ХАКАСИЯНЫҢ ПАЗЫ РОССИЯНЫҢ ӰГРЕДІГ МИНИСТРІНЕҢ ТОҒАСХАН
17.03.2017
Хабарлар
Хакасияның пазы Виктор Зимин Россия Федeрациязының ӱгредіг паза наука министрі Ольга Васильеванаң тоғасхан. Тоғазығ Москвада министерствода ирткен, анда ідӧк Хакасия пазының социальнай сурығларҷа орынҷызы Ирина Смолина паза республиканың ӱгредіг паза наука министрі Галина Салата араласханнар.
Чоохтазығда республикаа танығлығ полчатхан нинҷе-де сурығ ӱзӱрілген, ол санда регионны «Россия Федерациязының субъекттеріне тиксі ӱгредіг организацияларында наа орыннар тӧстиріне хабазары» хазна программазында араластырары. Хакасияны пу кӧстегҷе иң не пастап Орджоникидзе аймаандағы ӱс аалда 150 орыннығ школаны хысха тус аразына читіре пӱдірібізер, ідӧк Ағбанда 1000 орыннығ школа пӱдіреріне хабазығ алар сурығлар сағыссыратхан. Хакасияның ӧӧн городы пӱӱн ӧткін тиліпче, Ағбанда 20 муң артиинаң ӱгренҷі, оларның 2500-зі - пастағы класс ӱгренҷізі. Пӱӱлгі ӱгредіг чылында Ағбан школаларының пастағы класстарынзар парғаннарның ортымах саны - 30 кізі. Анзынаң пасха, город школаларының 80 процентіне ікі сменалығ тоғынарға килісче, полған на тӧртінҷі ӱгренҷі ікінҷі сменада ӱгренче.
Хакасияның пазы Виктор Зимин тоғазығның салтарынаңар чоохтап, ол уғаа тӱзімніг ирт парғанын таныхтаан. Аның чооғынаң, министр региондағы киректі чахсы пілче, чоохтазарға оой полған.
- Ӧӧн городыбысха 1000 орыннығ школаны пӱдірерінҷе хабазығ пирілер тіп пісті ізендір салғаннар, ол уғаа кирек сурығ. Пӱдіріг амох пасталыбысхан, аның тузы уғаа хысха паза аны сайбирға чарабас нооза, - таныхтаан регион устағҷызы. - Піс ідӧк ӱгретчі тураларын пӱдірерінҷе республикаа хабазар оңдайларны ӱзӱргебіс. Мындағ ӱгредіг учреждениелері, хайда пасталығ класстар ӱгретчізі чуртапча паза олох туста олғаннарны ӱгретче, улуғ нимес национальнай аалларға уғаа кирек. Ол оңдай ідӧк чахсы специалисттерні тартарға, аалны паза национальнай культураны хайраллирға полысча. Ағаа хоза, кічіг частығ ӱгренҷілерні, сӧбіредең хыйа тартып, пасха аалларзар тарт чӧрерге кирек чоғыл. Хакасия - хазнадағы пастағы субъекттернің пірсі, хайзында мындағ программа чуртасха кирілче. Пӱӱнгі кӱнде пістің пис ӱгретчі туразы тоғынча, тӧртті пӱдірерге пӧгінчебіс. Ольга Юрьевна мындағ кічіг комплекттіг школалар кирек полчатханын чахсы оңарча. Аннаңар мағаа министрні чӧптирге киліспеен, піс мындох пір сағыс-кӧрістіг кізіні таап алғабыс, анзы уғаа ӧріністіг.
Виктор Зимин ідӧк О.Ю.Васильеваны Хакасиязар ааллап хығырғанынаңар искірген:
- Ольга Васильевна - тархын наукаларының докторы, ол пістің археологиялығ ис-пайыбыстаңар, менгирлердеңер, кӱргеннердеңер чахсы пілче. Пӱӱн піс тархын-культура ис-пайын хайраллирынҷа, сабландырарынҷа улуғ тоғыс апарчабыс. Ӱгредігде дее пістің кӧп чапсых киректер полча, аннаңар министр ааллап килерге ынаан. Министр чорыхнаң чағынғы туста килеріне ізенчем.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы