Халых пiрiгiстерi табығларда ӧткін аралазарлар
31.01.2024
Хабарлар
«Россия чоннарының ассамблеязы» тиксi Россиядағы халых-хазна организациязының Хакасиядағы пӧлиинiң кнезi Любовь Аёшина паза республиканың Халых палатазының кнезi Ольга Левченко
Ирткен неделяда Хакасияның Халыхтар палатазы республиканың халых организацияларынаң президент табығларында хада-пiрге тоғынардаңар чӧптезiгде хол салыбысхан
Хакасияның Халыхтар палатазы, халых сыныхтағларының тӧстегҷiзi полып, табығларға халых кӧрiгҷiлерiн тимнепче. Олар 2018 чылда ирткен президент табығларында пастағызын на араласханнар. Пу тусха теере республиканың Халыхтар палатазы пiр муң азыра халых кӧрiгҷiзiн ӱгредібiскен. Полған на ӱн-пиріс алнында палатаның кiзiлерi кӧрiгҷiлернi тимнепчелер. Кӧрiк айының 15 – 17-ҷi кӱннерiнде Россия президентi табығларында халых кӧрiгҷiлерi аралазарохтар.
– Пӱӱн андағ тус, хаҷан ӱгредiлген халых кӧрiгҷiлерi парыбысчалар, аннаңар Халыхтар палатазы оларны хатап тимнепче. Хакасияның Табығ комиссиязы кнезі Александр Чуманиннiң чооғынаң, халых кӧрiгҷiлерiн тимнеп, табығлар иртiрерiне чахсы полысчабыс. Сiрер, халых организациялары, пiстiң пiрге тоғызыбысты толдыразынаң толдырчазар. Халых сыныхтаанда сiрерге улуғ нандырығ салылча.
Пу тоғысха чииттернi тартарға сурынчам. Хакас техническай институттың паза Н.Ф.Катановтың адынаң Хакас хазна университедiнiң студенттерi пис чыл пiснең хада парчалар. Пiс чииттернi ӱгредерге паза халых кӧрiгҷiлерi тоғызына тартарға кирекпiс. Пӱӱл Ағбан городтағы училище-техникумнардаң илееде студенттi халых кӧрiгҷiзі тоғызына тартчабыс.
Сiрерге улуғ iзенiс. Пiс чонны табығларға парарға паза гражданскай нандырығларын толдырыбызарға чӧптирге кирекпiс, – теен Хакасияның Халыхтар палатазының кнезi Ольга Левченко.
Халыхтар палатазы аппарадының устағҷызы Ирина Селькина табығлар хайди хайығда тудыларынаңар паза халых кӧрiгҷiлерiне хайдағ пiчiктер пирiлерiнеңер чоохтаан. «Алтын стандарт» халых кӧрiгҷiзінiң ӧӧн пiчии полча. Анда ол нимее хайығ айландырардаңар чарыда пазыл парған. Табығларға андағ iкi пiчiк пирiлер. Пастағызы кӧрiк айының 15-ҷi паза 16-ҷы кӱннерiне, iкiнҷiзi – кӧрiк айының 17-ҷi кӱнiне. Кӧрiгҷi иртеннең сығара табығ участогында ниме полчатханын кӧрерге, че андағы киректерде араласпасха кирек. Аның ӧӧн пӧгiнi – табығлардағы киректернi хайығда тудары паза олардаңар искiрерi.
Полған на халых кӧрiгҷiзінiң памятка полар, хайзында ағаа кемнең палғалыс тударынаңар паза ол ниме ит полар-ит полбазы пазыл парған. Пу пiчiк кiзi халых кӧрiгҷiзі полчатханын киречiлепче. Аның паспорты хада поларға кирек.
Ольга Левченконың таниинаң, халых кӧрiгҷiзi нандырығлығ паза полыс пирер, патриот кӧңнiлiг кiзi пол полар.
Хакасияның Халыхтар палатазы регионның 26 халых пiрiгiзiнең хада-пiрге тоғынардаңар чӧптезiгде хол салыбысхан. Ол санда «Россия чоннарының ассамблеязы» тиксi Россиядағы халых-хазна организациязының республикадағы пӧлиинең. Аның кнезi Любовь Аёшина полча.
– Пістің хазнаның президентi чарадиинаң «Россия чоннарының ассамблеязы» халых-хазна организациязы тӧстелген. 2022 чылның улуғ хырлас айында Хакасияда аның пӧлии тӧстелген. Чарыс айының 16-ҷы кӱнiнде халых организациязы юридическай лицо чіли пiчiкке тур салған. Этническай кӧстеглiг прай пірігістернің устағҷылары халых организациязының регион пӧлиине кiрер кӧңнiлiг полыбысханнар. Амды пiс тоғынчабыс паза турғызылған прай пӧгiннернi толдырчабыс. Хазнабыстың прай субъекттерiнде «Россия чоннарының ассамблеязы» халых организациязының пӧлiктерi пар. Хакас Республика тоғыс тӱзiмнiг апарылчатхан регионнар санында. Анзы пiс ынағ паза пiлiзiп чуртапчатханыбысты киречiлепче. Мыннаң мындар пу организация город-аймахтарда тоғызын апарар паза чииттерге хайығ салар, – таныхтаан Любовь Иосифовна.
Хакасияның Халыхтар палатазы iдӧк «Чииттер паза тилiс», «Россияның пос кӧңнiнең полысчатханнарының пiрiгiзi», «Россияның пенсионерлер пiрiгiзi», «Россияның юристтер ассоциациязы», «Афганистанның паза ӧнетiн чаа операцияларының ветераннарының Россиядағы пiрiгiзi» халых организацияларынаң, «Чииттернiң стратегия пастағларының паза проекттерiнiң кiнi» фондынаң, «Сибирьнiң кресен паза фермер хоныхтарының паза аал хонии комплексi организацияларының» ассоциациязынаң, «Алтынай» хакас ипчiлернiң лигазы», «Чаа палалары» халых пiрiгiстерiнең, «Чиңiс волонтёрлары» тиксi Россиядағы чӧрiмнiң региондағы пӧлиинең, «Тасха» Ағбан волонтёрларының кӱмӱс отряды» халых чӧрiмiнең паза пасхазынаң хада-пірге тоғынардаңар чӧптезігде хол салылған.
– Пiс пастағы ла чыл нимес халых кӧрiгҷiзi полып табығларда араласчабыс. Мин президент, Хакасия пазы табығларында халых кӧрiгҷiзi полғам. Пiстiң опыт пар. Хакасияның Халыхтар палатазынаң хада-пiрге тоғынчабыс. Хайди таныхтаан Ольга Александровна, халых кӧрiгҷiзi полып кiзi пос кӧңнiнең не аралас полар, аннаңар пiрдеезiн кӱстебеспiс. Россияның полған на гражданинi патриот полча тiп сағынчам, пiстiң чӧрiмдегi полған на кiзi чиңic, Россия ӱчӱн, улуғларны паза пiстiң тархынның танығлығ киректерiн улуғлапча, – таныхтаан «Чиңiс волонтёрлары» чӧрiмнiң Хакасиядағы пӧлиинiң кнезi Анастасия Ершова.
Халғанҷы чылларда табығларны хайығда тутчатхан коммерческай нимес организацияларның саны ӧсчеткенi таныхталча. Чӧптезiгде хол салғанында iдӧк чуртағҷыларның праволарын арачылирынаң айғасчатхан организациялар араласханнар. Оларның санында «Хакас Республиканың профсоюзтарының федерациязы» профсоюз организацияларының пiрiгiзi. Аның кнезi Евгения Ольховскаяның таниинаң, президент табығлары закон сайбабин иртер ӱчӱн, кӧрiгҷiлер тiлирiнҷе таллаға пiрiгiс нандырығлығ хайар.
Табығларда халых кӧрiгҷiлерiнiң тоғызы уғаа кирек. Аннаңар азығ айының пастағы кӱнiнең сығара Хакасияның Халыхтар палатазы социальнай сетьтерде #минХалыхКӧрiгҷiзі видеороликтер проектiн чуртасха кирче. Мындағ оңдайнаң халых кӧрiгҷiлерiнiң тоғызының тузазы читiрiлер.
Cом Анастасия Богдановани
Автор :
Оксана Челтыгмашева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде