ПРЕПОДАВАТЕЛЬЛЕР ЧАЙААЧЫ ОҢДАЙЛАРЫНАҢ СЫНАСХАННАР
14.03.2017
Хабарлар
ПОЛҒАН НА СТУДЕНТ ПРЕПОДАВАТЕЛЬЛЕРІНІҢ ЛЕКЦИЯ ХЫҒЫРЧАТХАНЫНА, СЫНЫХТАҒЛЫҒ ТОҒЫСТАР ИРТІРЧЕТКЕНІНЕ КӦНІК ПАРҒАН ДАА ПОЛАР. ЧЕ СЦЕНАДА САРНАПЧАТХАНЫН, РЕП ХЫҒЫРЧАТХАНЫН АЛАЙ БА ІСКЕРКІЛЕРНІҢ ТЕЕЛБЕКТЕРІН ТОЛДЫРЧАТХАНЫН АМҒА ТЕЕРЕ КӦРЕРГЕ КИЛІСПЕЕН ПОЛАР, НЕКЕ. ИРТКЕН НЕДЕЛЯДА Н.Ф.КАТАНОВТЫҢ АДЫНАҢ ХАКАС ХАЗНА УНИВЕРСИТЕДІНДЕ УҒАА ЧАПСЫХ МАРЫҒ ПОЛҒАН. ХГУ-да ПАСТАҒЫЗЫН НА ПРЕПОДАВАТЕЛЬЛЕРНІҢ «ЧАЙАЛҒАН» ЧАЙААЧЫ МАРИИ ИРТКЕН. АНДА ИНСТИТУТТАРНЫҢ ПРЕПОДАВАТЕЛЬЛЕР ӦМЕЛЕРІ ЧАЙААЧЫ ОҢДАЙЛАРЫНАҢ, ЧІТІГ САҒЫСТАРЫНАҢ СЫНАСХАННАР. ПРОФЕССОРЛАР, ДОКТОРЛАР, ДОЦЕНТТЕР ПАЗА ДАА ПАСХАЗЫ, УЧЁНАЙ ПОЛЧАТХАННАРЫН УНДУТ САПЫП, НИНҶЕ-ДЕ ЧАСХА АРТИСТ ПОЛЫБЫСХАННАР.
Преподавательлерні кӧріп алар ӱчӱн паза оларға хабас пирер ӱчӱн, Хакасияның ӧӧн университедінің актовай залынзар оларның студенттері, магистранттары паза хада тоғынчатхан арғыстары чыылысханнар. Залда пос орын чох полған. Полған на институт-колледжтің студенттері постарының ӱгредіг заведениезінің ӧңніг футболкаларын кис салтырлар паза ӧнетін плакаттар тимнеп килтірлер. Марығда ХГУ-ның 10 азыра институт-колледжі араласхан.
Марығның пастағы чардығында араласчылар жюрині ӧмелерінең таныстырғаннар паза ӱгредігде хайдағ наа технологияларнаң тузаланчатханнарын кӧзіткеннер. Халғанҷы чардыхта, тізең, преподавательлер «Минің профессиям - преподаватель» тема хоостыра чайаачы номернең сыхханнар. Марығның пу чардығы иң хынығ паза чапсых полған тіп сағынчам. Мында прайзын хайхатхан полар тӧреміл педагогика ӱгредии институдының преподавательлері. Олар индустарның сарынын, орыс оңдайына алыстырып, сценада толдырғаннар. Ӧмедегі чалғыс ирен, доцент Андрей Николаевич Карамчаков сарнапчатхан паза теелбек салчатхан полыбысхан, аның «кӧӧленчеткен» хызы, чиит преподаватель, ағаа сарын пастыра ідӧк нандырған. Студенттер, постарының преподавательлерінзер кӧріп, матап хайхаанға тӧӧй полғаннар, олар залға толдыра айа сапханнар паза тыыда сығырысханнар. Я, олар ӱгретчілері сценада артист чіли тудынчатханнарын хаҷан даа кӧрбеен полбастар ба?!
- Амға теере Хакас хазна университедінде преподавательлернің чайаачы марығлары иртірілбеен тиирге чарир. Аннаңар піске оларның чайаачы оңдайларын кӧрерге оңдай чох полған. Амды, тізең, піс пастағызын на преподавательлерібіс сценада тудынчатханнарын кӧріп алдыбыс. Таңнастығ, олар, чииттерок чiли, сарнап полчалар, айдас теелбек салчалар! Олаңай сарынны пос оңдайли алыстырып толдырғаннарын кӧрерге чапсых полған! - сағызынаң ӱлесче филология паза культуралар аразындағы палғалыс институдының студенті Валентина Свириденко.
Аал хонии институдының студенттерi, преподавательлеріне хабас пирер ӱчӱн, университетсер адайлығ килгеннер. Кічіг нимес, улуғ! Олар сценада мал имҷізі специальнозына хайди ӱгренчеткеннерін кӧзіткеннер.
- Піс сценада кӧзіткебіс, хайди адайларны хайраллирға паза имнирге кирек. Чооғыбыс олаңай полбас ӱчӱн, адайлығ килгебіс. Аның ады - Мухтар. Пістің преподавательлерібіс сценада пip дее туртухпин тудынғаннар, институттың адын турыстыра кӧзіткеннер, - чоохтапча аал хонии институдының студенті Алина Мироненко.
- Сағынчам, ӱгредіг тузында даа, сценада даа преподавательлерге чӱрексіністіг. Піс занятиелерде, студенттернің алнынзар сыхчатсабыс, чӱрексіпчебіс, мында даа чочыныстығ пілдірче. Піс марыға ирткен чылдаң тимненіп пастаабыс. Хыйғы сағынып алғабыс: «Килген, кӧрген, ӱгрет салған». Сағынчам, піс ағаа турысчабыс! - чоохтапча ӱгретчілер тимнеҷең, информатика паза право колледжінің преподавательі Ирина Балыкова.
Марығлар тоозылғанда, преподавательлерзер паза студенттерзер университеттің ректоры Татьяна Краснова айланған.
- Пістің преподавательлерібіс иң артых, хыйға полчатханын піс пілген полғабыс, че пумарығ оларның чайаачы оңдайларын кӧзітті. Институттарның директорлары, профессорлары, доценттері чайаачы артисттердең пір дее халбинчалар! - теен ол.
Анаң полған на институтха дипломнар читірілген паза орыннар пирілген. «Чайалған» марығда 3-ҷі орынға искусство институды турысхан, 2-ҷі орында - ӱгретчілер тимнеҷең, информатика паза право колледжi , 1-ғы орында - имнег-психология институды.
Хайди таныхтаан чооғында Хакасияның Ӧӧркі Чӧбінің культураӌа, ӱгредігҷе паза наукаҷа комитедінің кнезі паза жюри кнезі Лариса Карпова, преподавательлернің чайаачы марии килчеткен чылларда хайди даа узарадыларға кирек.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы