ХАЗНА ТАРХЫНЫНДА САҢАЙҒА ХАЛАР
Ӧрт ӱзірҷеңнернің Таштып аймаандағы пӧлиинің устағҷызы Виталий БОРГОЯКОВ – парадтың аарластығ араласчыларының пірсі
Сілкер айы соохтарнаң, харнаң, чиллернең ӱрӱктірген, че Таштыптағылар ӱлӱкӱнні хайдағ даа кӱнде пайрамнирға тимде полғаннар
Че Чиңіс кӱні Таштып аал чуртағҷыларын чалахай, чылығ хылиинаң ӧріндірген. Аймах-пасха ӧмелер 10 час иртен спорткомплекс хыринда улуғ колоннаға турыбысханнар, ол пір километрге сӧӧлін парған чіли пілдірген. Флажоктыг, шариктіг, чаламалығ чон, команда пирілгенде, Чиңіс паркы саринзар пастыр сыххан: администрация, прокуратура, полиция, банктарның, имнег туразының, школаларның паза пасха даа организациялар тоғынҷылары, политика партияларының кізілері, кічіг палалығ іҷелер... Андағ кӧп кізі Чиңіс кӱнінде ле чыылча, неке. Ниме ӧріністіг? Оларның аразында кӧп олған кӧрінген! Кічігдең сығара оларны пу улуғ кӱнге кӧніктірзе, олар, ӧс парза даа, аны паза чааҷыларны, хайзылары чуртастарын пістің ӱчӱн пирібіскеннер, улуғлирлар.
Ӱлӱкӱнге чарыдылған митинг «Помним сердцем» адалған. Чыылған чонны пастыхтар, депутаттар алғыстааннар. Чуртағҷыларнаң хада олар, чаада чат халған чааҷыларны сағысха киріп, Успас от хыринзар тіріг чахайахтар салғаннар.
Илбек Ада чааға Таштып аймаанаң 8543 кізі парыбысхан, 3086 кізі айланмаан. «Совет Союзының Матыры» атты ӱс кізі алған, чаа орденнерінең паза медальларнаң ӱс муң азыра кізі сыйыхтатхан. Чаа тузындағы халых істеніс ӱчӱн («За доблестный труд в годы ВОВ») медальлар 3740 кізее читірілген!
Тиксі пис чылға Илбек Ада чаада 27 миллион кізі чат халған, 14 муң кізі кӱннің сай... Хорғыстығ саннар!
Митинг соонаң чон Таштып аймааның Культура туразынзар «Салют и слава Великой Победе» концертке чыылысхан. Сценарий хоостыра чааҷы Василий Тёркин амғы туста пол парча, анзын чахсы сағынып алтырлар, ойын аразында чайаачы ӧмелер сіліг номерлернең сыхханнар.
Он час иирде таштыптағылар Чиңіс паркында «Хумартхы свечізі» чӧрімге чыылысханнар, анда ідӧк илееде чон араласхан. Чааға чарыдылған сарыннар, кибелістер толдырылғаннар. Кізілер, ӱреен чааҷыларны хумартхылап, кӧйчеткен свечілерні хумартхы тассар турғысханнар.
Кӱнӧрте Хакасияның Ӧӧркі Чӧп депутады Василий Шулбаев, Таштып аймаа пазы Николай Чебодаев паза Таштып аал чӧбі пазы Рустам Салимов Чиңіс кӱнінең тыл істенҷілерін алғыстааннар. Таштыпта 18 тыл істенҷізі – Клавдия Леонтьевна Грачева, Валентина Михайловна Грудева, Валентина Андреевна Камызакова, Дмитрий Григорьевич Медведев, Зинаида Георгиевна Медведева, Валентина Игнатьевна Потылицына, Евдокия Павловна Псарева, Ананий Николаевич Чучумаков, Мария Кирилловна Шейерман, Александра Георгиевна Юдина, Дарья Мироновна Яковлева, Евдокия Васильевна Алевская, Валентина Николаевна Бурнашова, Анна Фоминична Карамашева, Вера Александровна Никифорова, Александра Сергеевна Пырсикова, Вера Илеевна Сагалакова, Вениамин Прокопьевич Шулбаев.
Узах частарын чазапчатхан аға-ууҷаларның чуртастары тӧӧй нимес салыл партыр. Кемнің-де соонҷа туған-чағыннары кӧрче, кем-де саңай чалғызан халтыр. Хабазығ кирексіпчеткеннерге полызығ пирілер тіп молҷаан аймах пазы.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |