ОЛЕГ АРТЕМЬЕВ: «ХАКАСИЯНЫҢ ПОЗЫНЫҢ ХАНТИГІРҶІЗІ ПОЛАРҒА КИРЕК»
19.05.2023
Хабарлар
Чапсых тоғазығ. Хакасия пазы Валентин Коноваловтың хығыртиинаң сілкер айының 16 – 18 кӱннерінде республикада хантигірҷі Олег Артемьев пол парған. Мында ол республика устағ-пастаанаң, халых чоннаң, студенттернең, ӱгренҷілернең тоғасхан. Ідӧк орындағы хабарҷыларға аннаң чоох алызарға оң полған
Россияның Матыры Олег Артемьев ойнап чоохтанча: «Хантигірҷілер чуртас тооза студент полчалар. Олар сыбыра ӱгренчелер, зачеттар паза экзаменнер тутчалар, тиксі 150 азыра сыныхтағ! Учухчаң корабльда пірее наа система алай ба оборудование турғызыл парза, аны тирең ӱгреніп, сыныхтағлар тударға килісче. Ағаа хоза, піс хазиибысты сыбыра сыныхтапчабыс. Тиктең нимес чонда хантигірҷінің не осхас пик хазых поларға кирек тіп чоох пар. Анзы хап-орта. Хан тигірзер учухчатхан кізінің хазии пик поларға кирек.
Корабльда имнег кабинеді пар. Анда прай имнер паза пастағы полызығ пирҷең тиріглер пар. Хан тигірзер сыхчатхан кізі, имҷі чіли, прай ниме пілерге кирек нооза, тіс ағыриин имнирін дее. Пісті пломба турғызарға, ағырчатхан тісті суура тартарға ӱгретчелерӧк. Пір хати нанҷыма пломба саларға киліскенӧк. Чернослив чіпчеткенде, сӧӧгіне тізі чарыл парған. Ағырбас ӱчӱн, мин ағаа пломба турғысхам. Ибзер айланғанда, нанҷым тіс имҷізінзер айлантыр. Ағаа пломба иптіг салыл партыр тіптірлер (хатхырча. – Авт.). Итсе-де, чирдең имҷілер піснең сыбыра палғалыста полчалар. Хазиибыстаңар сурчалар.
НЛО пар ба?
Хан тигірде піске пасхаҷыл нимелер тоғаспааннар паза олар сынында парына киртінминчебіс. Че андағ даа полза, пірее ниме кӧрін парарына сыбыра тимдебіс (хатхырча. – Авт.). Полған на модульыбыста сомға паза видеоға суурар аппараттар пар. Ол-пу ниме кӧрін парза, аны суурып аларға тимдебіс.
Чирнің сілии
Чир улуғ даа полза, полған на лётчик позының тӧреен-ӧскен чирін кӧр таап алча. Іҷе чирінең артых ниме чоғыл нооза. Мин кічігде ууҷамда ӧскем. Аннаңар Тамбов облазын МКС-таң пір-ікі ле танып салчам.
2019 чылда Хакасияда полғам. Амды республиканың ӱстӱнҷе учухчатсам, Ким суғны кӧр таап алчам паза Сойан-Сус ГЭС маңат кӧрінче. Суғлар, вулканнар, тағлар чи хайдағ хайхастығ кӧрімніглер! Пулуттарда даа аймах омалар кӧрін парчалар. Пір хати саблығ писатель Александр Сергеевич Пушкиннің омазы кӧрін парған. Мин аны сомға суурарға маңнанғам. Анаң нинҷе-де ле секундаа ол алыс парған. Суурып алған сомнарны мин социальнай сетьтерзер удаа сығарчам. Пасхазы даа чирнің сілиин кӧрзін.
Тузалығ чӧп
Мин кічігде хантигірҷі поларбын тіп пір дее сағынмаам. Подводник поларға хынғам. Анзына мин тың ачырғанчам, кӧп тус тикке хорат салғам. Космодромзар 32 частығда ла килгем. Чииттӧк пу чолҷа парған ползам, иртӧк лётчикке ӱгреніп пастирҷыхпын. Аннаңар, мындағ чорыхтарға чӧріп, чииттернең кӧп тоғазарға кӱстенчем паза оларны школа соонаңох тимненіп пастирға хығырчам. Ӱгренгеннең пасти хан тигірзер учуғарына теере 11 чыл ирт парған. Ол туста пісті матап ӱгретчеңнер, тимнеҷеңнер. Амды, тізең, студенттер тӧрт чыл ӱгренген соонаң хан тигірзер сыхчалар.
Мин тӧрт чыл аразына ортымахти пір хати МКС-сар учухчам. Пу тус аразына піс кӧп тимнегліг тоғыс апарчабыс, ол санда халых тоғыснаң айғасчабыс, регионнарҷа чӧріп, чииттерні космонавтиказар килерге чӧптепчебіс.
МКС-та политика чоғыл
Пістің кӱн Россия гимнінең пасталча. Анаң аймах сарыннар ойнапчалар. 90 гигабайт орыннығ флешкада ырлар пар. Кем пурун усхунча, ол сарын турғысча. Итсе-де, прай даа ырлар чахсы. Ідӧк піс меспек тепклеп алчабыс.
Піске аймах хазналардағы хантигірҷілернең учуғарға килісче. Че МКС-та политика чоғыл, пістің пӧгін пасха.
«Вызов» хоос фильм
Ирткен чылда МКС-та режиссер Клим Шипенко «Вызов» хоос фильм суурған. Ӧӧн рольны актриса Юлия Пересильд толдырған. Сағынчам, чиит артист тиктең нимес ӱс муң кізінің аразында таллағ иртіп алған. Ол сынап таа чайаачы кізі. Олар чахсы кино суурып алғаннар тіп сағынчам. Ізенчем, ол ідӧк кӧрігҷілернің кӧңніне кірер.
Сӧбіре
Палаларым минің чолымҷа парарға хынминчалар, пілчелер нооза, хантигірҷілер ибде удаа полбинчалар. Итсе-де, хан тигірдеңер олар пілбинчеткен ниме чоғыл».
Россия Матырына – орден
Олег Герасимович Артемьев 1970 чылда Рига городта тӧреен. 2014 чылда пастағызын на хан тигірзер учуххан, ол бортинженер полған. 2018 чылда – ікінҷі хати. Ол андада экипажтың командирі полған, ирткен чылда ол хатап хан тигірзер сыххан. Тиксі алза, ол анда 560 сутка пол салған, сигіс хати азых космоссар сыххан.
Хакасия пазы Валентин Коновалов Олег Артемьевті республиказар килчеткен, чарыдығлығ тоғыс апарчатхан, космонавтиканы сабландырчатхан ӱчӱн алғызын читірген.
– Алғызыбыс читірчебіс пістің республиказар удаа кил парчатхан, чииттернең тоғасчатхан ӱчӱн. Сірер оларға кӧзідім полчазар, – таныхтаан чооғында Валентин Олегович.
Олег Артемьев ідӧк регион устағҷызы аны хығырған ӱчӱн алғызын читірген паза мындағ тоғазығлар соонаң хантигірҷі поларға сағыныбысхан чииттер табыларына ізенген.
– Хакасияның позының матыры, хантигірҷізі, поларға кирек, – теен ол. – Россияда оларны ӱгредер прай оңдайлар пар.
Хакасия пазы Валентин Коновалов Олег Артемьевке «Хакасияа чахсы киректері ӱчӱн» орден читірген.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы