ОЛАРНЫҢ АТТАРЫ ЧОННЫҢ САҒЫЗЫНДА
31.05.2023
Хабарлар
Хумартхылас. 27 майда Чоғархы Таштып аалда хумартхылас митингі ирткен. Ол чааҷы Аймир Миягашевтің чылына чарыдылған. Хакас оол пылтыр Украинада апарылчатхан ӧнетін чаа операциязында чат халған
Аймир Россия войсколары гвардиязының 14-ҷі алынҷа бригадазының палғалыс ротазының улуғ радист-разведчигі полған. Арғыстарын арачылап, ол ыырҷы тастаан гранатаның ӱстӱнзер чадыбысхан... Хорғыстығ ӧлімні позына алған оолға «Россия Матыры» ат пирілген.
Митингті чааҷының туған-чағыннары, Хакасия пазының орынҷызы Юрий Курлаев, Ӧӧркі Чӧптің депутады Василий Шулбаев, Таштып аймаа пазы Николай Чебодаев, Таштып аймаа депутаттары чӧбінің кнезі Георгий Тодинов, Аңчул аал чӧбінің пазы Олег Тибильдеев, Асхыс, Таштып аймахтарының паза Абаза городтың чаа комиссары Евгений Чаптыков араласханнар.
Аңчулда, хайда ирткен Аймирнің кічіг тузы, чааҷының сыырадынзар чахайахтар салылған паза мылтыхтаң атханнар. Хумартхылас митингі тузында чааҷының іҷе-пабазына хакас чонның Улуғлар чӧбінің иң пӧзік сыйии читірілген – «Алып» орден. Таштып аймаа пазы, тізең, Елена Валериевна паза Евгений Алексеевич Миягашевтерге Аарластығ пічік читірген. Ідӧк Аңчулда Аймирнің іҷе-пабазының сурынызынаң оолларына чарыдылған баннер турғызылған.
Хайди кӧрчебіс, Аймирнің хумартхызына Таштып аймаанда улуғ хайығ салылча. Пасха даа ӱреен чааҷылар ундудылбинча. 28 майда Таштыптағы «Z» скверде, чат халған оолларның хумартхызына чарыдып, ағастар одыртылғаннар. Чӧрімде чааҷыларның чағыннары, нанҷылары араласханнар. Полған на ағазахха оолның сомы паза ӱреен кӱні хызыл парған. Таштып аймаанаң сыххан паза Украинада чат халған он кізі саналча: Иван Авдеев, Аймир Миягашев, Эдуард Кыжинаев, Вячеслав Канзычаков, Руслан Сагалаков, Илья Калинов, Андрей Можаров, Владислав Бозыков, Пётр Морозов, Иван Чульжанов. Хай піреезін халғанҷы чуртаан чирлерінде чыып салған даа полза, чонның сағызында олар халғаннар.
Сом «Земля таштыпская» газетаның ВКонтакте страницазынаң
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы