СЛУЖБАҢАР ЧАХСЫ ИРТСІН
21.04.2017
Хабарлар
АҒБАНДА 18 АПРЕЛЬДЕ РЕСПУБЛИКАНЫҢ ЧААҶЫЛАР КОМИССАРИАДЫНДА ПӰӰЛГІ ЧАСХЫДАҒЫ ХЫҒЫРТЫҒДА ЧИИТ ООЛЛАРНЫҢ АРМИЯА ПАСТАҒЫ ӰДЕЗИИ ИРТКЕН. ПУ КӰННЕҢ СЫҒАРА ОЛАР ЧААҶЫ СЛУЖБАЗЫН АПАРЧАЛАР.
МЕРОПРИЯТИЕ ПАСТАЛҒАНДА, ПРИЗЫВНИКТЕР СТРОЙҒА ТУРЫБЫСХАННАР. РЕСПУБЛИКАНЫҢ ЧААҶЫЛАР КОМИССАРЫ ВИКТОР МАКСИМЧУККА ПРИЗЫВНИКТЕР ӰДЕЗІГЕ ТИМДЕЗІНЕҢЕР ИСКІРГЕННЕР. СТРОЙ АЛНЫНЗАР ЧИҢІС ЗНАМЯЗЫНЫҢ ХОБЫРҒАНЫ СЫҒАРЫЛҒАН.
ПАСТАП ХАКАСИЯ ПРАВИТЕЛЬСТВОЗЫНЫҢ МОБИЛИЗАЦИЯ ТОҒЫЗЫНҶА КОМИТЕТ КНЕЗІ ВАСИЛИЙ БУДЫЛИН ЧООХ ТУТХАН. АНЫҢ ЧООҒЫНАҢ, ПУ КӰН ХАКАСИЯА УҒАА ТАНЫҒЛЫҒ ПОЛЧА, РЕСПУБЛИКА ООЛЛАРЫ ТИРІГЛІГ КӰСТЕРЗЕР СЛУЖБАА АЛЫЛЧАЛАР. АМҒЫ ТУСТА РОССИЯНЫҢ ТИРІГЛІГ КӰСТЕРІН ЧОН ПӦЗІК ПААЛАПЧА, ВОЙСКОЛАРНЫ НАА КӰСТІГ ЧАА ТЕХНИКАЗЫНАҢ ТИРІНДІРЧЕЛЕР.
- Ізенчебіс, пір чыл службазы сірерге тикке парбас, - чооғында таныхтаан Василий Будылин. - Службаңар иптіг иртсін.
Ағбан пилтірі аймаа пазы Елена Егорова чиит оолларға пір чыл пір ай чіли ирт парзын, службада алылған опыт чуртаста улуғ туза пирзін тіп алғаан.
Центральнай чаа округ штабының мобилизация управлениезі пастығының орынҷызы, I рангтың капитаны Михаил Лупушор оолларға пирілген присягаа турыстығ поларға, чаа специальнозына чахсы ӱгреніп аларға алғаан.
- Хакасиядаң парған чааҷылар службаны хаҷан даа турыстығ иртчелер, - таныхтаан Михаил Иванович.
- Сірер ідӧк службаңарны турыстыра иртіңер. Сірер паба-іҷеңернің поғдархазы полчазар.
Пайрамнығ ӱдезігде ідӧк республиканың ветераннар чӧбі кнезінің орынҷызы Юрий Седых паза республиканың чааҷылар комиссары Виктор Максимчук чоох тутханнар. Чааҷылар комиссары чооғынаң, призывниктер пӱӱннең сығара чааҷы службазын апарчалар. Олар хазнабысты арачылирға тимде поларға киректер.
- Войсколарзар читсе, сірер Тирігліг кӱстернің чардығы поларзар. Чааҷы службазы оой нимес. Полған на сидіксіністі тобырарға тимде поларға кирексер. Командирлернің чооғын хаҷан даа истіңер. Чааҷы школазын заочно иртібізер оңдай чоғыл. Срочнай служба соонда сірернің піреезі контракт службазын даа таллап алар. Службаңар чахсы иртсін, - алғаан Виктор Максимчук.
Ӱндезігде призывниктерге туған-чағыннарынаң анымҷохтазып аларға оңдай пирілген. Апполон Самринні паба-іҷезі паза ууҷазы ӱдезерге килгеннер.
- Мин Салғын аалда чуртапчам, - чоохтапча Апполон. - Школа соонаң аал хонии колледжін тоосхам. Чааҷы службазы чахсы иртеріне ізенчем. Миннең хада парчатхан призывниктернең танызып алғам, оларнаң ынағлазарбын.
Апполонның іҷезі Ольга Николаевна, чалғыс оолғын ӱдезіп, уғаа тың сағыссырапча. Пабазы Дмитрий Апполонович алты харындазын чааҷы службазына ӱдескен.
- Амды оолғымны армияа ӱдезерге тус читті, - чоохтапча Дмитрий Самрин. - Пір чыл табырах ирт парар тіп сағынчам.
Призывниктернің пір командазы национальнай гвардияның войсколарында Москва облазындағы Ашукино поселокта служба иртер, ікінҷі командазы - Чаа-кии кӱстерінде Ростов облазындағы Новочеркасск городта.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы