ПОС ТІЛІН ПІЛЗЕҢ, АХЧА АЛАРЗЫҢ
27.09.2016
Хабарлар
Хакасияда хакас тілін, хайраллап, тилідер тоғыс кӧп апарылча. Іди ӱр ниместе Пии аймааның Куйбышевтегі ортымах школада «Амғы туста хакас тілін паза литератураны аалдағы школада ӱгренері паза аны тилідері» конференция ирткен. Анда хакас тілінің паза культуразының тилізіне улуғ хозым итчеткен эксперттер араласханнар. Олар хакас тілін паза культураны сӧбіреде хайраллирға кирек тіп салтарға килгеннер.
Хакас тілін, культураны паза кибірлерні хайраллап халар ӱчӱн, чыылығның араласчылары муниципалитетте аймах мероприятиелер иртірер план тимнееннер. Іди 1-ғы классха килген олған хакас тілінең чоохтасчатса, іҷе-пабазына ахчалығ полызығ пиріл турар.
Пӱӱл Пии аймаанда 63 олған 1-ғы классха килген. 29 олғанның іҷе-пабазы ахча аларға сурыныс пічиин пасхан. Комиссия хакас тілінең чахсы чоохтасчатхан 15 олғанны таллап алған. Пии аймааның пазы Юрий Курлаев пу олғаннарнаң паза оларның іҷе-пабаларынаң тоғасхан. Ол іҷе-пабаларға сӧбіреде хакас тілін хайраллапчатхан паза аннаң чоохтасчатхан ӱчӱн 10 муң салковайға сертификаттар читірген.
Ағаа хоза, Юрий Николаевич Куйбышевтегі школаның улуғ класстар ӱгренҷілерін 1-ғы класстардағы палаларға полызарға сурынған. Улуғлары кічіглерін пос тіліне ӱгредерге киректер. 2016-2017 ӱгредіг чылы тоозылчатса, тиксі салтарлар иділер. Кічіг олған хакас тілінең чоохтас сыхса, аның кураторы ідӧк сыйыхха турызар.
Автор :
Хакасияның ӱгредіг паза наука министерствозы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы