СӦП-САП СУРИИ ПӦГІЛБИНЧЕ
19.05.2023
Хабарлар
Харатас город пазының орынҷызының тоғызын толдырчатхан
Максим ЧЕРНЫХ, Хакасияның пӱдіріг паза ЖКХ министерствозының
чурт сыныхтаа департаментінің устағҷызы Дмитрий КОМАРОВ
Чыылығ. Хакасияның правительствозында реcпублика пазының орынҷызы Юрий Курлаевтің устаанынаң похсах суриина чарыдылған чыылығ ирткен, анда муниципальнай пӱдістернің пастары араласханнар
Халғанҷы чарым чыл республикада аал-городтардаң похсахты сығара тартарынаң сидіксіністер пар. Алында ирткен чыылығларда «АЭРОСИТИ-2000» регион операторы сӧп-сапты чығҷаң орыннар паза машиналар чидіспинчеткеніне, похсах контейнерлері киліспинчеткеніне сылтанған. Амды аның тоғызына ниме харығ полчатханын піліп алар ӱчӱн, чыылыға «АЭРОСИТИ-2000» ООО-ның республикадағы пӧлиинің директоры Ромуалдас Янушкявичюс хығыртылған.
– Халғанҷы чарым чыл регион операторының тоғызын хайығда тутчабыс. Анзына кӧп сылтағ пар. Прокуратура паза пасха даа сыныхтағ органнары сыныхтағлар иртірчелер. Че регион операторы тоғызын чахсыландырчатханын сизінминчебіс. Орджоникидзе паза Боград аймахтарынаң айланыстар кіргеннер. Боград аймаанда регион операторы чахсы тоғынған полза, анда даа кирек алыс парған. Республиканың аал-городтарында полза, сӧп-сап сурии алыспаанын сизінерге чарир. Чуртағҷылардаң хоптар кӧп кірче. Халғанҷы чыылығда регион операторына транспорт санын ӧскірерінҷе, тоғыс графигін тимнирінҷе чӧп пирілген. Часхыда паза кӱскӱде похсахты тузында сығара тартарынаң уламох сидік полча. Пӱӱнгі кӱнге («АЭРОСИТИ-2000» ООО) ыраххы ааллардаң на нимес, че ідӧк городтардағы кӧп квартиралығ туралар хыринаң похсахты тузында сығара тартпинча, – теен Юрий Курлаев.
Хакасия пазының орынҷызы таниинаң, амғы туста республика правительствозы полигоннар тӧстирінең, инфраструктура тилізінең айғасчаң предприятие тӧстир сурығны ӱзӱрче. «АЭРОСИТИ-2000» ООО мыннаң мындар тоғызын чахсы толдырбаза, наа тӧстелген предприятие регион операторына турғызылар. Ідӧк похсахты алынҷа чарчатхан завод пӱдіриинҷе проект тимнелче.
Абаза городта ла сӧп-сапты сығара тартарынаң сидіксіністер чоғыл. Город пазы Валентина Филимонова пу тоғыс хайди апарылчатханнаңар чоохтап пирген. Похсахты сығара тартарға машина кил полбинчатса, городтың устағ-пастаа подъездтерде анзын искірчеткен чарлағлар іл салча. Че мындағ кирек удаа полбинча. Сӧп-сапты тартар график тимнел парғаннаңар, чурт ээлері машина хаҷан килерін маңат пілчелер. Че ӧӧн сылтағ – ол нандырығлығ перевозчик. Республиканың пасха городтарында паза аймахтарында регион операторы тоғызын толдыр полбинча.
Пӱӱл муниципальнай пӱдістерде похсах чайылчатхан орыннарны арығлирына 22 миллион салковай позыдылған, ол санда Таштып аймаана – 10 миллион салковай, Пии аймаана – 5,5 миллион салковай паза Боград аймаана – 6,5 миллион салковай. Че Боград аймаанда ла похсахты арығлирына чӧптезіг иділ парған. Пии аймаана контейнерлерні аларына ахча пирілген.
Хакасияның чир-чайаан ис-пайы паза экология министрі Владимир Лебедевтің чооғынаң, 2023 чылда министерствозар алынҷа туралар чуртағҷыларынаң похсах тузында cығара тартылбаанына чарыдылған 41 хоп кірген. Пос устаныс органнарына регион операторы ам даа нандырығ пиргелек.
– Пӱӱнгі кӱнге Ағбан, Харатас городтар паза Алтай аймаа алынҷа тураларның похсах чығҷаң контейнерлерін муниципальнай реестрзер кир салғаннар. Регион операторы, тізең, ол контейнерлердең похсахты сығара тартарға ынабинча. Аннаңар ол Ағбандағы чарғызар контейнерлер законны хыйыстырып, муниципальнай реестрзер кирілгеннер тіп айланған, – таныхтаан Владимир Лебедев.
Кӧрік айының пастағы кӱнінең сығара хосхар айының 10-ҷы кӱніне теере Хакасияның чир-чайаан ис-пайы паза экология министерствозы «АЭРОСИТИ-2000» ООО республикада похсахты сығара тартарынҷа тоғысты хайди толдырчатханын сыныхтаан. Аны хоостыра мындағ сайбағлар ілезіне сығарылғаннар: чуртағҷыларның, юридическай лицоларның айланыстары, хоптары хоостыра сурығларны тузында пӧкпинчеткені, cӧп-сапты тузында сығара тартпинчатханы. Регион операторына сыныхтағның акты пирілген, сайбағларны чох идеріне сизіндіріглер ызылғаннар паза сілкер айының 25-ҷі кӱніне теере сайбағларны чох идібіскеннеңер искіріг ыс пирерге чахығ пирілген.
Хакасияның пӱдіріг паза чурт-коммунальнай хоных министерствозының чурт сыныхтаа департаментінің устағҷызы Дмитрий Комаровтың чооғынаң, пӱӱл кӱрген айында «АЭРОСИТИ-2000» ООО тоғызын читіре толдырбинчатханы хоостыра департаментсер чуртағҷылардаң 45 айланыс кірген, азығ айында – 32 айланыс, кӧрік айында – 14, хосхар айында – 83, сілкер айында – 35. Чурт сыныхтаа департаменті регион операторына 42 сизіндіріг пирген, ол санда алынҷа туралар хыринаң похсахты сығара тартпаанынаң палғалыстығ 32 сизіндіріг. Ағбан городтағы алынҷа тураларның 15 муң контейнері паза Харатастағы алынҷа тураларның 12 муң контейнері муниципальнай реестрзер кирілгеннер. Че регион операторы ол контейнерлердең сӧп-сапты сығара тартарынаң айғаспасха кирек тіп санапча. Пу сидіксініс городтарда ла нимес. Кӧзідімге, Московскай аалдаң похсах хосхар айының 17-ҷі кӱнінең сығара тартылбаан. Сылтағ – регион операторының транспорт чидіспинчеткені.
Хакасияның город-аймахтарының устағ-пастаа сӧп-сап киреенеңер искіргеннер. Ағбан городтағы Полярнай, Индіркі Согра паза «Центральнай» микрорайоннарда похсахты тузында сығара тартарынаң сидіксіністер пар. Алынҷа тураларның ээлері, регион операторының машиналарын сағып полбин, постары машиналар, таап, чаллапчалар. Кӧп квартиралығ туралар хыриндағы сӧп-сапты сығара тартарынаң ідӧк сидіксіністер пар. Похсах тузында сығара тартылбинча. Регион операторы диспетчерлерінең, тізең, палғалызар оңдай чоғыл. Олар телефон албинчалар.
Харатас городта алынҷа туралар хыринаң похсах сығара тартарынаң сидіксіністер пар. Сілкер айында ікі неделя аразына чуртағҷылардаң 18 хоп кірген. Городтың устағ-пастаа сидіксіністі регион операторы полигонға алымнығ полчатханынаң палғалыстырча. Кӱрген айының пастағы кӱнінде алым 5 миллион салковай полған полза, амды алым 7,2 миллион салковайға чит парған.
Ааллардаңар чоохтаза, иң сидік кирек Пии аймаанда. Аалларның кӧбізінде сӧп-сап чығҷаң орыннар чоғыл.
«АЭРОСИТИ-2000» ООО республикадағы пӧлиинің директоры Ромуалдас Янушкявичюс похсахты сығара тартар сидіксіністің сылтағларынаңар чоохтаан, ол санда техника чидіспинчеткені паза тариф син парғаны. Кирек чахсы саринзар алызарына ол пір дее молҷағ пирбеен.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы