ХАЙДИ ЫРАХХЫ ВОСТОКТА ЧИР УЧАСТОГЫН ТИККЕ АЛАРҒА?
15.02.2017
Хабарлар
Пӱӱл 1 февральдаң Россияның полған на чуртағҷызы Ыраххы Востокта пір гектар чирні тузаланарға алып алар оңдайлығ. Хакасияның чуртағҷыларына анда гектар чирні хайди алып алар оңдайдаңар чоохтапча республиканың Кадастр палатазының директоры Вера Старунская.
Чир участоктарын алар оңдайлар «Ыраххы Востоктағы федеральнай округка кірчеткен Россия субъекттеріндегі хазна паза муниципальнай собственностьтағы чир участоктарын кізілерге пирер оңдайлардаңар паза Россияның алынҷа законодательнай акттарына алызығлар кирердеңер» 2016 чылда 1 майда алылған 119-ФЗ № федеральнай законда кӧріл парғаннар.
Хакасияның Кадастр палатазы «Минің документтерім» кӧп тоғыс толдырҷаң кіннең (МФЦ) республиканың чуртағҷыларына Ыраххы Востокта чир участоктарын тикке пирердеңер сурыныстарны алардаңар чӧптезіг идіп алған.
Республиканың чуртағҷыларына гектар чирні алардаңар сурыныстарны пирерге чарир Кадастр палатазының пічіктерні алчатхан паза пирчеткен пункттарынзар: Ағбан г., Кировтың ор., 100; Саяногорск г., Заводской микрорайон, 58; Харатас г., Боградтың ор., 59, ідӧк постарына чағын МФЦ офистерінзер. Андағы тоғынҷылар, айланған кізілернің сурыныс пічиин алып, оларға онлайн-заявкалар пирерге полызарлар.
Итсе, андағ сурынысты пос алынҷа тилекейдегі хайдағ даа орыннаң пирібізерге чарир. Чир аларға сағынчатханнарға надальнийвосток.рф. сайтнаң тузаланарға кирек полар. Че ол официальнай оңдайнаң толдырҷаң тоғыс, аннаңар Хазна полызығларының пірге порталында санға алыларға кирек.
Таныхтирға кирек, прай пу тоғыстар тикке иділчелер. Пастағызын участок пис чылға пирілче. Пис чылға иділген чӧптезіг тоозылза, Сірернің полномочиеліг органзар чир участогын собственностьха пирібізердеңер алай арендаа 49 чылға пирердеңер айланар правоңар пар полар.
Автор :
Тимнеен Николай СУЛТРЕКОВ
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
