Пӱӱл Илбек Ада чаадағы Чиңiстiң 78-ҷi чылы таныхталча. 8 паза 9 майда Ағбанда ағаа чарыдылған пайрамнар иртчелер. Оларны iкi кӱн иртiрерi кибiрге кiр тее парған. Пастап оларны 9 Майда ла иртiрҷең полғаннар. Че iди Пастағы май ачығындағы митингті, пайрамнығ маршты паза Чиңiс паркындағы Хумартхылас ритуалын прайзы ла кöрiп аларға маңнанмаҷаң, аннаңар оларны алынҷа кӱннерде иртiрерiнеңер чарадығ алылған.

        

Мындағ оңдайнаң 8 майда Чиңiс паркында Успас от хыринда Хумартхылас ритуалы ирткен. Иң пурун Хакасия пазы Валентин Коновалов, Илбек Ада чаа чыллары пазылған гранит плиталарынзар чахайахтар салып, Чааҷылар сабланызы мемориалзар пастырған. Успас от хыринзар порчоларны салып, ööн венокты турғысхан. Хумартхылас ритуалын аннаң андар Хакасияның Ööркi Чöбiнiң кнезi Владимир Штыгашев, Илбек Ада чаа ветераннарының пархалары, тыл iстенҷiлерi паза чаа палалары узаратханнар.

        

Пайрамнығ мероприятиеде iдöк Ағбанның пазы Алексей Лемин, городтың депутаттар чöбiнiң кнезi Альберт Тупикин, Россия президентiнiң Сибирьдегi федеральнай округтағы полномочнай кiзiзi аппарадының Хакасияҷа ööн федеральнай инспекторы Николай Холодов, Ағбандағы гарнизонның пастығы, полковник Андрей Баринов, республика правительствозының, кӱс министерстволарының паза ведомстволарының устағҷылары паза тоғынҷылары араласханнар. Iдöк Хакасияның иң улуғ предприятиелерiнiң, халых пiрiгiстерiнiң кiзiлерi полғаннар.

        

Веноктар паза чахайахтар салыл парғанда, Илбек Ада чаа хорылыстарының араласчыларын сағысха кирiп, пiр минута сым турары чарлалған. Ағбандағы гарнизонның чааҷылары, салют иртiрiп, автоматтардаң киизер ӱс хати атханнар. Россия паза Хакасия гимннерi ойнаан соонаң чуртағҷыларға Чааҷылар мемориалынзар чахайахтар салар оңдай пирiлген.