ПОС КИРЕЕНДЕ – АРТЫХТАР!
26.05.2023
Хабарлар
Хакасия пазы Валентин Коновалов Людмила Круговыхты сыйыхтапча
Сыйыхтас. Хакасия пазы Валентин Коновалов Россияның идінҷектері кӱніне удур республиканың хазна сыйыхтарын читірді
Хакасия правительствозының чыылығлар залында республиканың город-аймахтарының идінҷектері, аймах предприятиелер устағҷылары паза пос кӧңнінең ӧнетін чаа операциязындағы чир-суғҷыларыбысха хабасчатхан ӧткін чуртағҷылар чыылысханнар. Хакасия пазы Валентин Коновалов, хазна сыйыхтарына турысхан чуртағҷыларзар айланып, пӱӱнгі кӱнде республикада кічіг паза ортын пос киреен тилідеріне хайдағ хабазығ пирілчеткенін чарытхан. Анаң ол республика сыйыхтарын читіріп пастаан.
«Саянмолоко» ООО-ның ӱс тоғынҷызы иң аарлығ сыйыхтарға турысхан: автотранспорт цеғының пастығы Юрий Мельник – «Хакасияның істеніс сабланызы» медальға, сӱт сығарҷаң цех устағҷызы Светлана Болта – «Хакасия аал хонииның саблығ тоғынҷызы» аарластығ атха паза сыр сығарҷаң цех устағҷызы Елена Морозова – Хакасияның аарластығ пічиине.
Илбек Чиңістің 78 чылын пайрамнирына чазы кухнязын тимнирге тӧреміл полысчатхан ӱчӱн «Абаканский» ит консервазы комбинадының устағҷызы Дмитрий Ходырев Хакасия пазының алғыстазынаң таныхтатхан.
Че идінҷектернің ӧӧн чардығы ӧнетін чаа операциязының араласчыларына хабасчатхан ӱчӱн Хакасия пазының алғыстазына турысхан. Оларның санында полғаннар «Конвейерные технологии», «Разрез Белоярский», «Абаза-Энерго», «Саянские мясные продукты», «Катрина», «Смарт» («Красный Яр» паза «Батон» садығ туралары), «Премиум дом» пірігістернің тоғыс ӧмелері. «Опора России» тиксі Россиядағы кічіг паза ортын пос киреенің халых пірігізінің Хакасиядағы пӧлиин алынҷа таныхтирға кирек. Ирткен кӱскӱзін чардыхти мобилизация чарлалғандох, пірігіc кнезі Максим Шевченконың устаанынаң идінҷектер гуманитарнай полызығ чыып пастааннар. Олар нинҷе-де ле кӱн аразына ӱс таарлағ машиназын тимнебіскеннер. Полызығ чыырынҷа тоғыс ам даа узарадылча.
Пуох пірігістің араласчызы полча Таштып аймаандағы Круговыхтарның идінҷектер сӧбірезі. Дмитрий Круговых пӱдіріг киреенең айғасча. Хада хонғаны Людмила Круговых, хыс фамилиязы Уксекова – Ада чир-суубыс чааҷыларының сӧбірелері комитедінің Таштып аймаандағы пӧлік устағҷызы. Пу чыылығда Людмила Иосифовна идінҷек чіли Хакасия пазының алғыстазына турысхан.
– Піс ӱр ниместе Донбасстаң айланғабыс. Чааҷыларыбыс чиңіс тудар кӧңніліглер, че пик тыл чох пістің кӱзібіс читкіҷе полбас тіпчелер. Олар чир-суубыстаң ызылған полған на хабазыға ӧрінчелер. Аннаңар республика правительствозына паза идінҷектерге полысчатхан ӱчӱн алғыс сӧстерін читірерге сурынғаннар, – теен халыхчы ипчі.
Таштып аймаанда комитетке ӧнетін чаа операциязы араласчыларының сӧбірелерінең пасха, анда пір дее туғаны даа араласпинчатхан чуртағҷылар полысчатханы чӧпсіндірче тіп таныхтаан алынҷа чоохтазығда Людмила Круговых. Комитеттің чарым тоғызы полызығ чыырынаң палғалыстығ, аннаң пасха, ол СВО араласчыларының сӧбірелерінең тӧреміл палғалыс тутча, уламох хаҷан чааҷыдаң сағба чох полза. Чааҷыларға аймах сурығларны пӧгерге полызары – комитеттің паза пір тоғыс чардығы. Ӧӧн сурығлар пічіктернең палғалыстығ. Чоохтирға кирек, СВО-да Людмиланың чеені, Россияның Матыры Аймир Миягашев, чуртазын пир салған.
Валентин Коновалов идінҷектерге экономикаа сидік туста пірге тудынчатханы ӱчӱн, тиліҷең оңдайлар таапчатхан ӱчӱн алғызын читірген паза мыннаң мындар ідӧк кӱстеніп тоғынарға алғаан.
– Чаа фронтта ла парбинча, ол тиксі хазнабыстаң тоғыр искіріглер паза хатығластар полызиинаң апарылча, – теен республика пазы. – Че сірер, хайдағ даа сидіксініcке урунзаңар, тӧдір пазынминчазар. Сірер прайзы пос киреенде артыхсар! Правительство мыннаң мындар пос киреен тилідеріне прай саринаң хабазарға тимде. Пастағларнаң, наа сағыстарнаң айланыңар. Піс истерге тимдебіс. Пӧгін – хада-пірге тудынып, экономикабысты наа синге кӧдірері!
Автор :
Наталья СЮПТЕРЕКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы