гимназияда пизiнҷi класстағылар иң кiчiглерi полча. Наа орында ӱгредiглерін ам на пастапчатхан ползалар даа, олар ӧткiн тудынчатханнар, пу марыға чахсы тимнентiрлер. 5В класстың ӱгренҷiлерi Милослава Сербигешева, Айима Карамашева пасталығ класстарда Асхыс аймаандағы Оот пилтiрi аалда ӱгренгеннер, Айсили Сазанакова Таштып аймаандағы Улуғ Арбыт аалда тӧреен. Аалда ӱгренчеткенде, школаларында ӱгренҷi кӧп полбаан. Ӱлӱкӱннер дее алғым таныхталбинчатханнар тееннер олар. Аннаңар даа пу пайрам кӧңнiлерiне тың кiртiр.
Ачыныстығ хызыҷахтар хакас тiлiнең матлама чоохтанчалар. Iзенербiс, мыннаң мындар школа чуртазында ӧткiн аралазарлар паза пiске оларның чидiглерiнеңер пiр ле хати нимес истерге килiзер.
5В класс ӱгренҷiлерi аалҷыларны пай стол кистiнзер хығырчалар
Автор :
Татьяна КЫШТЫМОВА
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
