МАТЫР ЧААҶЫНЫҢ АДЫ УНДУЛБАС
05.04.2023
Хабарлар
Кiчiг атығҷылар марии. Асхыс аймаандағы Ӱс чул аалда ӱгренҷілер аразында мылтых атарынҷа марығлар ирткен. Олар Анатолий Бурнаковтың хумартхызына чарыдылғаннар. Чааҷы-интернационалист Анатолий Бурнаков, изен-хазых полған полза, пӱӱл 24 мартта 61 чазын толдырарҷых. Ачырғасха, ол чуртастаң уғаа ирте парыбысхан. 1991 чылда, киненге кіріп, ӱреен. Тӧӧ чирінең сыххан оолға Афганистандағы чаада аралазарға ӱлӱс тӱс парған. Разведчик полған, махачы чааласхан, мылтых чахсы атчаң. Взвод командирінің орынҷызы, гвардияның улуғ сержанты Бурнаковтың кӧксін Хызыл Чылтыс ордені чазаан.
2018 чылда 15 февральда Ӱс чулдағы школада (Анатолий Бурнаков аны тоосхан) хумартхы чарды турғызыл парған. Олох кӱн Асхыс аймаандағы ӱгренҷілернің аразында мылтых атарынҷа марығлар ирткен. Ол тустаң пеер олғаннар Ӱс чулзар чыл сай чыылысчалар. Чичең атыстарын кӧзідерге ідӧк Таштып аймаандағылар кил парадырлар. Пӱӱл Пии аймаа хозылды.
Хумартхылас мариинда кічіг атығҷыларның 9 ӧмезі араласхан. Полғанында ла 2 оолах паза 2 хызыҷах. 5 кізі, командаа кірбин, кӱзін пос алынҷа сынаан.
Марығ ондайлары хоостыра, атығҷы, одырып, холларын столға тіреп алып, 10 метр ырахтаң 8 № таңмаҷа атча. Аның тирии – пневматическай мылтых. Полған на кізее 8 ух паза 8 таңма пирілче: 3-ті ол, мылтығын сыныхтап, атча. Халғаннарын пірердең 5 таңмаҷа атыбызарға кирек. Ана оларның салтары санға алылча. Полған на араласчының 50 сан чыып алар оңдай полған. Че андағ мирген атыстығ кізі табылбаан.
Марығлас хазыр парған. Иң артых тимненіс Асхыстағы лицей-интернаттың ӱгренҷілері кӧзіткеннер. Олар, ӧменең 113 сан чыып алып, чиңісчі полыбысханнар. «Снайпер» команда (Александр Шахматов, Роман Тодинов, Екатерина Асочакова, Айсили Сакова) пастағы орынны холға кирген. Iкінҷі орында Полтах аалдағылар (Алексей Мамышев, Кирилл Попов, Айселина Боргоякова, Светлана Амзаракова) пол парғаннар. Оларның 103 сан. Ӱзінҷі орын Ӧӧк пилтірінең килген кічіг атығҷылар ӧмезіне (Сергей Деров, Иван Петухов, Вика Кизесова, Ксения Теклева) киліскен. Олар марығда пастағызын на араласханнар, че хомай нимес чидіг кӧзіткеннер – ӧменең 94 сан атыбысханнар.
Атығҷыларның алынҷа чидіглерін кӧрзе, позының командазына иң улуғ хозым (39 сан) иткен Иван Петухов. Ол Ӧӧк пилтірі аалдаң, пастағы орын ӱчӱн алтын медальға турысхан. Полтах аалдаң килген Кирилл Попов ікінҷізі полыбысхан. Аның чидии – 36 сан. Ағаа кӱмӱс медаль пирілген. Хола медальның ээзі – Асхыстағы лицей-интернаттың ӱгренҷізі Александр Шахматов. Аның 31 сан.
Хызыҷахтар, тізең, медальларны пу оңдайнаң ӱлезіп алғаннар. Алтын – Алина Боргояковани. Ол Ис пилтірі аалдаң, аның 37 сан. Кӱмӱс – Анастасия Аланованың, Кызластағы школаның ӱгренҷізінің, холында. Ол 30 сан чыып алған. Хола медальны Айселина Боргоякова Полтах аалзар апарыбысхан. Аның чыындызында 29 сан.
Сыйыхтығ орыннарға турысхан олғаннар «Иң артых атығҷы» ат ӱчӱн марығласчалар. Аны хайдағ оңдайнаң ілезіне сығарарын команда устағҷылары (тренерлер), чӧптезіп, чаратчалар. Пӱӱл чіпке палғалған пластик бутылканың чабиина теерте атыбызарға кирек полғаннар. Пу пастағы кӧріске ле оой ниме, че сынында андағ нимес. Бутылка чабии аар-пеер ле чайхалча, ибірілче. Аны кӧрілген тустың аразына, кӧстеп, харолға тудып алып, атыбызарға кирек. Мында атығҷы харах одының чітиин, хол кӱзін, пик сындырын кӧзітче.
Марығны прайзы пір тиң оңдайнаң пастапча. Полғаны ла пір ухнаң таңмаа теерте атыбызарға кирек. Ат полбаан кізі марығдаң сых парча. Пола-пола килгенде, азах меетке Александр Шахматовнаң Айселина Боргоякова читкеннер. Иң нандырығлығ тус! Ікізі дее мирген атча. Тиңнең тиңе парчалар. Че мына Асхыстаң килген оол, алҷаас идібізіп, чаза атыбысты. Амды Ис чирінең килген хыстың теезі. Аның атарын кізілер тынмин даа сағыпчалар... Мылтых тазыли тӱскенде, «ағырчатхан» чонның табызы залдағы сымзырыхты чарған: «Ура! Айселина – чиңісчі!» Ол туста бутылка чабии, харахха кӧрінмес ухха саптырыбызып, ніске чіпте чайхал турған. Айселина Боргоякова – 2023 чылдағы марығның иң артых атығҷызы. Ағаа «Бурнаковский стрелок» аарластығ ат пирілген. Чиңісчі ӧнетін чахығнаң иділген статуэтка паза ахчалығ сыйых алған.
Сыйыхтығ орыннарға турысхан полған на атығҷаа Аарластығ пічік, медаль паза ахчалығ сыйых пирілген.
Анатолий Бурнаковтың хумартхызына чарыдылған марығны иртірерге паза сыйых чыындызын тӧстирге Асхыс аймааның спорт школазы (устағҷызы Виссарион Кольчиков), ДОСААФ-тың Хакас Республикадағы пӧлии (устағҷызы Айдыс Сат), «Благодарение» (устағҷызы Тарика Торокова) паза «Емец» (устағҷызы Мария Ильящук) чыындылар хабасханнар. Ідӧк алынҷа сыйыхтар иткен пос киреенең айғасчатхан Александр Миягашев. Ӱс чулдағы школаның устағ-пастаа аалҷыларны чылығ удурлирға паза марығны пӧзік синде иртірібізерге пар-чох кӱзін салған.
Автор :
Алексей БОРГОЯКОВ
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
