УСТАРЫН ТИЛIДЕР ОҢДАЙЛАР – ПРАЙЗЫНА
07.04.2023
Хабарлар
Марығ. Ағбандағы профессия технологиялары, экономика паза сервис колледжiнде «Абилимпикс» чемпионат ирткен
«Абилимпикс» – чоннар аразындағы чӧрiм. Пу сӧстi англия тiлiнең «оңдайлар олимпиадазы» тiлбестирге чарир. Чӧрiм Японияда 1970 чылларда тӧстелген. Аның ӧӧн пӧгiннерi – кинектернiң алған профессияларында устарын тилiдерi, хазии уйан кiзiлернiң тоғынар оңдайларына халых чонның хайиин айландырары, марығ араласчыларын, удур-тӧдiр таныстырып, ынағластырары паза аннаң даа пасхазы. Россия чӧрiмге 2015 чылда хозылған. Чыл сай компетенциялар паза араласчылар саны ӧзiп одырча. Мында хазии уйан 14 час ас парған олғаннар аразында профессиялар узынҷа аймах марығлар иртiрiлче. Республика синiндегi чемпионатта пӱӱл 100 азыра ӱгренҷi паза студент араласхан.
Чемпионат пайрамни азылған. Чыылысхан чонны Хакасия пазының орынҷызы Михаил Побызаков алғыстаан. Ол пiстiң араласчыларыбыс тӧремiл чахсы салтарлар кӧзiтчелер, Россия синiнде иртчеткен марығларда сыйыхтығ орыннарға турысчалар тiп таныхтаан.
– Пу чемпионат уғаа кирек. Ол олаңай чонның, тоғыс пирчеткеннернiң, ӱлгӱдегiлернiң хайиин кинек кiзiлернiң кирексiнiстерiне айландырча, оларға полызар оңдайлар тiлирге кӧстепче, – теен ол.
Iдӧк чемпионат араласчыларына Россияның просвещение министрi Сергей Кравцовтың паза ортын профессия ӱгредии департаментiнiң директоры Виктор Неумывакиннiң алғыстастары видео пастыра читiрiлген.
Устағҷы-пастыхтар чоохтары аразында хулағы чахсы испинчеткен, харахтары уйан кӧрчеткен олған школа-интернаттарының ӱгренҷiлерi чайаачы номерлерiн кӧрiгҷiлерге сыйлааннар. Марығлар «крючокнаң палғиры», «идiнҷек кирее», «чиис тимнирі», «сас хырығары», «кип-азах пызары паза тiгерi», «пасталығ класстар ӱгретчiзi», «ағаста киртерi» паза даа пасха кӧстеглерҷе иртiрiлгеннер. Оларда студенттер, ӱгренҷiлер паза специалисттер араласханнар. Полған на кӧстегҷе алынҷа кирексiнiстер кӧрiлген, тоғысты толдырарына тус синi iдӧк пасхалалған. Iди чiбекнең хоостирынҷа марығ араласчыларына 4 час аразына кӧзiдiмге пирiлген хоосха тӧӧй хоос чайап саларға кирек полған. Сас хырыхчаң усха ӱгренчеткеннер, тiзең, сырлалған узун састығ абахайларға ӱлӱкӱнге прическалар иткеннер. Оларға 1,5 час пирiлген. Марығ араласчыларының тоғыстарын эксперттер паалааннар. Соонаң олар чиңiсчiлернiң аттарын адааннар. Пастағы орыннарға сыхханнар чемпионаттың Россия синiнде иртiрiлчеткен чардығында аралазарлар.
Таныхтирға кирек, чемпионатта пасха даа аймах мероприятиелер иртiрiлче. Iди аалҷыларға ӧкерек, чахайах осхас аймах ӧңнiг прическа идерiнҷе, тасхархыны сiлiглирiнҷе, иптирiнҷе паза пасха даа мастер-класстар паза кӧзiдiглер тимнелгеннер. Iкiнҷi кӱнiнде студенттернiң регионнар аразындағы конференциязы, ӱгретчiлерге тегiлек столлар ирткеннер.
Автор :
Татьяна КЫШТЫМОВА
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
