ПРАЙ ХАЛЫХ ЧОН ӰЛӰКӰННІ ТАНЫХТААН
12.05.2023
Хабарлар
Подполковник Владимир ВОРОНОВ полковник Андрей БАРИНОВХА гарнизон маршха тимдезінеңер рапортнаң искірче
Илбек Чиңіс. Ағбанда Илбек Ада чаадағы Чиңістің 78-ҷі чылына чарыдылған пайрамнығ марш ирткен. Анда Хакасияның устаа, правительство кізілері, ветераннар, чааҷылар, халых пірігістерінің кізілері араласханнар
Ізіг кӱннер турыбысханда, Ағбанда улуғ-кічіглер иртеннең Пастағы май площадьынзар чыылысчатханнар. Анда илбек ӱлӱкӱнні таныхтирға, пайрамнығ марш иртірерге прай ниме тимде полған. Правительство туразы алнында улуғ cцена, аның ікі саринда паза аннаң тоғыр трибуналар турғыс салтырлар. Трибуналарда Илбек Ада чаа ветераннары, тыл істенҷілері, чаа палалары, кизек чаалазығларда араласхан ветераннар одырчалар. Прайзының даа кӧксілерін аймах орден-медальлар чазапчалар. Площадь ибіре тимір сиденнер турғызылых, анда олаңай кӧрігҷілер пайрамнығ мероприятие пасталарын сағыпчалар. Улуғ ікі экранда площадьта ниме полчатханын кӧріп аларға чарир.
Илбек Ада чаадағы Чиңістің 78-ҷі чылына чарыдылған митингті асхан Хакасия пазы Валентин Коновалов.
– Аарлығ піcтің ветераннар, тыл істенҷілері, чаа палалары! Алғыс сірерге хаҷанға даа, пу чир ӱстӱн ал халған ӱчӱн сірернің алныңарда пазыбыс тӧбін тӱзірчебіс! Кем, Чиңісті чағыннадып, фронтта чааласхан, тылда істенген. Алғыс генералларға паза рядовойларға, махачы партизаннарға, станоктар кистінде, улуғлар чіли, тоғынған оолахтарға паза хызыҷахтарға. Пала таап, оларны хайраллап халған ипчілерге, халастың халғанҷы кизегін иркеҷектерге пирген улуғ частығларға.
9 Май – улуғ, пайрамнығ ӱлӱкӱн! Ол полған на сӧбіреде миллионнар кічіг ӱлӱкӱннердең пӱтче, аннаңар ол андағ улуғ. Пӱӱн Чир-суубыстың орамаларында, чиңісчілерні чеестеп, айдас парадтар иртчелер. Анзы сын полар! Миллионнар тураларда столға фронттағы чӱс граммны турғызарлар, стакан ӱстӱне хара халас кизегін саларлар. Анаң, прайзын адап, сағысха кирерлер полған на кізіні. Прайзын сағысха кирерлер, кемнің махачызын сарыннарда сабландырчабыс паза кем сағба чох, махачызын кӧзітпин, орденнер чох парыбысхан. Олар прайзы піске сын матырлар полчалар! Матырларыбысты піс хаҷан даа ундутпаспыс.
Пу кічиҷек чир ӱстӱнде кічиҷек кізі чуртаан. Аның службазы кічиҷек полған, андағох кічиҷек портфельі полған, кічиҷек чал ахчазын алҷаң... Пірсінде иртен аның кӧзенегінзер улуғ нимес пілдірген чаа тохладыбысхан... Ағаа кічиҷек автомат пиргеннер, сапогтар андағох кічиҷек. Кічиҷек каска паза сині кічиҷек шинель пиргеннер. ...Хаҷан ол аңдарыл парған, сіліг нимес, хомай, атакаа парчатхан хысхырыста ахсын азып, – прай чир ӱстӱнде оолның прай сынына киртерге мрамор читпин парған.
Совет чааҷызына сабланыс! Чир ӱстӱн нацизмнең ал халған кізілерге сабланыс! Матырларның чолын пазып, холда тирігліг оларның хумартхызын арачылапчатханнарға сабланыс! Чиңісчі чонға сабланыс! Прайзын Илбек Чиңіс кӱнінең! – чооғын тоосхан Хакасия пазы.
Хакасия пазы Валентин КОНОВАЛОВ паза
Ӧӧркі Чӧп кнезі Владимир ШТЫГАШЕВ гимннер толдырылчатхан туста
Россияның паза Хакасияның гимннері толдырылған соонда республиканың Ӧӧркі Чӧп кнезі Владимир Штыгашев ідӧк чооғын алғыстас сӧстерінең пастаан:
– Хакасия Ӧӧркі Чӧбінің паза позымның адынаң Чир-суубыстың прай арачылағҷыларын паза тыл істенҷілерін улуғ ӱлӱкӱннең алғыстапчам! Оларның махачы тудынызын піс хаҷан даа ундутпаспыс. Хакасияның полған на ӱзінҷі чуртағҷызы фронтсар парыбысхан, чарымы аннаң айланмаан. Кӧзідімге, чаа тузында Киргизияда ӱс миллион кізі чуртаан, чаадаң 35 муң кізі айланмаан. Пістің чирібістің чідіріглері андағох полған, уғаа кӧп чуртағҷыбысты анда чідіргебіс. Амды чоныбыстың санын кӧптелдірерге кирекпіс.
Хакасияда чаа теелбеен сӧбіре чоғыл, полғанының на кізілерін апарыбысхан. Пу кӱннерде пістің чааҷыларыбыс Украинада иртірілчеткен ӧнетін чаа операциязында нацизмнең тоғыр чааласчалар, Донбасстағы чонны арачылапчалар, тархында ол Россия чирлері полған. Піс прай Запад ӧмезінең, «алтын миллиардтаң» тоғыр кӱресчебіс, сынны айландырар ӱчӱн. Чиңіс алғапчабыс Ада чир-суубыс арачылағҷыларына, оң ползын сірерге! Улуғ ӱлӱкӱннең алғыстапчам прайзын, чиңіс тударыбысха ізенчебіс. Западты чиңіп алары оой полбас, че чиңіс пісти полар! Ӱлӱкӱннең!
Владимир Николаевич чооғын тоосханда, пір минута сым турары чарлалған.
Анаң пайрамнығ марш пасталған. Площадьсар парад кип-азахтығ чааҷылар cтроевой хаалағнаң Россияның флагын паза Чиңіс знамязын (хобырғанын) ағылғаннар. Площадьта cтройнаң чааҷыларның, кӱc cтруктураларының, кизек чаалазығлар араласчыларының, юнармеецтернің, кадеттернің паза студенттернің расчёттары турыбысханнар. «Смирно!» команда пирілген, маршнаң устапчатхан подполковник Владимир Воронов Ағбанның чаа гарнизонының пастығы полковник Андрей Бариновха гарнизон маршха тимдезінеңер рапортнаң искірген.
Андрей Баринов, полған на расчётсар cтроевой хаалағнаң пастырып, изеннезіп, оларны Илбек Ада чаадағы Чиңістің 78-ҷі чылынаң алғыстаан. Олар ағаа ӱзер хати «Ура!» хысхырып нандыр турғаннар. Прайзын изере алғыстаан соонда пайрамнығ марш пасталған.
Пастап механизированнай колоннада ретроавтомобильлер ирткеннер. Олар Илбек Ада чаадағы фронттарның штандарттарын апарғаннар, кузовтарында чаа тузындағы кип-азахтығ чааҷылар турғаннар. Россияның флагын паза Чиңіс знамязын апарчатхан ӧмеде Пирятин дивизиязы полктары знамяларының хобырғаннары полғаннар. Познанскай тимір чол бригадазының ӱс расчёды парған. Анаң изере – зенитнай ракеталығ бригаданың ӱс расчёды, «Боевое братство» пірігістің паза СВО араласчыларының расчёды, юнармеецтернің ікі расчёды, ХТИ-ның паза ХГУ-ның чаа кафедразының ікі расчёды, УФСИН-ның спецназы паза офицерлері ікі расчётнаң ирткеннер. Иң соонҷа республиканың ат спорт школазының чалаңнары парғаннар.
Тиксі алза, пайрамнығ маршта 900 азыра кізі араласхан. Мыннаң Пастағы май площадьында пайрамнығ мероприятие тоозылған. Хакасия пазы, Илбек Ада чаа ветераннарынаң паза тыл істенҷілерінең тоғазып, оларны Илбек Чиңіске хозым иткен ӱчӱн алғыстаан.
Чиңіс кӱнінде артисттер
паза чайаачы ӧмелер чонны концерт программазынаң ӧріндіргеннер
Че ӱлӱкӱн мыннаң на тоозылбаан, республиканың театрлары, РДК тоғынҷылары, чайаачы ӧмелер город чуртағҷыларын паза аалҷыларны улуғ концерт программазынаң ӧріндіргеннер. Чиңіс кӱніне чарыдылған культура программазы пайрамнығ салютнаң тоозылған.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде