ХАКАСИЯНЫҢ ӰГРЕДІГ СУРЫҒЛАРЫ ӰЗӰРІЛГЕН
17.05.2023
Хабарлар
Тоғазығ. Хакасия пазы Валентин Коноваловтың хығыртиинаң республиказар тоғыс чорығынаң Россияның Хазна Думазының депутады Олег Смолин кил парған
Ол, хабарҷыларнаң тоғазып, ӱгредіг киреене теелчеткен сурығларға нандырған. Олег Николаевич философия наукаларының докторы, профессор, Россияның ӱгредіг академиязының академигі, Хазна Думазының пӧзік ӱгредігҷе паза наукаҷа комитет кнезінің пастағы орынҷызы, тиксі Россияның «Ӱгредіг – прайзына» халых чӧрімінің кнезі, хазнабыстың харах чохтар пірігізінің вице-президенті полча.
– Мин тоғыс чорыхтарында толдырчатхан тоғызыбыстаңар, ниме килісче-киліспинчеткенінеңер чоохтирға паза кізілернің чӧптерін истерге кӱстенчем. Полған на сай андағ чорыхтардаң наа закон проекттерін тимнир наа сағыстарнаң айланчам, – чоохтаан ол.
Олег Смолин ӱгредіг сурығларынаң кӧп чыл айғас парир. Аның таниинаң, тиксі хазнабыста сидіксіністер чох регион чоғыл. Ӱгредігде, федеральнай бюджеттең ахча читкіҷе позытпаанда, чахсы саринзар алызығлар кир полбас. Че Хакасия оой нимес тустарда даа экономика саринаң тиліпчеткені, наа школалар пӱдірчеткені ӧріндірче. Полған на регион мындағ чидіглернең махтан полбас тіп таныхтаан ол.
Олег Николаевич пірге хазна сыныхтағлары иртірілчеткенінең тоғыр полча. Аның кӧрізінең, оларны саңай чох итпезе дее, школа тоосчатханнарға сыныхтағларны пу алай иргі оңдайнаң иртерін таллир оңдай пирерге кирек. Амғы туста ӱгренҷілернің илеедезі, тоғыс класс тоозып, ЕГЭ пазарынаң чалтанып, ортымах ӱгредіг заведениелерінзер кірче. Че олар соонаң пӧзік ӱгредіг аларға сағынчалар. Ағаа хоза, улуғ класстарда олғаннар ӱгретчілерінең хада, наа пілістер аларынаң айғаспин, пірге хазна сыныхтаана тимненчелер. Алызығлар кирерінеңер закон проекттері тимнелген, че олар чуртасха кирілбееннер тіп чоохтапча Хазна Думазының депутады. Ідӧк Олег Смолиннің таниинаң, пӧзік ӱгредіге кирілген Болонскай системаны чох идерге кирек. Аны хоостыра вузтардағы ӱгредігні бакалавриатха паза магиcтратураа чарыбысханнар. Че анзы пӧзік пілістіг специалисттер тимниріне пір дее туза ағылбаан тіп ӱлесче сағыстарынаң ол.
Паза тоғазығда ӱгретчілер чидіспинчеткенінең, іҷе-пабазы чох халған олғаннарға чурт пирілчеткенінең палғалыстығ сурығлар ӱзӱрілгеннер.
Хабарҷыларнаң чоохтасхан соонаң Олег Смолин паза Валентин Коновалов республикадағы техническай специальностьтарға ӱгретчеткен пӧзік паза ортымах ӱгредіг учреждениелерінің, хай пірее предприятиелернің устағ-пастаанаң тегілек стол иртіргеннер. Анда инженерлерні, тоғысчы специальностьтарны тимнирінең палғалыстығ сидіксіністер паза пу кӧстегҷе чахсы салтарлар кӧзіткен тоғыс оңдайлары ӱзӱрілгеннер.
Амғы туста ниме-ноо сығарызында пӧзік технологиялар тузаланылчалар. Ӱгредіг учреждениелері алнында пӱӱнгі кӱннің кирексіністеріне килістіре специалисттерні тимнир пӧгін турча. Хайди таныхтааннар ортымах ӱгредіг учреждениелерінің устағҷылары, халғанҷы тустарда республика саринаң оларға кӧп хайығ айландырылча, ахчалығ полызығ сині ӧзіп одырча. Ідӧк олар ӱлгӱ полызиинаң аймах гранттарда араласчалар, анаң ол ахчаа кирек оборудование алчалар, тыхтағ тоғыстарын иртірчелер.
Ағырсымнығ сурығларның пірсі – істеніс рыногында тоғысчы специальностьтығлар чидіспинчеткені. Предприятиелер техникум-колледж студенттерінең кӧстегліг ӱгредіге чӧптезіглер тимнеен ползалар, пу сидіксіністі пӧгерге полызарҷых тіп таныхтаан Валентин Олегович. Че оларның устағ-пастаа, амғы туста прай ниме табырах алысча тіп, ӱс чылға азынада мындағ чӧптезіглер идерге маңзырабинчалар. Аннаңар даа Хакасия правительствозында ӱр ниместе тоғысчы специальностьтарына тимнепчеткен ӱгредіг учреждениелерінің, министерстволарның, улуғ предприятиелернің кізілері кірчеткен хада-пірге тоғынар чӧп тӧстелген. Аның араласчылары адалған сидіксіністерні пӧгер оңдайлар табарға кӱстенерлер. Мындағ оңдайнаң сурыға хайығ айландырған сылтаанда, кирек чахсы саринзар алызарына ізеніс пар.
Автор :
Татьяна КЫШТЫМОВА
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
