ХАКАСИЯНЫҢ ИҢ АБАХАЙ ХЫЗЫ КРЫМДА ТЫНАНАР
Статья
Ағбанда драма театрында «Мисс Абахай -2016» республика марииның финалы ирткен, хайзында Хакасияның иң абахайы атха турызарға 15 араласчы кӱстенген. Кем оларның аразында иң артых, иң абахай? Анзын амох піліп аларбыс. Че пурнада сӧс пирілче Хакасияның культура министрі Светлана Окольниковаа:
- Хакасия пазы Виктор Михайлович Зиминнің чахиинаң пӱӱн прай араласчыларны «Мисс Абахай» марығның финалына сығып алғанынаң алғыстапчам. Чылдаң чылға марығның сині ӧсче, коронаны кизерге сағынчатханнарның саны ідӧк хозылча. «Мисс Абахай» - ол олаңай марығ нимес, ол - чииттер чӧрімі, хайзы хакас тілін, кибірлерні, культураны тилітче, чонны хазых чуртас апарарға хығырча. Марығҷыларға чиңіс алғапчам! - теен Светлана Анатольена, Алынҷа таныхтирға сағынчам жюридегілерні. Анда чайаачы тоғыснаң матлама айғасчатхан кізілер одырғаннар: Хакасияның культура министрі Светлана Окольникова, Хакасияның чон артизі, Хакасияның композиторлар пірігізінің кнезі Герман Танбаев, Россиянин саблығ артизі, Хакасияның чон артизі Светлана Чаптыкова, Хакасияның чон артизі, «Ӱлгер» ансамбльның хоос устағҷызы Вячеслав Кученов, Хакасия культуразының саблығ тоғынҷызы, «Кӱн сузы» ансамбльның хоос устағҷызы Наталья Апуневич, Хакасия искусствозының саблығ деятельі Александр Котожеков.
«Мисс Абахай» марығ пис чыл мының алнында Интернетте олаңай ӱн пиріснең пасталған. Иң абахай хысты таллирында кӧп кізі араласхан. Соонаң марығның тӧстегҷілерінзер сурыныстар кір сыхханнар - Интернет мариин сценазар сығарарға. Чонның кӧңні-сағызы толған, сценада «Мисс Абахай» марығ улам чарых ирт сыххан.
«Мисс Абахай-2016» марығның финалына сығып алғаннар: Мария Бытотова, Валентина Торокова, Анастасия Киргинекова, Айана Мамышева, Азария Селигеева, Юлия Арыштаева, Наталья Киштеева, Анастасия Иптышева, Хыс-пай Сайын (Евгения Осипенко), Юлия Ульчугачева, Ольга Чистанова, Галина Сазанакова, Дарина Кичеева, Юлия Тохтобина паза Ольга Боргоякова. Прайзы кӱн осхас чарыхтар, чахайахтар осхас сіліглер, ах хазың осхас сылағайлар.
Пастап хыстар, хара кӧгенектер кизіп, сценаҷа модель чіли пае чӧргеннер. Анаң хакас тілінең постарының родтарынаңар чоохтааннар. Ідӧк постары тимнеен хакас чонның ас-тамаан жюридегілерге читіргеннер. Аны жюри антракт тузында, амзап, паалаан.
Чайаачы чардыхта хыстар прайзын хайхатханнар. Олар сіліг сарнааннар паза теелбек чахсы салғаннар. Анаң костюмнар кӧзідии парған. Абахайлар национальнай костюмнығ сценаа толдыра морсымнығ пас чӧргеннер. Соонан, хыстар, пайрам-иирлерге кис чӧрҷең сіліг кӧгенектер кизіп алып, пазох сценаны чазабысханнар. Кӧрігҷілернің харахтары, оларны кӧріп, аар-пеер ле ойласчатхан. Айа сабызы тохтабинчатхан. Абахай хыстарны кӧріп, залдағы ооллар матап сығырысчатханнар.
Жюри салтарлар иткен соонаң, хыстар мындағ номинацияларҷа «мисс» пол парғаннар: «Мисс Супермодель» - Юлия Ульчугачева, «Мисс Вдохновение» - Хыспай Сайын, «Мисс Нежность» - Галина Сазанакова, «Мисс Романтика» -Валентина Торокова, «Мисс Очарование» - Наталья Киштеева, «Мисс Элегантность» - Ольга Боргоякова, «Мисс Грация» Дарина Кичеева, «Мисс Совершенство» - Юлия Тохтобина, «Мисс Фотомодель» - Азария Селигеева, «Мисс Фитнес» - Айана Мамышева, «Мисс Овация» - Ольга Чистанова, «Мисс Онлайн»
- Мария Бытотова, «Мисс Талант» Анастасия Иптышева, «Мисс Этностиль» - Юлия Арыштаева, ікінҷі вице-мисс - Галина Сазанакова, пастағы вице-мисс - Юлия Ульчугачева.
Марығның чиңісчізі полыбызып, «Мисс Абахай-2016» атха Хыспай Сайын турысхан. Ағаа май айда Крымда сигіс кӱн тынанарға путевка читірілген.
Тимнеен Татьяна ТЮТЮБЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде