ПЫДЫРАХТА СПОРТ ТИЛИРІНЕ ІЗЕНІС ПАР
07.02.2017
Хабарлар
Пу чыл Пыдырахтағы школаа чахсы, ӧріністіг кирекнең пасталды. Чарым чыл тыхтағда полған спортзал тузаланысха кирілді.
Пу спортзалның ӱлӱзі ниик ле полбаан. Школа пӱдіріліп пасталғандох, аны ноға-да соона артыс салғаннар. Ӧӧн пӧлиин, пӱдірібізіп, азыбысханнар, че спортзал полар чардығы ізік озаринда тур халған. Итсе, пӱдірігҷілер стенелерін кӧдір салған полғаннар. Че соонаң, хырын чабызып, ӱгренҷілерге физкультура уроктарын иртірҷең орын тимнеп пиргеннер. Хайдағ ӧрініс полды андада. Че ӱр ӧрінерге киліспеен. Ікі чыл пазынаң спортзалның поллары чызып парған. Спортнаң айғазарға анда хорғыстығ полыбысхан. Пос кӱзінең тыхтирға сіренгеннерӧк, че, пӱкӱлее полны алыстырбаанда, кирек киліспинчеткен. Ахча таап алып, тыхтағ идібіскеннер. Че ирткен тусха спортзалның пасха ниме-ноолары сайбал парғаннар. Аны пӱкӱлее нааҷылир тус чит килген. Іди Таштып аймааның устағ-пастаа ӱгредіг управлениезінең хада, ӧнетін кӧстегліг программаа кіріп, Пыдырахтағы школаның спортзалын тыхтир оңдай тапханнар.
Федеральнай бюджет 969 муң 957 салковай позытхан, республика бюджеді 157 муң 805 салковай пирген, аймах 303 муң 805 салковай хосхан. Іди 1 млн 431 муң 567 салковай чыыл парған. Ол ахчаа спортзалны нааҷылабысханнар. Ағас рамалығ кӧзенектерін пластикке алыстырыбысханнар. Амды, оларны азыбызып, арығ кии позыдыбызарға чарир. Стенелерні прай сӧзірбенең арачылап салдылар. Амды меспек, тееп, оларны кірлебес. Че иң не ӧӧні - поллар наа оңдайнаң иділ парғаны. Ӧнетін линолеум тӧзелген. Амды чӱгӱр чӧрерге, ойнирға даа чахсы, нымзах. Ідӧк спортзалның оборудованиезін прай алыстырыбысханнар. Ағаа 242 муң 483 салковай хорадылған. Пӱӱн Пыдырахтағы школаның спортзалынзар кірерге дее чахсы. Анда арығ, чарых, истіг.
Кӱрген айының 27-ҷі кӱнінде нааҷылалған спортзалны пайрамни асханнар. Мындағ ӧрініснең аалдағыларны алғыстирға республикадаң, аймах кінінең аалҷылар килгеннер.
Аймахтың пазы Василий Иванович Шулбаев позының чооғында аймахта хайдағ тоғыс парчатханын искір пирген. Хайди ол таныхтаан, ирткен чылларда пӱдіріг киреенде чидіглер чахсы. Наа школалар, олған садтары, ФАП-тар тузаланысха кирілчелер. Ағаа хоза иргілен парған объекттер нааҷылалчалар, чонға чурт пӱдірілче. Пӱӱн Пыдырахсар килер алнында Таштыпта ӱс хадыллығ наа тураның чуртағҷыларына клӱстер читірілген, теен аймахтың пазы.
Пыдырахтаңар чоохтап, ол орындағы спортнаң айғасчатханнарны чахсы саринаң таныхтаан. Грек-рим кӱрезінҷе тренер Константин Андреевич Тодозаковтың ооллары пӧзік чидіглерге читчелер. Аймахта футболҷа пыдырахтағылар иң кӱстіг команда полча. Пӱӱн спортзал піди чахсы тыхтал парғаны аалда спортты тилідеріне салымнығ хозым полар тіп таныхтаан Василий Иванович.
Аймах пазының сӧстеріне хозылған депутаттар чӧбінің кнезі Вера Дмитриевна Сазанакова. Хакасияның ӱгредіг паза наука министерствозы адынаң чоох тутхан Ирина Евгеньевна Ауль. Ол Таштып аймаанда спорт киреене чахсы хайчатханнарын таныхтаан.
Нандырығ сӧстерінең аалҷыларзар айланғаннар Пыдырах аал чӧбінің кнезі Семён Михайлович Боргояков паза школа устағҷызы Анастасия Васильевна Кулумаева. Олар аймахтың устағ-пастаана, ӱгредіг паза наука министерствозына, пӱдірігҷілерге улуғ алғыстарын читіргеннер, мындағ сыйых ит пирген ӱчӱн. Постарының саринаң спортзалны хайраллирға, чахсы спортсменнерні ӧскірерге молҷааннар.
Аалның нааҷылалған спорт кінін хайди сыныхтабин халҷаң? Аймахтың устағ-пастаа позының волейбол ойнаҷаң командазын ағылтыр нооза. Пыдырахтағылар удур ікі команда турғызыбысханнар. Іди волейболҷа марығ пасталыбысхан.
Пастағы тоғазығда Таштыптаң килген аалҷыларнаң Пыдырах аалның чииттері ойнааннар. Пастағы туста аймахтың устағ-пастааның спортсменнері уғаа матап хыс сыхханнар. Пыдырахтағылар сала туртухчатханға тӧӧй пілдірген. Іди ойын аалҷыларның чиңізінең тоозылған.
Тынанып алған соонаң пыдырахтағылар сала чапчаң хайын сыхханнар. Саннар тиңнең тиңе парып одырған. Че, тимненістері читпин парып, аалдағылар утыр салғаннар. Пӱкӱлее тоғазығ 2:0 саннаң тоозылған.
Ікінҷі ойынына пазох аалҷылар Пыдырахтағы школаның командазынаң тоғыр сыхханнар. Ӱгретчілер тың маң пирбееннер. Саннарнаң тиңнең тиңе парчатханнар. Че ниме-де читпин халчатхан, аалҷылар алнына сых парыбысчатханнар. Ікі ойында аалҷылар, чиңісчі полып, 2:0 саннаң утып алғаннар. Ӱзінҷі тоғазығда пыдырахтағылар удур-тӧдір тоғасханнар. Чииттер алнында пол парғаннар.
Іди Пыдырахтағы школаның спортзалы наа тыныс алып алды тиирге чарир. Амды мында спорт чахсы тилиріне ізеніс пар.
Автор :
Георгий КУНУЧАКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы