САҒЫСТЫ СӦСНЕҢ ТІРІЛДІРЧЕТКЕН УСТАР
07.03.2017
Хабарлар
Хакасияның Литераторлар туразы 3 мартта, Тилекейдегі «Хрустальное перо» писательлер кӱнін таныхтап, улуғ мероприятие иртірді. Пӱӱл ол Хакасияда чарлалған Чииттер чылына чарыдылған.
Ағбандағы ӱгретчілер ӱгредиинің, информатика паза право колледжінің актовай залында Хакасияның саблығ писательлері, чиит поэттері паза колледжтің студенттері полғаннар.
Пастап сценазар республиканың искусство школазының «Тигір хуры» олғаннар ӧмезі сыххан. Хакас кӧг композицияларынаң чонның кӧңнін тибіреткеннер.
3 мартта Тилекейдегі «Хрустальное перо» писательлер ӱлӱкӱні таныхталчатханнаңар чарыдығлығ чоох полған. Анзын аалҷыларға паза чииттерге пілерге чапсых нооза. 18 чӱс чылда перо поэзияның тании полыбысхан. 1986 чылда 3 мартта Тиксі тилекейдегі писатель кӱнін таныхтирдаңар чарадығ алылған, аны «Хрустальное перо» адап салғаннар. Хрусталь сынның тании полчатса, перо ниик, кииҷе учухчатхан нимені таныхтапча.
Писательлер кӱнінде пасчатхан чайаачыларға кӧп сыйыхтар читіріледір. Хакасияның культура министерствозы пістің писательлерібіске сыйыхтар тимнеп салтыр. Хакасияның культура министрінің орынҷызы, культура ис-пайы пӧлиинің устағҷызы Ирина Браим алғыстас сӧстерін читірген:
- Полғаныңар ла чонның сағызын тибіретчеткен, тирең сағысха тӱзірчеткен писательлер книгаларын адап поларзар. Оларның санында Хакасияның саблығ писательлері Николай Доможаков, Моисей Баинов, поэт Валерий Майнашев... Пӱӱнгі кӱнде Хакасияның писательлеріне ахчалығ сыйыхтар пирілче. 2014 чылдаң Николай Доможаковтың сыйии чарлалған. Піс, сірернің хығырығҷыларыңар, мыннаң мындар чайаачы тоғыстарың чарыхха сығарын сағыпчабыс.
Хакасияның культура министерствозының Аарластығ пічиинең чиит литераторларға полызығ пирчеткені, хакас тілін паза литературазын хайраллир тоғысты апарчатхан, чайаачы узы ӱчӱн Александр Котожеков сыйыхтатхан. Ідӧк Аарластығ пічіктер Руфина Чистогашеваа, Татьяна Майнагашеваа, Юрий Черчинскийге, Нина Майнагашеваа читірілген.
Хакасияның культура министерствозының алғыстас пічіктерін Татьяна Казанаева, Надежда Соломачева алғаннар.
Хакасияның улуғлар чӧбінің Ағбандағы пӧлиинің кнезі Виктор Чепчигашев президиумның адынаң алғыстаан. Хакасияның культура паза литература чуртазында, ӧткін аралазып, улуғ хозым итчеткен ӱчӱн Россияның паза Хакасияның саблығ артизі, «Алтынай» ипчілер пірігізінің чӧбінің кнезі Татьяна Майнагашеваа «Чахсы киректер ӱчӱн» орден читірілген.
Чон алнынзар алғыстас сӧстерінең чиит авторлар сыхханнар. Олар пӱӱнгі кӱндегі литературадаңар сағыстарынаң ӱлескеннер. Чиит чайаачылар танығлығ кӱнге чарыдылған алғыстас кибелістерін тимнеп салтырлар. Таныхтирға кирек, амғы хакас чииттер ӧӧнінде орыс тілінең кибелістер пасчалар. Хакас тілінең пасчатханнарның саны ас. Анзы пілдістіг, хайдағ тілнең сағынчазың, чоохтанчазың, олох тілнең пазарзың. Че чииттерібіс хоос сӧстең хыйа турбинчатханы ӧріністіг.
Хакасияның композиторлар пірігізінің кізізі Юрий Киштеев орта таныхтаан: «Кибелістер чохта, сарыннар чоғыл». Пілдістіг, композиторлар хайдағ даа музыка произведениелерін чайапчалар, че сӧстер чох полза, сарын тӧрібес.
- Сарыннар пазарым килібіскенінде, тоғызым парбиныбысхан, - сағыстарынаң ӱлескен Юрий Егорович. - Че пірсінде, Валерий Майнашевтің кибелізін хығырып алғанымда, чӱреем -чанымны ізіг чалын ӧртеен. Андада пастағы сарыным пазылған. Баиновтың кибелістері кізіні позынзар хайхастығ кӱснең тартчалар. Кибеліс - ол хайдағ-да хайхастығ кӱс тиирге кирек. Мин чайаачыларға кӧп книгалар, кибелістер пазарға алғапчам. Сірер чох - сарыннар чоғыл.
Ирткен чыл Хакасияда Литература чылына чарыдылған полған, Моисей Баиновха, Николай Доможаковха чарыдылған литература иирлері ирткеннер. Ідӧк пайрамнығ частарын таныхтаан писательлернең чайаачы тоғазығлар полған. 2017 чылда Хакасия пайрамнарын таныхтир писатель-поэттерге пай. Пӱӱл Геннадий Маерков, Юрий Иванов, Василий Кобельков, Лариса Катаева, Алексей Козловский, Валентина Татарова, Геннадий Синельников, Игнат Миягашев, Людмила Костякова, Радион Топоев пайрамнығ частарын таныхтирлар.
Хакасияның Литераторлар туразының директоры Надежда Бурнакова, алғыстас сӧстерін читіріп, поэттердеңер оолғыҷааның сағызын читірген: «Іҷең, мин чир ӱстӱнде математиктер паза физиктер иң хыйғалар тіп сағынғам. Че иң хыйға кізілер - ол поэттер! Олар сӧстерні рифмаа салып, оларға тирең сағыс хосчалар!.. »
Литераторлар туразынаң чайаачыларға сыйыхтар читірілген. Писательлер дее хуруғ килбееннер, олар постарының тоғыстарын культура министерствозына, ӱгретчілер колледжіне читір пиргеннер.
Хакасияның писательлер пірігізінің кнезі Альбина Курбижекова орта чоохтаан: «Пасчатхан чон хаҷан даа чиит поладыр. Сағынчатхан кізі кирібинче. Пазыбысха ах хыр саап таа парған полза, піс хаҷанға даа пӧзік тасхыллар чіли халчадарбыс... »
Мин, аның сӧстеріне хозылып, поэт-писательлерібістеңер піди тиирҷікпін: «Олар сағысты, сӧске айландырып, тірілдірчеткен паза чонға читірчеткен устар... »
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде