КІЧІГ ААЛЛАРДА – УЛУҒ КИНО
19.05.2023
Хабарлар
Ӧрініс. Асхыс аймаандағы Сафьянов аалда «Сафьянов» халыхтарның орындағы пос устанызы ӧткін тоғынча, аймах гранттар марығларында араласча
Хайди таныхтаан «Сафьянов» ТОС-тың устағҷызы Ольга Доможакова, пу чылда пу пірігіс «Кино на службе культурного развития малых сел» грант мариинда утып алған. Іди Россия президентінің культура пастағлары чыындызынаң ағаа 500 муң салковайҷа пирілген. Гранттың пастағы чардығы толдырыл парған. «Сафьянов» ТОС кино кӧзідер тиріг паза одырчыхтар алып алған. «ТОС-тың тархыны» адал парған фильм сығарылған. Амды кічіг аалларзар кинотеатр кил парча.
Пу марығда аралазар сағыс Ольга Доможакованың кинетін не тӧрібеен. Ол Сафьяновта пір чыл чуртаанда, аалдағы чуртағҷыларға ӱтертістіг мероприятиелер иртірілбинчеткенін сизінген. Орындағы чииттер городсар, пасха аалларзар сыхпинчалар.
Амды «Сафьянов» ТОС-тың кізілері гранттың ікінҷі чардығын чуртасха кирчелер. Ӧӧн пӧгін – кічіг аалларда аймах частығларға фильмнер паза мультфильмнер кӧзідері. Кӧзідіглер тузында чуртағҷыларға аймах мастер-класстар иртірілчелер.
– Іди Кызлас аалдағы школа ӱгренҷілерінең паза чазы читкелектернің реабилитация кініндегі олғаннарнаң тоғасхам. Оларға Валентина Татарова чайаан «Магия чисел» ойынны иртіргем. Ол ойында полған на санның пілдірии кӧзіділ парған. Паза олғаннарға Сибирьде чуртапчатхан чоннарның мультфильмнерін паза хысхаҷах фильмнер кӧзіткем. Таныхтирға кирек, тува чонының хысхаҷах фильмнері уғаа сіліглер. Кӧзідімге, «Ызых аң» фильмде ибіркі чайаанны хайраллирдаңар кӧзіділче, – чоохтапча Ольга Петровна.
Ольга Доможакова 2021, 2022 чылларда Новосибирск городта Сибирьдегі чоннарның кинофестивальларын иртірген. Анда ас саннығ чоннар чайаачыларын кӧзіткеннер. Сағам Ольга Петровна ол фестиваль араласчыларының тоғыстарынаң тузаланча паза хакас режиссерларның фильмнерінең чонны таныстырча. «Сафьянов» ТОС Сыр, Хамыстығ паза Аев аалларзар чӧрген. Фильмнер кӧзідерінең пасха, олғаннарға «Минің Хакасиям» ӱтертістіг ойын иртірілген.
Хайди таныхтапча Ольга Доможакова, грант тоғызы кӱскӱзінзер толдырыл парар. Ол тусха «Сафьянов» ТОС Хакасияның прай кічіг аалларынзар чӧр килер. Че мыннаң тоғыс тоозылбас. Аалдағылар пасха даа сағыстарын чуртасха кирерлер.
Автор :
Антон ЧЕРТЫКОВ
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
