ПІСТІҢ АРТИСТТЕР КРЫМДАҒЫЛАРНЫ АПТААННАР
24.08.2016
Хабарлар
Ирткен неделяда «Нымах» кӧклӧ театрының артисттері хабарҷыларнаң тоғасханнар. Пресс-конференция тузында олар Крымда ирткен гастрольлардаңар, наа сезонда хайдағ ойыннар тимнепчеткеннеңер чоохтап пиргеннер.
«Нымахтағылар» ыраххы чорыхха удаа пар килчелер. Артисттернің чайаачызынаң Европаның чуртағҷылары чахсы таныстар, Крымда, тізең, олар пастағызын на полғаннар. Театр директоры Игорь Окольников чоохтапча: «2014 чылда чоннар аразындағы «Сибер Ил» форумда Хакасияның паза Крымның культура министерстволары аразында чӧптезіг иділген. Піс пу чӧптезіг хоостыра пӱӱл Крымзар пар килгебіс. Гастрольлар 5 августтаң 9 августха теере Евпатория, Ялта паза Севастополь городтарда ирткеннер».
Крымзар артисттер ікі ойын апарғаннар: «Хонҷыхтар» паза «Апсах паза пӱӱр». Таныхтирға кирек, «Хонҷыхтар» спектакль ӱчӱн «Нымах» театрның ӧмезі 2008 чылда «Алтын масканаң» сыйыхтатхан.
Пiстiң чайаачы устарыбысты крымдағылар пастап маңат ла удурлабиндырлар: ыраххы Сибирьдең хайдағ-да кӧклӧ театры килген. «Мында хомзынҷаң ниме чоғыл, - таныхтаан Игорь Ярославич. - Крымда хан тузынаң сығара хазнаның иң саблығ артисттерінің концерттері иртчеңнер. Кӧзідімге, Евпаториядағы театрда Фёдор Шаляпин сарнаан, Ялтадағы театрда режиссер Владимир Немирович-Данченко Антон Чеховтың «Чайка» паза «Дядя Ваня» пьесаларын турғысхан. Пӱӱнгі кӱнде Крымзар сыбыра гастрольларнаң Филипп Киркоров, Евгений Петросян, Григорий Лепс паза аннаң даа пасхазы килчелер. Олар андағ артисттерні кӧрерге ӱгрен парғаннар. Че пістің чайаачыларыбыстың пӧзік узы кӧрігҷілерні аптаан».
Амды «Нымах» кӧклӧ театрының ӧмезі наа сезон азарға тимненче. Августта театрның тӧстегҷізіне, саблығ режиссер Людвиг Устиновха 80 час толған. Наа сезонда театрда аның «Правитель и шут» пьесазын турғызарлар паза пайрамнығ чазын таныхтирлар. 2017 чылда июльда «Нымах» театр «Чир-чайаан» фестиваль иртірер.
«Итчең ниме кӧп, - тоосхан чооғын Игорь Ярославич, - кӧрігҷілерібісті ойыннарға сахтапчабыс, піс оларны ӧріндірерге тимдебіс».
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы