ЧОНЫБЫС ЧОБАА ПАЗА ӦРІНІЗІ
12.05.2023
Хабарлар
Хумартхылас стенезі хыринзар чахайахтар паза веноктар салчатхан туста
Чиңіс кӱні тиксі хазнада алғым таныхтал парған, ол санда Асхыс аалда митинг-концерт мемориал комплексі алнында ирткен
Пайрам колонналар чӧрізінең пасталған. Асхыстағы учреждениелер тоғынҷылары, ЗАГС туразы хыринаң сығып, ӧӧн пайрам ирткен орынзар читкеннер. Ол туста прай аалға чаадаңар сарыннар ойнадылған.
Асхыс аймаанда Илбек Ада чаа ветераннары халбаан, че чуртапчалар оларның палалары. Тынағдағы ӱгретчі Александра Карташова Асхыссар Иркутск облазынаң килген. Пабазы фронтха парчатханда, ол ӱс ле частығ полған. Аның таниинаң, чаа палаларының олған тузы чох таа полған. Олар улуғларнаң тиңе тоғынғаннар. Аның ӱчӱн оларға халас пирҷеңнер. Илбек Чиңістеңер сағба читкенде, ӧрінгеніне прайзы ылғаан. Асхыс аймаанзар кӧскенде, Александра Ивановна Калининдегі школада тоғынған.
Митинг-концертті диктор Юрий Левитанның ӱні асхан. Ол фашист войсколары унадыл парғаннаңар, Германияның капитуляциязынаңар искірген. Асхыс аал чуртағҷыларын паза аалҷыларын алғыстирға Абрек Челтыгмашев сыххан:
– Аарлығ чир-суғҷылар! Пӱӱн прай Асхыс пу ачыхта чыылыс парған. Піс пӱӱн ағаларыбысты, пабаларыбысты сағысха кирчебіс. Олар, Илбек Чиңісті чағыннадып, махачы чааласханнар. Пу пайрам Россия чуртағҷыларына иң аарлығ полча. Аймахтың чуртағҷыларына амыр чуртас алғапчам. Ол чыллардағы хорылыстар хазнабыссар паза айланмазыннар.
Хакасияның национальнай паза территориальнай политика министрі Лев Сафьяновтың сӧстерінең, ол хорғыстығ чыллар хаҷанох ирт парған полза даа, палығлар ам даа чӱреебісті cыстатча. Чиңіс кӱні чир-суубысты арачылаан кізілернің махачызының тании полча. Ол – пурунғыларыбыстың сабланызын кӧдіреріне, илбек Россияны арачылирына паза чаа чох тилекей ӱчӱн кӱрезіге хыйғы. Фашизмнең тоғыр аймах нациялығ чон кӱрескен. Че пӱӱн тилекей пазох алысча. Ағаларыбыс тилекейні фашизмнең арачылааннар, амды чааҷыларыбыс нацизмнең тоғыр кӱресчелер. Аннаңар піске пірге тудынарға кирек.
Асхыс аймааның депутаттар чӧбінің кнезі Александр Челтыгмашевтің таниинаң, сілкер айының 9-ҷы кӱні – Россияа паза полған на сӧбірее улуғ кӱн. Ол прай чонны піріктірче. Илбек Ада чаа – пістің пірге палиибыс, Илбек Чиңіс – пірге ӧрінізібіс. Пӱӱн, онарлап чыл ирт парған даа полза, піс полған на чааҷының махачызын улуғлапчабыс, пістің хазнабыс ӱчӱн турысхан паза чонның чуртасха правозын арачылаан кізілерні сағысха кирчебіс.
– Минің тай пабам Фёдор Егорович Боргояков Япониядаң тоғыр чаалазығның араласчызы полған. Че ол тусты сағысха кирерге хынмаҷаң. Чиңіс кӱні прай чоныбыстың палии полча. Пабабыстың, ағаларыбыстың махачызын ундутпасха кирекпіс, че олох туста чӱреебіс ағырарға кирек. Чаа – кізілернің ирееленізі, – таныхтаан Ӧӧркі Чӧп депутады Роман Челтыгмашев.
Ідӧк пайрамда чоох тутхан Хакасияның Улуғлар чӧбінің кнес орынҷызы Виктор Чепчигашев. Алғыстас сӧстері соонаң устағҷылар Хумартхылас стенезі хыринзар чахайахтар салғаннар.
Илбек Чиңіс пайрамында прай Асхысча чаадаңар сарыннар чайылған. Асхыс аал учреждениелерінің тоғынҷылары аразында стройнаң чӧрерінҷе марығ ирткен. Чиңісті Асхыстағы М.И.Чебодаевтің адынаң лицей-интернат тутхан. Паза пайрамда Асхыстағы учреждениелер «На привале» марығда араласханнар. Тоғынҷылар Илбек Ада чаа тузын кӧзіт пирерге кӱстенгеннер. Анда «Тирегес» олған сады чиңіcчі полыбысхан.
Илбек Чиңіс пайрамында, матырларны хумартхылап, пір минута сым турары чарлалған. Ӱлӱкӱн Чиңіс салюдынаң тоозылған.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы