АҒБАН БЮДЖЕДІ ӰЧӰН ПАСТАҒНАҢ СЫХХАН
12.05.2023
Хабарлар
Ӧӧркі Чӧп. Хакасияның Ӧӧркі Чӧп кнезі Владимир Штыгашев президиум чыылиин иртірген
Ӧӧркі Чӧп президиумы пу чыылығда «Хакас Республикадағы орындағы бюджеттерзер тӧлеглернің пірге нормативтерінеңер» республика законынзар алызығлар кирчеткен закон проектін ӱзӱрібіскен. Ағбан городтың Депутаттар чӧбі кирген закон проектінең аның кнезі Альберт Тупикин таныстырған. Хайди ол таныхтаан, 2023 чылның 1 январьынаң пірге налог тӧлее кирілген сылтаанда, город налогтарҷа парыстарын чідір салған.
Іди январь-февраль айларда Ағбанның бюджедінзер налог ахчазы кірері ікі хати хызырылтыр. Хакасияның аймахтарында кирек сах андағох осхас. Кірчеткен ахча бюджетниктерге чал ахчазын тӧлирге дее читпинче тіп таныхтаан Альберт Тупикин.
Пастағда орындағы бюджеттерзер НДФЛ-даң тӧлеглернің хоза пірге нормативін 10 % синінде турғызардаңар чоох парча. Чарыда чоохтаза, республика бюджедінзер парчатхан НДФЛ налогын муниципальнай бюджеттер аразында ӱлестірері кӧрілче. Іди муниципалитеттер бюджеттерінзер хоза 1,18 миллиард салковай кирерлер тіп кӧрілче, ол санда Ағбан городтың – 585 миллион салковай.
Че пір чирде ӧскірілчетсе, пасха чирде хызырылча. Аннаңар пу сурығҷа ам даа тоғынарға кирек тіп таныхталған чыылығда. Кӧзідімге, Саяногорск паза Таштып аймаа пу пастағдаң тоғыр осхастар. Аннаңар президиумдағылар закон проектіне республика правительствозы хайдағ паалағ пирерін кӧрерге кирек тіп таныхтааннар.
– Закон проекті Ағбанға ла теелбинче, прай муниципалитеттерге теелче, – салтар иткен Владимир Штыгашев. – Аннаңар пу сурығны чахсаан ӱзӱрібізерге кирек.
Таныхтирға кирек, амғы законҷа НДФЛ-даң 10 % хоза тӧлег аалларның бюджеттеріне ле кӧрілген. Андағ оңдайнаң, Ағбан амғы туста Бюджет кодексі хоостыра НДФЛ-даң 15 % ахча кирчеткен полза, закон проекті алыл парза, Хакасияның ӧӧн городы республика бюджедінең алчатхан тӧлегні 25 %-ке теере ӧскіріп алар.
Закон проектінде хайзы читпестер пар сылтаанда, аны президиумның теестегі чыылиина артыс салғаннар. Читпестер тӱзеділген соонаң закон проекті сессия ӱзӱриине сығарылар тіп кӧрілче. Ол тусха Хакасия правительствозының ӱндезии тимнел парарға кирек.
Ӧӧркі Чӧп президиумы ідӧк пасха регионнарның закон сығарҷаң пастағларына паза айланыстарына хабазар сурығларны ӱзӱрібіскен.
Кӧзідімге, Ленинград облазының депутаттары, административнай сайбағлардаңар кодекссер алызығлар киріп, наркотиктерҷе пропаганда апарчатханнарны административнай нандырыға тартар оңдайларны тыыдар пастағнаң сыхханнар.
Чоох парча туралар тастында (фасадында) граффити хоостарын алай танығларны хоостап, наркотиктерні хайда алып алардаңар кӧзітчеткен искіріглердеңер. Амғы законодательствоҷа андағ искіріг рекламаа алай пропагандаа саналбинчаттыр. Аннаңар авторлар наркотиктерні алып алар орыннардаңар кӧзітчеткен искіріглерні таратчатхан ӱчӱн, хатығлаҷаң алынҷа положение кирібізер паза хатығластарны тыыдыбызар чӧпнең сыхчалар. Президиум ол пастаға хабазарға чаратхан.
Ідӧк Адыгеяның Хазна Чӧбі – Хасэ депутаттарының Хазна Думазынзар кічіг кредиттерні (микрозаймнарны) заемщик чох пирбин турарын кирердеңер айланызына хабазарға чарадығ алылған.
– Айланысха хабасчабыс, – таныхтаан Владимир Штыгашев. – Хаңыртханнарның саны онарлап муңа читче, ӧӧнінде пенсионерлер хыйалға кір парчалар.
Автор :
Альберт ТОЛМАШОВ
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
