2022 ЧЫЛНЫҢ БЮДЖЕДІ ТОЛДЫРЫЛҒАНЫ ӰЗӰРІЛЕР
26.04.2023
Хабарлар
Президиум. Хакасия Ӧӧркі Чӧбінің президиумы теестегі чыылиинда ӱс закон проектін ӱзӱріге алған паза пір федеральнай закон проектіне ӱндескен
Пастағы ікі закон проекті Хакасияның ТФОМС-ының (хайди даа имнег страхованиезінің орындағы чыындызы) бюджедіне теелген: пастағызынҷа 2023 чылның бюджедіне алызығлар кирері кӧрілче, ікінҷізі 2022 чылның бюджедінің толдырылғанына теелче. Ікізінең таныстырған Хакасияның ТФОМС устағҷызы тоғызын толдырчатхан Галина Алёхина. Аның искіриинең, Хакасияның ТФОМС-ының 2023 чылға, кӧрілген 2024 паза 2025 чылларға бюджедінеңер республика законына алызығлар кирерге киректелче. Сылтағ – аның ӧӧн кӧзідіглерін тӱзедері. Алында бюджет дефицидіне пос ахчазынаң 30 миллион салковай позыдары чарадыл парған. Амды ол кӧзідіг 502 миллион 694 муң 900 салковайға тиңнелче. Ідӧк парыс паза хорадығ кӧстеглерінің хай пірее кӧзідіглері алыстырылар. Салтарында чыындының 2023 чылның парыстары 12 миллиард 366 миллион 705 муң азыра салковай полар, хорадығлары – 12 миллиард 869 миллион 400 муң азыра салковай.
Чыындының 2022 чыл бюджедінде парыстар 11 миллиард 726 миллион 548 муң салковай полар тіп кӧрілген, че кірген сала кӧп – 11 миллиард 737 миллион 730 муң салковай алай кӧрілген синнің 100,1 %-і. Хорадығлар, тізең, кӧрілген синнең ас тузаланылғаннар: 11 миллиард 878 миллион 620 муң салковай орнына 11 миллиард 388 миллион 727 муң салковай алай 95,9 %. Кӧрілген ахча пір дее тузаланылбаан кӧстег: чуртағҷыларның диспансеризациязы паза имнег сыныхтаа тузында онкология ағырығларын ілезіне сығарған ӱчӱн имҷілерге хоза тӧлеглерге хорадығ. Позыдылған 604,3 муң салковайдаң пір ахча даа тузаланылбаан.
Хакасияның Ӧӧркі Чӧп кнезі Владимир Штыгашевті чыындының алындағы чылларда читіре хорадылбаан ахчазы тӧреміл халчатханы сағыссыратхан. Галина Николаевнаның таниинаң, кічіг хырластағы хорадығларҷа пірее тӧлеглер кӱрген айында тӧлелчеткеннеңер, ағаа ахчаны чылдаң чылға «кӧзір» чӧрерге килісче. Че пірее хорадығларҷа имҷілернің читіре тоғынминчатханы таныхталча. Президиум араласчылары парламент кнезінің орынҷызы, хазых хайраллирынҷа паза социальнай политикаҷа комитет кнезі Евгений Молостовтаң пу сурығны тӱптестірібізерге сурынғаннар. Ӧӧнінде сурығлар онкологияны ілезіне сығарарына теелгеннер.
Ӱзінҷі закон проектінең – «2022 чылға Хакасияның республика бюджедінің толдырылғанынаңар» закон проектінең – Хакасияның финанстар министрі тоғызын толдырчатхан Ирина Юшкова таныстырған. Іди 2022 чылға республика бюджедінің ӧӧн кӧзідіглері алылған закондағы саннардаң тың пасхалалчалар. Іди парыстары 52 миллиард 55 миллион 596 муң салковай чарадылған, че тиксі чылға 56 миллиард 682 миллион 639 муң салковай алай 8,9 %-ке кӧп чыылған. Хорадығларға 52 миллиард 543 миллион 275 муң салковай кӧрілген полза, 51 миллиард 779 миллион 937 муң салковай алай 1,5 %-ке тӧбін хорадылған. Салтарында пастап республика бюджеді 487 миллион 679 муң салковай дефициттіг полған полза, чыл тоозылғанда 4 миллиард 902 миллион 702 муң салковай профициттіг пол парған. Чоохтирға кирек, 2021 чылда республика бюджеді ідӧк профициттіг толдырылған: парыстары 46 миллиард 928 миллион 149 муң салковайға тиңнелген, хорадығлары – 44 миллиард 877 миллион 348 муң салковайға, профициді – 2 миллиард 50 миллион 801 муң салковайға.
Президиум, пу закон проектін ӱзӱріге алып, сілкер айының 18-ҷі кӱнінде 11.00 часта аның азых ӱзӱріглерін иртірерге чаратхан. Ол республика парламентінің улуғ залында иртер. Анаң депутаттар аны теестегі сессияда, хандых айының пастағы кӱннерінде, ӱзӱрерлер.
Президиум араласчылары Хазна Думазының депутаттар ӧмезі тимнеен закон проектінең чарасханнар. Аны хоостыра Россияның мал-хусха нандырығлығ хайардаңар законнарына алызығлар кирері кӧрілче. Закон проектінің ӧӧн сағызы – регионның тиксі оңдайларына тудынып, чуртағҷыларның сағыс-кӧрізін санға алып, субъекттернің ӱлгӱ органнарына мал-хусты тударынҷа кирексініcтерні тимнирге чарадарға.
Автор :
Наталья СЮПТЕРЕКОВА
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
