ПАЛАЛАРНЫҢ ХАРАХТАРЫ ЧЫЛТЫРАСХАН
27.09.2016
Хабарлар
Хакасияның аарлығ аалҷылары, Олимп ойыннарының чемпионнары полған спортсменнер пістің республикада улуғ халых-чарыдығлығ тоғыс апардылар. Олар, пеер килгендӧк, аймах тоғазығлар иртіріп пастааннар. Иң пастап піснең, хабарҷыларнаң, чоох-чаахнаң алысханнар. Тӧреен-ӧскен чирлерінзер айланар алнында піснеңӧк тоғасханнар.
Аймах чылларда постарының чалтырама чиңістерінең хазнабысты тиксі сабландырған спортсменнер пістің чирзер килгеннеріне ӧріністерін чазырбинчатханнар. Хайдар даа кізі тоғазығ тузында арығ чӱреенең чоохтанчатханын алай махтир ла ӱчӱн махтабысчатханын хайзыбыс таа сах андох сизінчебіс. Мында, тізең, кӧпті кӧрген, кӧйее чалғаан кізілер постарының сын ӧріністерінең ӱлезерге харасчатханнар.
Иң пастап олар пістің республикадағы палаларны тың махтапчатханнар. Мына ниме чоохтапча Олимп ойыннарының ікі хати чемпионы Татьяна Сарычева: «Мин волейболнаң айғасхам. Аннаңар мындағ чорыхтар тузында кічіг волейболисттернең тоғазарға харасчам. Саяногорскта полғанда, пір хызыҷағас холымны тудып алған, Олимп ойыннарының чемпионы полбазам даа, чуртаста сірерге тӧӧй поларға харазарбын тидір. Позының харахтары чылтырасча. Аның на ӱчӱн чорыхтарға чӧрерге, палаларнаң тоғазарға кирек».
- Хакасияда мындағ спорт министрi тоғынчатханына ӧрінерге кирексер. Нинҷе наа пӱдіріглер пастап салған, нинҷе спорт объекттері тимге сых парған. Аймах секцияларға олғаннар хайди хынып чӧрчелер. Валерий Васильевич Денщиков, спорт министрі, хайда даа пос кізізі улуғ аарласнаң тузаланча, - махтапча министры делегация устағҷызы Наталья Боярская.
Наталья Николаевна сала даа ікінҷілебинче - Хакасияда спорт тилізіне мындағ улуғ хайығ салылчатханда, хайди даа Олимп ойыннарының чемпионнары поларға киректер. Аның кӧңніне уғаа тың кіртір тренерлер орыннардағы ӱлгӱнең удур-тӧдір чахсы пілізіп тоғынчатханы. Олох муниципалитеттер тоғынҷылары аразында иртірілчеткен марығлардаңар истіп алғанда, аалҷы пасха даа орыннарда андағ чӧптер пир турарбыс теен.
Мындағ саблығ кізілернең тоғазығлар хайда даа пӧзік синде ирт турғаннар. Аарлығ аалҷылар Ағбанда, Саяногорскта, Харатаста, Хубачарда полғаннар. Палаларның, чииттернің харахтарындағы ӧріністі кӧріп, олар, чоох-чаахнаң алызып, илееде ӱр саадап парыбыс турғаннар. Іди поларға кирек. Аалҷыларның ӧӧн пӧгіні мындағ тоғазығлар иртір турары полча нооза. Тиктең нимес оларның программазы «Олимп ойыннарының саблығ кізілері - Россияның олғаннарына паза чииттеріне» адалча.
25 чыл мының алнында тӧстелген чӧрім чылдаң чылға кӱс алынып одырчатханын таныхтапчалар аалҷылар. Хазнабысха сидік 1990 чылларда даа пу халых-чарыдығлығ тоғыс тохтабиндыр. Ӱзер-тӧртер дее кізі, чыылызып-пірігіп, Москва хыриндағы аал-городтарзар сығыбысчаңнар, тоғазығлар иртірҷеңнер, олғаннарны, чииттерні спортнаң айғазарға чӧптеҷеңнер, кӧӧктірҷеңнер. Амды, тізең, пірее хати мындағ делегацияда 20 - 25 кізі саналча, Россияның аймах пулуңнарында пол килерге маңнанчалар. Пӱӱл ле олар хазнабыстың 26 регионында полтырлар.
Тоғазығлардаң пасха аалҷылар Хакасияның танығлығ орыннарынаң танысханнар. Мында даа оларның хайхастарын оңарарға чарир. Хайда даа ползалар, сурығлары тоозылбинчатханға тӧӧй. Олар, тізең, аймах марығларда аралазып, тилекейні прай ибір салғаннар, хайдағ ла таңнастығ орыннарда поларға киліспеен. Пістің чирібіс тее аалҷыларның кӧңніне кіртір.
Анаң Олимп ойыннарының чемпионнары піске, хабарҷыларға, постарының сыйыхтарын читіргеннер - «Олимп чӧрімін чон аразында таратчатхан ӱчӱн» уғаа сіліг кӧрімніг танығ-медаль. Мағаа ол медальны таңма атарынҷа Олимп ойыннарының чемпионы Михаил Неструев читірген.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы