ӰРЕЕН ЧААҶЫЛАРҒА – ХУМАРТХЫ ТАС
19.05.2023
Хабарлар
Сыйыхтас. Хакасия пазы Валентин Коновалов ӧнетін чаа операциязында чуртазын пир салған пис чааҷының сӧбірезіне сыйыхтар читір пирген паза прай СВО-да ӱреен чааҷыларға хумартхы тас турғызыларынаңар чарлаан
Сыйыхтарны читірері Россияның паза Хакасияның гимннері толдырылғанынаң пасталған. Махачы тудынып, чуртастарын пир салған чааҷыларны хумартхылап, чыылығ араласчылары пір минута сым турғаннар.
Россия президентінің чахиинҷа махачызы, посты айабин, чааҷы долгын толдырған ӱчӱн Мужество орденіне ӱреен соонаң турысханнар: 34 частығ кічіг сержант Александр Атанаев, 36 частығ рядовой Иван Карасёв, 23 частығ ефрейтор Евгений Макович, 47 частығ рядовой Александр Сыркашев паза 41 частығ улуғ прапорщик Вячеслав Кызин.
– Сірернің хада хонғаныңар, пабаңар, оолғыңар, харындазыңар аарластығ чолны таллап алғаннар – Ада чир-суун арачылирға. Олар, иң аарлығ нимені – чуртасты – пиріп, улуғ чееснең чааҷы долгын толдырғаннар. Піс оларның махачыларына поғдархирбыс паза оларны хаҷанға даа ундубаспыс. Амыр чуртас ӱчӱн турысчатхан Россия чааҷыларына хаҷанға даа хумартхылас паза сабланыс ползын! – ӱреен чааҷыларның туған-чағыннарынзар айланған Валентин Коновалов.
Хакасия пазы республиканың ӧӧн городында ӧнетін чаа операциязының пӧгіннерін толдырчадып ӱреен чир-суғҷыларыбысха чарыдылған хумартхы тас азар пастағнаң сыххан:
– Ӧнетін чаа операциязының пӧгіннерін толдырчатханда ӱреен прай чир-суғҷыларыбысха хумартхы тас турғызарынаңар сағыс хаҷанох тӧреен. Аны пӱӱл чуртасха кирерге кирекпіс тіп санапчам. Чуртастарын пир салған чир-суғҷыларыбыс Илбек Ада чаа тузында Ада чир-суубысты арачылаан матырларнаң тиң турчалар. Ол орынзар полған на кізі кил полар паза чааҷыларыбысты, оларның махачыларын сағысха кир турар.
Чир-суубыстың амыр тигірі ӱчӱн кӱрезігде чуртастарын пир салған чааҷылар алнында піс айландыр полбас ӧдістігбіс. Оларның махачызын сағыста хайраллирға паза тӧлдең тӧлге читірерге – пістің улуғ киреебіс.
Хакасия пазы Валентин Коновалов республиканың культура министерствозына ӧнетін чаа операциязында чуртастарын пир салған Россия чааҷыларына хумартхы тастың проектін тимнирге паза Ағбан город устағ-пастаанаң хада-пірге аны турғызар орынны кӧр саларға чахаан, финанстар министерствозына – тоғыстарға ахчаны республика бюджедінең позыдарға.
– Пӱӱл хумартхы тас азыларға кирек, – хайығ айландырған регион устағҷызы.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы