ТЕХНИКА НААҶЫЛАЛЧА
17.05.2023
Хабарлар
Аал хонии. Пӱӱл Хакасияда наа аал хонии техниказын аларына 200 миллион салковай кӧріл парған
Ирткен чылда республиканың хыраҷылары аал хонии техниказын чахсы нааҷылабысханнар. 2022 чылда ол пӧгінге 131 миллион салковай хорадылған, ол санда тыхтаға 6 миллион салковай.
Регион бюджеді хабазиинаң 23 трактор, тоңастығлар чығҷаң сигіс комбайн, 14 сапхы, тоңастығлар хурутчаң ікі комплекс, алты сеялка, 19 пресс-подборщик, пір фотосепаратор, алты культиватор, пис тырбос, сӱзӱн мал азиин тимнеҷең ікі оборудование, сӱт соотчаң оборудование алылған. Хорадығларның тиксі сині 299914072 салковайға тиңнелче. Хакасияның аал хонии паза ас-тамах министерствозы 131 миллион салковайға субсидия тӧлеп салған.
Пылтыр, чыл пасталғанда, техника паза оборудование паазы 30 – 50% ӧс парғаннаңар, наа техникаа субсидия регион бюджедінең позыдылған ахчаны ас парыбысхан. Аннаңар республиканың аал хонии паза ас-тамах министерствозы Хакасия правительствозынаң 150 миллион салковай, ол санда тыхтаға 6 миллион салковай, хоза ахча сурған.
Ирткен чыл салтарларынҷа, Хакасияның аал хонии предприятиелері паза фермалары 43 трактор, тоңастығлар чығҷаң 17 комбайн, мал азиин пилетеҷең пір комбайн, 36 сапхы, тоңастығларны хурутчаң тӧрт комплекс, 10 сеялка, 36 пресс-подборщик, ӱс фотосепаратор, 10 культиватор, 16 тырбос, 10 пысхырҷаң, сӱзӱн мал азиин тимнеҷең ікі оборудование, інек сағҷаң пір оборудование, сӱт соотчаң тӧрт оборудование, мал сохчаң модульлығ ікі пункт, тракторға ікі полуприцеп, тоңастығларның ӱреннерін таарыға тимнеҷең сигіс оборудование. 2022 чылда Хакасияның аал хонии паза ас-тамах министерствозы тиксі 281 миллион салковайға субсидия тӧлеп салған.
– Пӱӱл аал хонии техниказы рыногында кирек алысча. Хыдат техниказы паза оборудованиезі поставщиктерінең кӧп чӧп кірче. Анзы, иң пастап, хыраҷыларға техника алчатса, ахча ӱзӱрлеп аларға оңдай пирче. Кӧзідімге, «СибТрейд» фирма пӱӱл таарығ тузына хыра тоғыстарына тракторларны сыныхтағнаң тоғындыр кӧрерге тикке пирерге тимде, – теен Хакасияның аал хонии паза ас-тамах министрі Сергей Труфанов.
Пӱӱл фермерлер паза аал хонии предприятиелері 40 тракторны, яблах хасчаң пір комбайнны, 10 сапхыны, тоңастығларны ӱренге тимнеҷең сигіс оборудованиені, пір сеялканы, 16 пресс-подборщикті, пис культиваторны, ікі салданы, пір дискаторны, 10 порандыны, читі тырбосты, сӱзӱн мал азиин тимнеҷең ӱс оборудованиені, пір кӱннең тоғынчатхан чарытхы станциязын паза даа пасхазын аларға пӧгінчелер.
Автор :
Хакасияның аал хонии паза ас-тамах министерствозы
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
