Паза пір тура изелчеткеннер санында
03.04.2024
Хабарлар
Хакасия пазының орынҷызы Владислав Мингеланың устаанынаң изелчеткен чурттаң чонны кӧзірері ӱзӱрілген
Кӱн сурии. Харатас городта Дзержинскийнің орамазындағы 12А тура изелчеткенге саналған. Пу неделя аразына чуртағҷылар кӧзіріл парарға киректер
Таныхтирға кирек, пу турада общежитие орныхча. Ол алында сағыбаан саай полған туранаң хости турча. Кӧрік айының 14-ҷі кӱнінде аның пір пулии хырынаң хада иңзеріл парған. Ӧнетін тӧстелген комиссияның кӧрізінең, пу ікі тураның сидіксіністері тӧӧй: тасхын чӧрҷең паза суғнаң тузаланҷаң пӧліктер пір орында тӧстелгеннер паза, пу чылларға сых тартылып, иңзерілерге чит парғаннар. Дзержинскийнің орамазы, 12Б адрестегі тура ирткен чылдох изелчеткен чурт санына кирілген полза, пу тураҷа чарадығ ӱр ниместе ле алыл парған. Хакасия правительствозы общежитие чуртағҷыларының хазиина паза чуртазына хорғыс чох полар пӧгіннең оларны чапчаң кӧзірерінҷе иртірілер тоғыстарны чарат салған. Республика пазы Валентин Коноваловтың чахиинҷа аның орынҷызы Владислав Мингела пу тоғыснаң устап парча.
– Прай чуртағҷыларны пу чағында кӧзірібізерге кирек, олох туста оларға кирек ниме-ноо тооза пирілерге кирек, ол санда чіҷең ниме. Городтың устағ-пастааның паза Хакасияның істеніс паза социальнай арачыланыс министерствозының специалисттеріне хада-пірге полған на чуртағҷынаң, улуғ частығларға, кинектерге паза палалығ сӧбірелерге улуғ хайығ салып, алынҷа тоғыныбызарға киректелче, – таныхтаан Хакасия пазының орынҷызы Владислав Мингела.
Чуртағҷыларның чардығы кӧзіп пастабысхан. Пасхазы хайдар кӧзерін кӧрче. Ӱр нимеске чуртирға орын социальнай гостиницада пирілче, Харатастағы спорт школазында, хығырҷаң кінде орғаннар турғызылған, город устағ-пастааның ӱр нимеске чуртатчаң пос квартиралары пар. 20-ҷе кізі туған-чағыннарынзар парарға чаратхан.
Хакасияның пӱдіріг паза ЖКХ министерствозы искіриинең, ідӧк чуртты арендаа суурарға ахчалығ хабазығ кӧріл парған. Хакасия правительствозы Харатасха пу чылда 12 миллионҷа салковай пир салған. Ол ахча прайзына чидерге кирек, кемге андағ хабазығ киректелче.
Чуртағҷыларға пос ниме-ноозын чыырға ӧнетін орын пӧлілген, ол хадағда турар. Кӧзерге таарлағ транспорты паза ниме-нооны тазыҷаң кізілер тимнелген.
Общежитиеде тонағ полбас ӱчӱн, хадағ службазы турғызылған. Город устағ-пастаана право хайраллаҷаң органнарнаң хада хорғыс чох поларынҷа сурығларны пӧгібізерге чахығ пирілген, ДПС инспекторларының сыныхтағ чоллары туразар чағын иде алыстырылар. Пасха кізілер общежитие туразынзар ирт чӧрбес ӱчӱн, тура ибіре сиден турғызылар, пастағы хадылдағы кӧзенектер паза ізіктер туйухталар.
Хакасия правительствозы иртірчеткен ӧнетін чыылығларда Максим Горькийнің ор., 2А адрестегі иңзерілчеткен тураҷа чарадығлар алылча. Аның чуртағҷыларын пазағы неделяда кӧзіріп пастирлар.
Хайдар кӧзерінҷе сурығларҷа пу телефонҷа сығдырадарға чарир: 8 (39031) 2-59-51.
Пӱӱнгі кӱнде паза пір тураның ӱлӱзі пӧгілче: Дзержинскийнің орамазындағы 14-ҷі тураның. «Независимая экспертиза» ООО хосхар айының 10-ҷы кӱніне сыныхтағ салтарларын тимнеп саларға кирек. Ағаа тӧстеніп, Хакасия правительствозы мыннаң мындархы тоғысты кӧрер.
Сом r-19.ru cайттаң
Автор :
Тимнеен Наталья Сюптерекова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
