Рубаилер
09.09.2016
Статья
Рубаилер
Кізі ӧрінзе, кізі хомзынмазын,
Кізі хомзынза, кізі ӧрінмезін.
Кізінің чолын кізӧк туюхтидыр,
Че кізінің чолын кізӧк асчатсын.
* * *
Хайди табырах иртче кізі чуртазы,
Полған иртен, кӱндӱс, амды иир тузы.
Прайзының чуртас кӱні хон парча,
Че прайзының кӱнніг полбинча чуртазы.
* * *
Артысхам мин сағаа харах часты,
Пос холынаң ӱзіріп кӧӧленісті.
Пыросынчам, кеен ипчі, че чідірбеең
Таң чіли чарыпчатхан ізеністі.
* * *
Тигірде кӧрчем муңар чылтыс кӧсті,
Кізі чооғында исчем муңар сӧсті.
Паарсах сӧстерің іҷе-пабаңа ползын,
А чир-сууңа талла алтын-кӱмӱстерні.
* * *
Сын хайығ тартпас, олаңай сырайлығ,
Че чой хаҷан даа кеен, ӧкер омалығ.
Чуртаста сынның нанҷы ас поладыр,
Чойның сӧзі кӧбізіне тадылығ.
* * *
Ол - Ӧӧркі чайаанның хынған палазы,
Хоосхани осхас аның истіг чуртазы.
Син - хара тоғыста чоо сіренчезің -
Полған на кізінің позының ӱлӱзі.
* * *
Чилегезі іріктеен ағас хурупча,
Тілін, кибірлерінундаан чон чітпарча.
Кӱн кірізінзер парчатхан хакас чоным,
Кӧрчем, нандыра айланча, хакастапча.
* * *
Хоосчы хоостапча сырларнаң,
Поэт чазапча сӧс, омаларнаң.
Олар чағын харындастар,
Тоғасчалар тӧӧй Муза-хыстарнаң.
* * *
Тӱӱлчем телевизорны кӧрерге,
Чой, изі чох хабарлар истерге.
Хызылыс соонаң хызылыс чонға,
Тохтабыс, Чир, мин тӱзібізерге!
* * *
Поэт - Ӧӧркі чайааннарның илҷізі,
Хаҷан даа Чахсының, Сілігнің кӧгҷізі.
Кӧг чазызы ээн халбинча, пӱӱн анда мин,
Таңда килер чиит поэт - чонның хынызы.
* * *
Ипчім, «хатым» сӧске хынмин, тарынча мағаа,
Харағат, хызылғат чистек нимес ағаа.
Ипчі - «домохозяйка» поларға хынча.
Хатым, ачығ чистек полба - чол ас хынысха.
* * *
Кізі алнына чойлан чӧрбе,
Кистінең дее соона тӱспе.
Постың чӱзіне тееп парча -
Кӧгілбей тигірзер тӱкӱрбе.
* * *
Парыбыссам, сыхтир кирек чоғыл,
Пу ах чарыхта аннаң им чоғыл.
Сабланыс, ӧрініс хынмаан мағаа,
Кӧні чоохтығ кізее хыныс чоғыл.
* * *
Минің тигірибім - кӱргенніг чазыларым,
Чӱрееме истіг, сіліг, пӧзік тағларым.
Тағлар кӧрген, чазылар искен - киречілер.
Хакасиябыс - ызых чир, тадарларым!
***
Геннадий Кичеев
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде