Марығ араласчылары Дарья БРОВЧЕНКО паза Екатерина КОКОЯКОВА

Марығ. Хакасияның ӧӧн музейінде «Ӱстӱнзархы Сибирьнің иң ус кондитері-2023» марығ ирткен

Араласчылар Ағбаннаң, Харатас­таң, Саяногорсктаң, Асхыс паза Шира аймахтарынаң чыылысханнар, прай 18 кізі.

Хакасияның профессиональнай технологиялар, экономика паза сервис колледжінің 3-ҷі курстағы студенті Юлия Тараканова тортын чачырғаннаң паза тайға хузуғынаң тимнеп килтір. Ол тоңдырылған чачырғанны, хайылдырып, насхабысхан. Аны тестоға аралабысхан. Тайға хузуғының нимізін хаарыбызып, аны оох унадыбызып, торттың ӱстӱнзер тооладыбысхан. Тортты чиит хыс ікі час чарым тимнеен. Кремі уннаң, сахардаң, нымырхадаң паза сӱттең иділген.

– Мағаа группа устағҷызы, сығдырадып, марығда араласчазың тіп искірген, – чоохтаан Юлия. – Анаң тимнен сыххам. Пу минің пастағы тортым полча. Итсе, мин пасталығ класстарда ӱгренчеткенімде, олғаннар аймах чиис тимнепчеткеннеңер пір телепередача кӧ­рерге хынҷаңмын. Аннаң сығара, улуғ ӧс парзам, кондитерге ӱгренербін тіп сағын салғам.

Олимп резерві училищенің студенттері хайхастығ арт-класс тимнеп килгеннер. Екатерина Кокоякова шоколадтаң Инь паза Ян таниин тимнеп килген. Ӱcтӱн ӧрбекейлернең чазаан. Ӧӧрезі Дарья Бровченко карамельнең айны, чылтыстарны, хызыл порчоларны паза хуттарны чайап салған. Хыстарның тоғызы «Между вымыслом и сном» адалған.

Ідӧк марығда Асхыс аймаандағы Сартах станциядаң чиит хыс Сабина Бургундосова араласхан. Ол Ағбандағы 1 № школада ӱгренче, городта туғаннарында чуртапча. Каникулларға аалзар парыбысча. Марығда ағаа іҷезі Ирина Прокопьевна хабасхан.

– Піс республиканың ӧӧн музейі иртірчеткен полған на марығда араласчабыс. Пу марығдаңар ідӧк музей тоғынҷылары искіргеннер, аралазарға хығырғаннар. Тортты ӧріңмедең паза унадылған нымырттаң иткем. Уннаң паза сахардаң пасха, прай ас-тамах позыбысти. Торттың ӱстӱнде «Сартак» пас салғам паза тӧреен аалыҷаамның сіліг тағларын хоос­тап салғам, – чоохтаан Сабина. 

«Сойан-Сус ГЭС» торт махалығ кӧ­рінген. Аның ибіркізін хоостығ кӱргеннер чазапчатханнар. Торттың авторы Мария Саранина ол кӱргеннер хыринда, хакас ибіҷектің тастында, тӱӱрліг хамны турғыс салтыр. Торттың бисквидінзер ноңныхтың сӱзӱнін сиирткен. Желенің тыып парыбызарын сигіс час сахтирға киліскен, аннаңар тортты ікі кӱн иткем теен абахай хыс.

Марығҷыларға тортты хайди даа орындағы ас-тамахтаң тимнирге киректелген. Москвадаң килген чарғыҷылар иң пурнада тадылығ чиистің тастындағы кӧрімін паалааннар, анаң тадиин.

18 кондитернің аразында он кізі марығның халғанҷы чардығына сығып алған.  Анаң оларға ӱс час аразына «Аалҷыларны удурлап пілчеткен Хакасия» темаҷа пірер килограмм кӧдірімніг ікі тӧӧй торт тимнирге киректелген (пірсін чарғыҷылар амзааннар, ікінҷізін – аалҷылар). Финалны иртірерге спонсорлар хабасханнар: ах хайахты «Сибирь СПК» ООО пирген, талғанны – идінҷек Павел Боргояков, унны – идінҷек Евгений Соколовский, нымырханы – Ағбан пилтіріндегі хус фабриказы. 

«Ӱстӱнзархы Сибирьнің иң ус кондитері-2023» марығ ӱс кӱн парған. Ол арада мастер-класстар ирткеннер.

Салтарлар иділгенде, орыннар піди ӱлестірілгеннер: 1 орын – Елена Максимова, 2 орын – Анастасия Березовская, 3 орын – Анна Семилетова.

– Прай торттар сіліг, тадылығ пол­ғаннар. Ӱр паза хазыр ӱзӱріг соонаң чар­ғыҷылар чиңісчілернің аттарын адап пиргеннер. Марығҷыларның баллары удур-тӧдір тың пасхалалбааннар, анна­ңар кемнің торты иң чахсы, кемни сала уйан  полғанын чоохтап таа полбас­пыс. Прайзын алғыстапчам! – таныхтаан марығның тӧстегҷізі, «КФХ паза АПК Сибири» пірігістің толдырығ­лығ директоры Андрей Попков.