АЛТЫН ЧУУПЧАТХАННАРНЫҢ ТОҒЫЗЫ ХАЙЫҒА АЛЫЛАР
26.05.2023
Хабарлар
Ӧӧркі Чӧп. Хакасияның Ӧӧркі Чӧп президиумы теестегі чыылиинда сигіс сурығ ӱзӱрібіcкен, ол санда теестегі сессияны хандых айының 7-ҷі кӱнінде иртірерге чаратхан
Кӱн суриинда ідӧк Хакасияның юстиция киректерінҷе паза регионны хорғыстардаң арачылаҷаң министерствозының ікі закон проекті, ӱс федеральнай закон проектіне ӱндезіглер, Удмуртияның Хазна Чӧбінің закон сығарҷаң пастаана хабазары паза «правительство чазына» сығарылар сурығҷа президиум чарадиина алызығ кирері ӱзӱрілген. Чыылығ Хакасия Ӧӧркі Чӧбінің кнезі Владимир Штыгашевтің устаанынаң ирткен.
Республиканың юстиция киректерінҷе паза регионны хорғыстардаң арачылаҷаң министрінің пастағы орынҷызы Елена Кудинова президиум араласчыларына «Хакасиядағы чазы читкелектернің хайығ чох чӧрчеткенінің паза право сайбапчатханының профилактиказынаңар» закон проектінің ӧӧн сағызын чарыт пирген. Ол «чазы читкелектернің алынҷа реабилитация иртчең программа» паза пасха оңнағларны кирче, олғаннарнаң тоғынар оңдайларны, іҷе-пабаларнаң тоғыс апарарын кӧрер. Че иргі законзар алызығлар 17 хати киріліп, пӱӱнгі кӱнге ол 90 %-ке алызығлардаң пӱтчеттір, аннаңар пу сурығҷа федеральнай законнарға килістіре республиканың наа законын тимнирге чарадылтыр. Президиум араласчылары аны от айының сессиязында ӱзӱрерге чарат салғаннар.
Хакасияның Ӧӧркі Чӧп кнезінің орынҷызы – хазых хайраллирынҷа паза социальнай политикаҷа комитет кнезі Евгений Молостов Россияның Істеніс Кодексінің алынҷа статьяларына алызығлар кирердеңер федеральнай закон проектінең таныстырған. Пӱӱнгі кӱнде ырахтын тоғынчатхан кізее хорғыс чох поларынҷа инструктажтарда хайди даа хол саларға киректелче, пірдең, тоғыс устағ-пастаа орныхчатхан орынзар киліп. Электроннай пічіктер айланызында инструктажтарда хол салғаны санға алылбинча. Закон проекті ол читпесті тӱзедер пӧгіннең тимнелген. Президиум араласчылары закон проекті республика чуртағҷыларына даа тузалығ полар тіп чарасханнар.
Экологияҷа, чир-чайаан ис-пайынҷа паза чир-чайааннаң тузаланарынҷа комитет кнезі Валерий Старостин алтын чуупчатханнарның (старательлернің) тоғызын хайыға алар ікі федеральнай закон проектінең таныстырған. Іди Россияда пӱӱнгі кӱнге теере алтын чуупчатханнар тоғызы ӱлгӱ хайии чох апарылча. Наа законнар алылза, оларға кӧрілген не чирде тоғынарға, чир тоғыстарын, ол санда чир ис-пайын анирын, 5 метрдең тирең апарбазы кӧрілер. Химиялығ ниме-ноонаң тузаланарға чарадылбас. Тоғыстарны тоосхан соонаң оларға ибіркі чирні иптирге киректелер: чирні тӱзедерге, ағастар одыртарға паза пасха тоғыстарны толдырарға. Че пастап пу законнар Ыраххы Востоктағы регионнарда ӱс чыл сыныхтағ оңдайынаң чуртасха кирілер. Анаң на тиксі хазнаа тарадылар.
Президиум Хакасияның Ӧӧркі Чӧбінің 50-ҷі сессиязында «правительство чазына» мындағ сурығны сығарарға чарат салған: «Хакасия правительствозының республиканың консолидированнай бюджедін толдырарынҷа алчатхан чарадығлары».
Автор :
Наталья СЮПТЕРЕКОВА
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
