Матырның ордені – паба-іҷезінде
19.01.2024
Хабарлар
Хакасия пазы Валентин Коновалов СВО-да чуртазын пир салған Евгений Мирошниченконың паба-іҷезінең паза Росгвардияның Хакасияҷа устаанаң хада
Хумартхылас. Ӧнетін чаа операциязында матыр чіли чуртазын пир салған Хакасиядаң парған росгвардеец Евгений Мирошниченконың Мужество орденін паба-іҷезіне читіргеннер
Хакасияның правительствозында ӧнетін чаа операциязында матыр чіли чуртазын пир салған Росгвардияның Хакасияҷа устанызының «Монолит» ОМОН-ының тоғынҷызы, полицияның прапорщигі Евгений Мирошниченконың Мужество орденін хайраллирға аның паба-іҷезіне пайрамни читірер мероприятие ирткен.
Россияның паза Хакасияның гимннері толдырылған соонаң чыылығ араласчылары, Росгвардияның cпецназовезін хумартхылап, пір минута сым турғаннар.
Хакасия пазы Валентин Коновалов хысха чоох тутхан:
– Ӧнетін чаа операциязында аралазып, пістің чир-суғҷыбыс, ОМОН-ның чааҷызы Евгений Мирошниченко, служба пӧгінін толдырчадып, матыр чіли чуртазын пир салған. Россия президентінің Указынаң, позына айабин, служба пӧгінін махачы толдырған ӱчӱн, Росгвардияның Хакасияҷа устанызының ОМОН отрядының чааҷызы Евгений Юрьевич Мирошниченко Мужество орденінең сыйыхтатхан (ӱреен соонда). Хакасия позының чир-суғҷызынаң поғдархапча, аның махачызы хаҷанға даа кӧзідім полып халар. Матыр оолны ӧскіріп алған пабазы Юрий Емельянович паза іҷезі Татьяна Анатольевна Мирошниченколарның алнында пазыбыс тӧбін тӱзірчебіс. Чииттерге чир-суғҷыбыстың махачызы хаҷанға даа кӧзідім полар.
Чооғын тоосханда, Валентин Коновалов паза Росгвардияның Хакасияҷа устанызының пастығы, полицияның полковнигі Вячеслав Васильев Мужество орденін Евгенийнің пабазы Юрий Емельяновичке читіргеннер. Іҷезі Татьяна Анатольевнаа чахайахтар читірілген.
Мероприятиеде ідӧк чоох тутханнар Вячеслав Васильев паза «Монолит» ОМОН-ының командирі Андрей Третьяков. Оларның чооғынаң, Евгений Мирошниченко ӧнетін чаа операциязында алынҷа кӧстегліг піріктірілген мобильнай отрядта полған. Служба пӧгінін толдырчатханда, ол орындағы чуртағҷы миналығ чазыда чара чачырасха кір парғаннаңар искіріг алған. Хайди киречілер искіргеннер, палығлатхан иреннің ханы ахчатхан.
Ол орынзар чиде тӱскен росгвардеец Евгений Мирошниченко, кӧріп, піліп алған – инженер техника ӧмезі (саперлар) килгенҷе, палығлатхан ирен сыдаспас. Чуртазына хорғыс таа полза, Евгений аар палығлатхан ирензер чидіп, ағаа пастағы полызығ пирген – чара чачырастаң пӱдін халған азаан хан ағыспас пағнаң палғап, ағырығны тохтадар укол турғысхан. Иренні имҷілерзер табырах читірерге кирек полған, нинҷе-де ле минута халған. Аны сӧзірчеткенде, палығлатхан чуртағҷы хазых азаанаң, кинен полып, чара чачыратчаң чазыр салған нимее тееп парған. Чара чачырас полғанда, ікізі олох орында ӱреп парған...
Евгенийнің пабазы Юрий Емельяновичтің чооғынаң, оолғы ӧнетін чаа операциязында хайди махачы тудынған, ибде дее, амыр чуртаста ол андағох полған, прайзына полызарға сыбыра тимде полҷаң. Cпортнаң айғасчаң, карате, хол-азахнаң тудысчаң спорт кӧріміне хынҷаң, соонаң мотоциклетнең айғас сыххан. Оолғына піди хайығ салған ӱчӱн Хакасия пазына алғызын читірген.
Мероприятиені тоозып, Валентин Коновалов таныхтаан: «Матыр оолны ӧскірген ӱчӱн Евгенийнің паба-іҷезіне пазох улуғ алғыс читірчебіс. Ол ӱгренген школада, пасха даа чиит улус матырны хаҷан даа ундутпастар, оларға Евгений чахсы кӧзідім полар. Хумартхылас паза сабланыс матырға хаҷанға даа!»
Сом Дмитрий Сунчугашевти
Автор :
Николай Султреков
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде