ИТТІГ ХАЗАН ХАЙНААН, КУЙБЫШЕВТЕГІ ЧОН КӦГЛЕСКЕН
24.03.2017
Хабарлар
Пии аймаандағы Куйбышев аал чуртағҷылары 22 мартта Культура туразы хыринда Чыл пазын таныхтадылар.
Улӱкӱн 14.00 часта пасталар тееннер. Культура туразынзар кіргенде, анда прайзы маң чохха тӱсчеткен. Угре хайнадарға хазан сығар салтырлар. Иреннер тасхар От инені азыраҷаң орын тимнепчеткеннер, музыка аппаратуразын сығарчатханнар. Кӧрзем, пір 8-9 частығ оолах, велосипедтіг аал аразынҷа ойлат чӧріп, тоғасхан кізілерге искір чӧрче: «Клубта ӱлӱкӱн полар». Таң пос кӧңнінең алай клуб тоғынҷылары аалдағы чуртағҷыларны хығырарға нымзаныбысханнар ба аны.
Культура туразы хыринзар олған-узах, чиит іҷелер, улуғ частығлар кӧӧлҷе чыылыс сыхханнар. Чиит ооллар мотоциклліг ойлат килгеннер.
Улӱкӱнні алғыстас сӧстерінең Куйбышев аал чӧбінің пазы Леонид Чаптыков асхан:
- Аарлығ чир-суғҷыларым, Куйбышев аал чоны, алғыстапчам сірерні Чыл пазы ӱлӱкӱннең, Хыныс, чуртасха ӧрініс сірернең хада ползын!
Алғыстасха Пии аймааның культура управлениезінің пастығы Юрий Кощеев хозылған:
- Пии аймааның администрациязы паза культура управлениезі тоғынҷыларының адынаң прайзын Чыл пазы ӱлӱкӱннең алғыстирға чарадыңар. Пу Наа чылны сірер наа аал чӧбі пазынаң хада удурлапчазар. Мин чиит устағҷаа, Леонид Семёнович Чаптыковха, чидігліг тоғыс алғапчам. Аал чуртағҷылары, сірердең ағаа полызарға сурынчам. Куйбышев пу Наа чылдаң сығара ӧңнензін, мында чарых чуртас ползын!
Мындағ чылығ сӧстер соонаң ӱлӱкӱннің алғасчызы Валентина Чебодаева паза «Орай иир» фольклор ӧмезі килген чонны кибір хоостыра ирбен отнаң аластааннар. Анзы чуртас иптіг полар ӱчӱн, чабал ниме хыйа парар ӱчӱн иртірілче.
Хакас ӱлӱкӱннері От инені азырирынаң пасталча. Аны, аарлап, улуғлап, алғасчы Валентина Чебодаева азыраан, анаң олох Ӧӧркі чайааннарға оор читірген. Ол арада хакас кӧгенектіг чиит хызыҷах ӱлӱкӱнге килген улусха аймах ӧңніг чаламалар таратхан. Анаң алғасчы прайзын чаламалар палғирға хығырған.
- Отха, кӱнге хызыл чалама палғалча, тигірге, суға - кӧк чалама, отха, пӱрге - откӧк чалама, ах сағыс ӱчӱн - ах чалама, - чоохтап одырған алғасчы.
Анаң Чыл пазының тойы пасталған. «Орай иир» фольклор ӧмезі тасхархы сценада сарын-кӧглер чайған, прайзын теелбек саларға хығырған. Сала оортах ооллар кӱстерінең сынасханнар. Хакас спорт марығларын Куйбышев аал школазының физкультура ӱгретчізі Олег Чичинин иртірген. Ооллар ағас тартысханнар, хол пазысханнар, кӱрескеннер. Чиңісчіні ӧӧн сыйых - тіріг хой - сағаан. Аны, кӱресте прайзын чиңіп, 29 частығ Владимир Чаптыков утып алған. Улӱкӱнні иртірерге хабазып, аал чуртағҷылары Евгений Шнайдер паза Владимир Чебокчинов хойлар пиргеннер.
Хакас чонның киртінізінең, чир-чайаан хысхы тооза узупча, 22 мартта кӱннің сустары чирні чылыт сыхса, ол усхунча, часхы пасталча.
Автор :
Татьяна ТЮТЮБЕЕВА, Сомнар Максим АХПАШЕВТИ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы