НАА ӰЛГӰНЕҢ ХАДА – НАА ЧИДІГЛЕРГЕ
26.04.2023
Хабарлар
Аал чуртағҷызы Андрей ТОЛТАЕВ сурығ пирче
Чыылығ. Пу наада Таштып аалда Культура туразында чуртағҷыларның чыылии ирткен. Анда аал чӧбі пазы Рустам Салимов ирткен чылның салтарларын чарытхан паза пу чылда ниме иділерінеңер чоохтаан
Таштып аал чӧбінің 2022 чылдағы бюджедін алып алза, 44 млн салковайның 21 млн салковайы Хакасия Ӧӧркі Чӧбінің депутады Василий Шулбаевтің хабазиинаң тартылған. Ол 21 млн салковайны чоллар тыхтирына ӱс чылға кӧр салғаннар, пылтыр 10 млн cалковай наа орамаларда сай урарына парыбысхан. Піди кӧрзе, депутат полызии хоостыра кӧп сурығ пӧгілче. Ирткен чылдох «Кӱніҷек» олған садын паза Таштыптағы 1 № школаны нааҷылирына 2,5 млн салковайға «Ойна» алтын аныпчатхан организациянаң чӧптезіг иділген.
2022 чылда хосхар айындох Василий Шулбаев Хакасия Ӧӧркі Чӧбінің кнезі Владимир Штыгашевнең паза чол хонии министрі Дмитрий Василиадинең хада Таштып аймаанзар тоғыс чорығынаң килгеннер. Андада депутат Таштып тастындағы асфальт чолына чарытхы кирек тіп чоохтанған, чуртағҷылар пу сурығнаң айланғаннарох. Ол чол чардығы наа туралар хыринҷа парча (Шарабуровка адалча), хараазын анда малны алай кізіні машина сазыбызар тіп хорғыс пар полған. Аннаңар ирткен кӱскӱзін республиканың чол хонии министерствозы позытхан 26 млн салковайға Шарабуровка хыринда, Карл Маркстың орамазынаң сығара трассаа теере кизекте паза ӱстӱнзархы чолда (Индіркі Хурлығас саринзар парчатхан) чарытхы тартылған. Наа столбалар турғызып, оларны алтынаң тыыдып, эмектер тартып, фонарьлар хызып, автоматика оңдайынаң тоғынчатхан чарытхы иділген. Харасхы пол парза, фонарьлар постары тоғын сыхчалар, иртен ідӧк постары ӱс парчалар.
Кӱскӱзін ирткен табығларда араласхан чуртағҷыларның 70 проценті Рустам Cалимовтың ӱчӱн ӱн пирген. Анзы чон ағаа киртінчеткенін таныхтапча, неке. Таштып аал кӧрімі алысча, наа олған площадкалары, тынанҷаң ачыхтар азылча, федеральнай, республика, аймах бюджеттерінең ахча тартылча. Кӧзідімге алза, кӱскӱзін аймах пазы Николай Чебодаевтің полызиинаң республика бюджедінең Таштып аймааның имнег туразының алнындағы машиналар турғысчаң орында асфальт тӧзиріне ахча пирілген, істіндегі чоллар ідӧк иптелгеннер.Чоллар аалның иң ағырсымнығ сурии полча. Олар кӧп чыл тыхталбааннар, оймахтар толдыра. Пу сурығ алындағы чыллардох кӧдірілген. Пылтыр Таштып аал чӧбі проект-смета пічіктеріне (ПСД) ахча чадап ла таап, ӱс орамаа (Карл Маркстың, Энгельстің, Советскай) ПСД тимнеен, анзына нинҷе-де миллион салковай парыбысхан.
Пӱӱл Рустам Хайратдинович Хакасия пазы Валентин Коноваловсар сурыныснаң сыххан, Советскай орамада наа асфальт салыбызарға тіп. Кирек киліссе, Таштып аалның иң узун орамазын пӱӱл нааҷылирлар. Энгельстің паза Карл Маркстың орамалары «Аалларның тиксі тилізі» хазна программазына кирілерлер, кӱскӱзін нандырығ килер – ахча пирілер бе ол ікі орамаа алай чох.
Чыылған чон адайларнаң, сӧп-сап тартчаң «Аэросити-2000» компания тоғызынаң, араға-пиво сатчаң садығ туралары тоғызынаң палғалыстығ сурығлар пиргеннер. Кӧбізі сизінген, «Аэросити-2000» чох полғанда, аалда хай-хай арығ полған, ам, тізең, анда-мында сӧп-сап чайылча, контейнерлерде маллар, адайлар хасхланчалар. Чон ачырғанча, че хайди идіп аларзың, ол компания прай Хакасияҷа тоғынча.
Таштып аймаа пазы Николай Чебодаев чыылған чонға СВО араласчыларына полысхан ӱчӱн алғызын читірген. Николай Васильевичтің сурынызы соонаң школалар, олған садтары тоғынҷылары чарым миллион салковай азыра чыып алғаннар, ідӧк имнег туразы, ДРСУ, «Ойна» артель, аймах администрациязы паза пасха даа ӧмелер хабазығда араласханнар. Прай 1,3 млн салковайҷа чыылған, ол ахча чааға киректелчеткен ниме-нооға, операция араласчыларының сӧбірелеріне парар.
Автор :
Тарина БУТОНАЕВА
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
