ИҢ ЧАХСЫ ПОЧТА ТОҒЫНҶЫЛАРЫН АЛҒЫСТААННАР
ХАКАСИЯ ПОЧТАЛАРЫНЫҢ 39 ИҢ ЧАХСЫ ТОҒЫНҶЫЗЫНА ААРЛАСТЫҒ ПАЗА АЛҒЫСТАС ПІЧІКТЕРІ ЧИТІРІЛГЕННЕР. СЫИЫХТАР АЛҒАННАРНЫҢ САНЫНДАЛАР (сомда сол саринаң) ТАТЬЯНА ТИМОФЕЕВНА МАЙНАГАШЕВА, ТАТЬЯНА ЛЕОНИДОВНА ГОРЕЛИКОВА, НАТАЛЬЯ ВЛАДИМИРОВНА НАТЕЙКИНА ПАЗА ТАТЬЯНА НИКОЛАЕВНА БУРГАСОВА.
Таныхтирға кирек, пу пайрамға 15 чылдаң кӧп почтада істенген тоғынҷылар килгеннер. Кӧбізі кӧп палалығлар паза почтада 40 чылға чағын тоғын салған ипчілер. Оларның санында Ағбан пилтіріндегі 3№ почта палғалызының почтальоны Лидия Алексеевна Никольская, хайзы почтада 42 чыл тоғын салған. Ағаа 2003 чылда «Хакас Республиканың иң чахсы почтальоны» ат пирілген.
«Палғалыс мастері» сыйых 9 почта тоғынҷызына пирілген. Оларның аразында Ағбандағы почтамтта 38 чыл почтальон полып тоғын салған Александра Васильевна Ивандаева, Шира почтамтының Орджоникидзе пӧлиинің почтальоны Нина Егоровна Кротова, Нымырттығдағы почта палғалызы пӧлиинің пастығы Лариса Викторовна Семёнова паза пасхазы.
Татьяна Тимофеевна Майнагашева Ағбандағы почтамттың 17№ пӧлиинде оператор-фасовщик полып 28 чыл тоғын салған. Ағаа «Почта России» ФГУП-тың Аарластығ пічии читірілген.
- Почта кӱнін хада тоғынчатханнарнаң паза сӧбіремнең чыл сай таныхтапчабыс. Оператор полып тоғынарға кӧңніме кірче. Мағаа почтальон полып тоғынарға киліскенӧк. Амғы туста газета-журналлар алчатханнарның саны хызырыл парғаны мині хомзындырча. Ӧӧнінде газета-журналларны улуғ частығлар алчалар, оларох пічіктер пасчалар, - чоохтаан Татьяна Майнагашева.
Почта тоғынҷыларын алғыстирға Россия почтазының Хакасиядағы филиалының пастығы Дарья Цилина килген. Ол прайзына чахсы чуртас, хазых паза тыстаныс алғаан.
- Сірер кӱннің сай тоғысха прай кӱзіңер салчазар, тоғыста прай ниме чахсы идерге кӱстенчезер, - таныхтаан Дарья Цилина. - Пістің тоғызыбыс нандырығлығ. Пайрамға килген почта тоғынҷыларының кӧбізі чуртас тооза почтада істен салған, андағ ӧменең піс хайдағ даа сидіктерні тобыр поларбыс.
Чир-суғ ӱгренҷең национальнай музейнің директор орынҷызы Инна Худякова почта тоғынҷыларын профессиональнай пайрамнаң алғыстаан паза музейнең хада-пірге тоғынчатхан ӱчӱн алғызын читірген.
- Кӧп чӱс чыллар почта кізілерге палғалызарға полысча. Орыс почтазы Европада иң улуғ частыға саналча. Хакасияда иң пастағы почта пӧліктері 1930 чылларда тӧстелгеннер. Халғанҷы 20 чыл аразына почта тың алыс парған. Сірер наа технологияларнаң тузаланарға ӱгреніп алғазар. Музейнің фондында почта палғалызының ниме-ноолары хайраллалча, піс чыл сай почта кӧзідиин хынып асчабыс, - чоохтаан Инна Худякова.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |