ПОС САЛЫНАРҒА ЧАРАБАС
07.12.2016
Хабарлар
Киҷее Хакасияның пазы Виктор Зимин правительство чыылиин иртірген. Чыылығ Россия президентінің Айланызында искірілген чахығларға паза республика істіндегі киректерге чарыдылған.
Регион устағӌызы, чыылығны пастап, Ханты-Мансийскай автоном округында чолдағы саайда чуртастарын чідірген олғаннарның іҷе-пабаларынаң хада чобалчатханын искірген. Ол чобағлығ кирек хоостыра Виктор Зимин ӱдес парчатхан полиция машиналары чох республикада палаларны автобустығ тарт чӧрбеске чахығ пирген. Чоох парча регионнар даа, муниципальнай пӱдістер дее аразындағы чорыхтардаңар, таныхтаан ол. Ідӧк Хакасияның пазы чағдапчатхан Наа чыл ӱлӱкӱннерінде республика чуртағӌыларының, иң не пастап палаларның, чуртазын хорғыс чох идер сурығларны пик хайығда тударға пӧгін турғысхан.
Россия президентінің Айланызы хоостыра республика пазы прай орынҷыларына паза министрлерге тоғынарға чахып салған.
- Соона салдырбин, федеральнай программаларда амох аралазып пастирға кирек, - таныхтаан Виктор Зимин. - Улам пістің опыдыбыс пар.
Кічіг аалларны хайраллап тилідер паза аал хониина хабазар программалар хазна устағҷызы искірген пӧгіннернең кӧні палғалысчатханын таныхтап, оларны хайығ чох артыспасха кӧстег турғысхан. Андағох чахығ пирілген аал-городтарны, ол санда моногородтарны, иптир программаҷа. Президент килер чылда пу пӧгінге регионнарға 20 миллиард салковай ызыларын искірген нооза. Ідӧк Виктор Зимин прай министрлерге федеральнай синде алылчатхан чарадығларны ситкіп хайығда тударға пӧгін турғыс салған.
Чыылығның алынӌа сурии республикадағы хара тас аныпчатхан разрезтерге вагоннар чидіспин сыхханынаңар полған. СУЭК компанияның складтарында 2 миллион тонна хара тас таарлалбин чатча осхас. Республика пазы, ол сидіксіністі чапчаң пӧгер ӱчӱн, таңдох пу сурығҷа алынҷа чыылығ иртірерге чахып салған.
Чыылығның тоғызын узарадып, Виктор Зимин федеральнай бюджеттең Хакасияа хоза ахчалығ полызығ пирілчеткенінеңер искірген.
- Чыл тоозылғанӌа піске пip миллиардча салковай пирілер. Ол ахчаның 120 миллионы муниципальнай пӱдістерге пирілер. Халған ахча чал ахчазын тӧлиріне парар, - теен регион устағӌызы.
Олох туста Виктор Зимин республиканың пос парыстарын ӧскірерінҷе тӧреміл тоғынарға пӧгін турғысхан.
- Килер чылда піске хоза ӱс миллиард салковай пирерлер. Че пос салынарға чарабас. Піс пӱӱл бюджетсер ікі миллиардча салковай пос парыстарын хосчабыс, килер чылда, тізең, піске ӱс миллиард артиинаң хозарға килізер, - таныхтаан Виктор Зимин.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы