ПРОМЫШЛЕННОСТЬТЫ ТИЛӀТЧЕҢ СУРЫҒЛАР ӰЗӰРІЛГЕН
03.03.2017
Хабарлар
РОССИЯ ПРАВИТЕЛЬСТВОЗЫНЫҢ КНЕЗІ ДМИТРИЙ МЕДВЕДЕВ ПАЗА ХАКАСИЯНЫҢ ПАЗЫ ВИКТОР ЗИМИН СИБИРЬДЕГІ ПРОМЫШЛЕННОСТЬТЫ ТИЛІТЧЕҢ ОҢДАЙЛАРНЫ ӰЗӰРГЕННЕР. ТОҒАЗЫҒ РОССИЯНЫҢ «СОЧИ-2017» ИНВЕСТИЦИЯ ФОРУМЫҢДА ИРТКЕН.
РОССИЯ ПРАВИТЕЛЬСТВОЗЫНЫҢ КНЕЗІ ДМИТРИЙ МЕДВЕДЕВ РЕСПУБЛИКАНЫҢ ЭКСПОЗИЦИЯЗЫН КӦРІП АЛАРҒА КИЛГЕН. РЕГИОН УСТАҒҶЫЗЫ ВИКТОР ЗИМИН АНЫ «ХАКАС РЕСПУБЛИКАНЫҢ ПРОМЫШЛЕННОСТЬ КӰЗІН 2030 ЧЫЛҒА ТЕЕРЕ ТИЛІДЕРІ» КОМПЛЕКСТІГ ПРОЕКТНЕҢ ТАНЫСТЫРҒАН. ПРОМЫШЛЕННОСТЬ ТИЛІЗІНІҢ СТРАТЕГИЧЕСКАЙ ПЛАНЫ КӦП ПРОИЗВОДСТВО КӦСТЕГЛЕРІН ПІРІКТІРЧЕ, КӦЗІДІМГЕ, ХАРА ТАС ПРОМЫШЛЕННОЗЫН, АЛЮМИНИЙ СЫҒАРЫЗЫН, ГИДРОЭНЕРГЕТИКАНЫ ПАЗА ХАРА МЕТАЛЛУРГИЯНЫ ТИЛӀДЕРӀН. АНЫҢ СЫЛТААНДА НАА ТОҒЫС ОРЫННАРЫ ТӦСТЕЛЕР, РЕСПУБЛИКА БЮДЖЕДІНІҢ ПАРЫСТАРЫ ӦЗЕР ПАЗА ЭКОНОМИКА КӦДІРІЛЕР. ІДӦК ЭКОЛОГИЯ СФЕРАЗЫНДАҒЫ СУРЫҒЛАР ПӦГІЛЕР.
Прай проекттер удур-тӧдір пик палғалысчалар, ол санда транспорт-логистика инфраструктуразын тилідері киректелчеткені. Кӧбізі амох чуртасха кирілче, анзы таарлағлар сині чыл сай нинҷе-де миллион тоннаа ӧсчеткеніне ағылча. 2016 чылда республика правительствозы таарлағлар ӧсчеткенінең палғалыстығ сидіксіністерні пӧгер кӧстегліг мероприятиелерні изерістіре апарған.
Республиканың проектіне алынҷа хайығ Россия правительствозы кнезінің орынҷызы Аркадий Дворкович салған. Виктор Зимин аннаң пір неделя азынада Москвада тоғасхан. Россияның промышленность паза садығ министрі Денис Мантуров андағох хайығ салған. Ол Хакасияның экспозициязын кӧріп алған паза республика пазы Виктор Зиминнең хада экономикаҷа пастағларны ӱзӱрген.
Анзынаң пасха, форумда Хакасияның ӧӧн инвест-партнёрлары араласханнар - СУЭК паза РУСАЛ. Экспозицияны кӧрерге ідӧк «РЖД» ОАО-ның президенті Олег Белозеров кил парған. Тоғазығда чоох Транссибирскай магистральның ӱстӱнзархы чолында паза пасха чолларында таарлағлар тартчаң оңдайны алғыдардаңар парған.
Виктор Зимин федеральнай синдегі прай устағҷыларға паза бизнес-партнёрларға Хакасияа хайығ салчатханнары паза стратегия саринаң уғаа кирек полчатхан проекттерге хабасчатханнары ӱчӱн алғызын читірген:
- Республика правительствозы паза пістің бизнес-партнёрлар аразында иртірілген тоғыс азынада чахсы салтар пирчеткені паза наа оңдайлар асчатханы ӧріндірче. Форумда Хакасияның площадказында полғаннарның прайзы пістің проекттерні чуртасха кирерінде полызарға тимде полчатханнарын кӧзіткен. Анзы уғаа чахсы, - республика форумда араласханының салтарын иткен Хакасияның пазы Виктор Зимин. - Пӱӱнгі кӱнде пістің прай ӧӧн партнёрларыбыс ол проекттерде араласчалар. Піс чирібіс хоостыра тың на улуғ нимес регионмыс, че промышленность кӱзінҷе, инвестиция программаларынҷа Хакасия - алнындағыларның пірсі. Піс чоохха ла кірбинчебіс, піс сынынаң тоғынчатхан проекттерні кӧзітчебіс, аннаңар піске хайығ салчалар. Хакасия пӱӱн Россия Федерациязында ӧзіс кӧзітчеткен кӧп нимес орыннарның пірсі, пістің промышленность ӧзізінің индексі 109,3 процент. Анзы Россиядағы ортымах синнең пӧзік. Піс ізендірчебіс - 2017 чылда улам пӧзік ӧзіс кӧзідербіс.
Ӱзӱрігнің салтарларынҷа Дмитрий Медведев чағынғы туста федеральнай министерстволарға Хакасиянаң паза инвесторларнаң пірге тоғынардаңар чахығ пирерге чарадығ алған.
Таныхтирға кирек, Хакасия Россияның инвестиция форумында араласхан сылтаанда, проекттерні чуртасха кирер сурығларның ӱзӱриин узарадардаңар Россияның вице-премьері Аркадий Дворковичнең чӧптезіг иділген. Ол тоғыс Хызылчардағы экономика форумында парар. Форумда Пиидегі хара тас кластерін тилідеріне чарыдылған алынҷа чыылығ иртер. Анда федеральнай правительствонаң паза бизнес-партнёрларнаң хада пу проектті чуртасха кирерге киректелчеткен ӧӧн сурығлар ӱзӱрілер.
Автор :
"Хабар"
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы