САН ПИРІСТЕРДЕҢ ТОҒЫС ТЫЫДЫЛҒАНЫ КӦРІНЧЕ
24.03.2017
Хабарлар
Хакасияның Ӧӧркі Чӧп президиумы 22 мартта ирткен чыылығда он артиинаң сурығ ӱзӱрібіскен. Ӧӧн сурығлар санында пала алып ӧскірчеткен іҷе-пабаларға тӧлелчеткен ахча синін ӧскірердеңер паза олғаннарның чайғыдағы тынаан хорғыс чох идерін тыыдардаңар закон проекттері полған.
Ідӧк президиумдағылар Хакасияҷа МВД министрінің, Хакасияның Сыныхтағ-сананыс палатазының, Хакасиядағы кізі праволарынҷа паза пала праволарынҷа уполномоченнайларның сан пирістерінең танызып алғаннар. Чыылығны Ӧӧркі Чӧп кнезі Владимир Штыгашев апарған.
Пала алып ӧскірчеткен іҷе-пабаларға тӧлелчеткен ахча синін пӱӱл ӧскірердеңер закон проектінең Хакасияның ӱгредіг паза наука министрінің орынҷызы Ирина Ауль таныстырған. Хайди ол таныхтаан, ол тӧлег ахчазына ирткен чылдаң сығара индексация иділбеен. Республикада пала алып ӧскірчеткен 535 сӧбіре саналча, олар 1337 пала ӧскірчелер. Хакасияның пазы Виктор Зимин пӱӱл ол іҷе-пабаларға тӧлелчеткен ахча синін ӧскірібізер пастағнаң сыххан. Амғы туста андағ іҷе-пабаларға пір пала ӱчӱн айда 5554 салковай тӧлелче. Закон проектінҷе 7500 салковайға теере ӧскірібізері кӧрілче. Министр орынҷызы искіриинең, анзы хоза хорадығлар киректебес, ол ахча республика бюджедінде азынада салылған.
- Закон пӱӱлгі чылның 1 январьынаң тоғынчатханына саналар, аннаңар закон проектін килер сессияның кӱн суриинзар кирерге кирек, - таныхтаан Ӧӧркі Чӧп кнезі Владимир Штыгашев.
Паза пір закон проекті олғаннарның чайғыдағы тынаана теелген. Закон проектін Ӧӧркі Чӧптің культураҷа, ӱгредігҷе паза наукаҷа комитедінің кнезі Лариса Карпова тимнептір. Хайди ол таныхтаан, аның ӧӧн кӧстее - палаларның чайғы тынаан хорғыс чох идерін тыыдары. Закон проекті хоостыра Хакасия Правительствозының пу сферадағы полномочиелерін орталадары паза алғыдары кӧрілче. Ол оңдайнаң ӱлгӱдегілер чайғыдағы хазыхтандырҷаң олған лагерьлерінің тоғызын сыныхтағда тударын тыыдыбызарлар.
- Карелиядағы олған лагерьінде палалар Сямозеро кӧлде саайланған соонаң федеральнай законодательство алыстырылған, республика законы ағаа килістіре иділче, - чарытхан Лариса Карпова.
Ӧӧркі Чӧп президиумының хайиина пу чыылығда пір саңай тӧрт сан пиріс пирілген: Хакасияҷа МВД министрі Илья Ольховскийнің, Хакасияның Сыныхтағ-сананыс палатазының кнезі Ольга Ляхтың, Хакасиядағы кізі праволарынҷа уполномоченнай Александр Чистотиннің паза пала праволарынҷа уполномоченнай Сергей Сапеевтің. Прай сан пирістер ирткен чылның тоғыс салтарларынаң палғалыстығ. Кӧзідімге, Сыныхтағ-сананыс палатазы 2016 чылда 20 сыныхтағлығ паза эксперт-ӱзӱрігліг мероприятие иртіртір, тиксі толдырығлығ ӱлгӱнің паза орындағы пос устаныстың 95 объекті сыныхталтыр. Сыныхтағлар салтарларынҷа, 100,7 миллион салковайға сайбағлар табылтыр. Ол санда бюджет ахчазынаң тӱзімніг нимес тузаланғаны - 20,4 миллион салковайға, федеральнай паза региональнай законнарны сайбап тузаланғаны - 80,3 миллион салковайға.
Ӧӧркі Чӧп президиумы, сан пирістернең танызып, ирткен чылда прайзы даа улуғ тоғыс ит салғанын таныхтаан.
- Прай хазна ӱлгӱ органнары тоғыстарын тыыдыбысханнар, анзы сан пирістерде чахсы кӧрінче, - таныхтаан парламент устағҷызы Владимир Штыгашев.
Ӧӧркі Чӧп кнезі ідӧк, республика чуртағҷыларын ол тоғыснаң таныстырар ӱчӱн, прай сан пирістерні, хысхаҷахти тимнеп, хабар таратчаң средстволарда чарыхха сығарыбызарға чӧп пирген.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде