ВАЛЕНТИН КОНОВАЛОВ: «ТАРХЫННЫ САЙБИРҒА ЧАРАБАС»
26.05.2023
Хабарлар
Форум. Пу кӱннерде Хакасияда «Чир-сууна хынчатханнарның чирі» чииттер форумы иртче. Анда Сибирь регионнарынаң 150 азыра кізі араласхан
Форумны Хакасияның правительствозы Россияның чаа-тархын халых пірігізінің хабазиинаң иртірче. Ол чииттерні пос чир-сууна хындырарына кӧстегліг. Форумның пайрамнығ азылғанында Хакасияның устағ- пастаа араласхан.
– Амды піс чииттерні тӧреен чир-сууна хындырар тоғыстарны апарзабыс, соонаң нация ӱчӱн хорыхпасха чарир. Пӱӱнгі кӱнде ол хазнаның ӧӧн кӧстеглерінің пірсі полча. Амды пістің армия фронтта нацизмнең хатығ харбазығ апарча. Че чаалазығ анда ла парбинча. Амғы туста интернетте улуғ харбазығлар апарылча. Анда удаа сын нимес искіріглер сығысча. Аннаңар чииттерге андағ искіріглерні сыннаң пасхалап поларға кирек. Ізенчем, «Чир-сууна хынчатханнарның чирі» форумда оол-хыстар интернеттегі тайма искіріглерні хайди ілезіне сығарып аларға піліп аларлар. Пістің тархынны сайбирға чарабас, – чооғында таныхтаан Хакасия пазы.
Улуғ аалҷылар аразында Аяна Шойгу полған. Ол Россияның чаа-патриот халых пірігізінің региондағы политика департаментінің директоры полча. Аяна Алексеевна форум тӧстегҷілерін паза араласчыларын Россия президентінің полысчызы, Россияның чаа-патриот халых пірігізінің кнезі Владимир Мединскийнің адынаң алғызын читірген.
– Украинада ӧнетін чаа операциязы иртчеткенде, хазнаа улам пик паза пір сағыстығ поларға кирек. Чуртағҷыларнаң, ӧӧнінде чииттернең тӧреен чир-сууна хындырар тоғысты апарарға кирек. Олар, хазна тархынын пілзелер, сын искіріглерні таймадаң пасхалап поларлар. Хакасияда «Чир-сууна хынчатханнарның чирі» форум иртчеткені уғаа кирек. Форум иртірчеткен ӱчӱн Хакасияның устағ-пастаана улуғ алғызым читірчем, – искірген Аяна Шойгу.
Чииттер форумында хабарҷы, блогер Михаил Онуфриенко, «Лица Победы» проекттің кураторы Андрей Широков, актриса паза телеведущай Инна Рубин чоох тутханнар. Олар ідӧк хакас чонның культуразынаң, чуртазынаң танысханнар, «Улуғ Хуртуайх тас» музейзер чӧргеннер, хакас чиизін амзап кӧргеннер.
Ӱс кӱн аразына Л.Р.Кызласовтың адынаң чир-суғ ӱгренҷең музейде паза «Меридиан» спорт-хазых пиктеҷең базада форум араласчыларынаң аймах мероприятиелер паза тоғазығлар кӧріл парған. Анда ідӧк чаа-патриот клубтарының, тілег отрядтарының паза волонтерлар пірігістерінің устағҷылары, тархын ӱгретчілері, музейлер тоғынҷылары араласчалар.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы