ХАКАСИЯНЫҢ ПАЗЫ ХАЗНА ПРЕЗИДЕНТІНЕҢ ТОҒАСХАН
21.04.2017
Хабарлар
Алындағы кӱн Москвада Хакасияның пазы Виктор Зимин Россия президенті Владимир Путиннең тоғасхан. Тоғазығда регион устағҷызы республикадағы чуртас-экономика киреенеңер чоохтап пирген. Сидіксіністер полза даа, республика тӱзімніг тилізін хайраллап халғанын таныхтаан.
- 2016 чылның салтарларынҷа, пістің промышленность сығарызының индексі 111,4 процент пол парған, піс хазнада читінҷі орындабыс. Ідӧк прай чыллар аразына экономикадағы региональнай валовай продукттың ӧзізі таныхталча, - искірген Виктор Зимин. - Пістің иң тӧбін инфляция, Россиядағы ортымах кӧзідіглердең пір процентке тӧбін. Сын парыстар Россиядағы ортымах саннардаң ідӧк пӧзік арах. Піс ӧӧн ас-тамахха, ӧӧнінде итке паза палыхха, Сибирьдегі регионда иң ниик пааларны хайраллап алғабыс. Посты азырирға сыданчатханыбысха піс поғдархапчабыс.
Халғанҷы чыллар аразына республикада федеральнай кін паза Россия президенті Владимир Путин хабасханынаң улуғ кирексіністіг социальнай объекттер пӱдірілген. Ол 150 орынға перинатальнай кін, республиканың имнег туразының наа хирургия корпузы, музей-культура кіні паза Тӧӧ пазындағы саналығ чылҷаң спорт комплексі, хайда пӱӱн Россияның саналығ чылҷаңнарның піріктірілген командазы тимненіс иртче.
- Пір чарым чыл аразына піс туризмҷе 33 процентке ӧзіп алғабыс. Мындағ хайхастығ пурунғы тас обаалар тилекейде паза чоғыл. Пістің аалҷылар - пасха хан чирінең килгеннер дее, Россия чуртағҷылары даа - пістің чирде мындағ ниме парына хайхапчалар, - таныхтаан Виктор Зимин.
Хакасияның пазы ідӧк 2016 чылда ӧкіс палаларға чурт ікі хати кӧп пӱдірілгенінеңер, кӧп палалығ сӧбірелерге социальнай хабазығ пиреріне ахча позыдары ӧскіріл парғанынаңар, палаларны тынандырарына паза хазыхтандырарына ахча хозыл парғаннаңар чоохтаан.
2015 чылдағы ӧрттернің салтарларын чох идерінеңер чоох парғанох. Хакасияның пазы прай туралар пӱдіріл парғанын таныхтаан. Ӧртке кіргеннерні, иң пастап улуғ частығларны, хайығда тударынҷа тоғысчы ӧмелер тӧстелгенінеңер искірген.
Тоғазығда Хакасияның пазы ідӧк хазна устағҷызын Хакасияның промышленность кӱзін 2030 чылға теере тилітчең концепциянаң таныстырған. Республиканы промышленность саринаң тилітчең стратегическай план кӧп производство кӧстеглерін піріктірче. Кӧзідімге, хара тас промышленнозының тилізін, алюминий сығарызын, гидроэнергетиканы паза хара металлургиязын. Анзы, тізең, наа тоғыс орыннары тӧстелгені, республика бюджедінің парызы хозылғаны паза экономика ӧскені, ідӧк экология саринҷа хайзы сурығлар пӧгілгені.
- Пістің республика индустриялығ (алюминщиктер, энергетиктер, хара тас аныпчатханнар) полчатханын санға алза, регионның промышленнозын тилітчең концепция хоостыра частнай инвестициялар ла сині 37 миллиард салковайға чит парар, - искірген Виктор Зимин. - Пістің республика - хазнада иң чиит улустығ регион: тоғынчатханнарның 53 проценті - чииттер. Пу проект хоостыра ікі чыл аразына читі муң артиинаң тоғыс орнын тӧстирге пӧгінчебіс.
Прай проекттер удур-тӧдір пик палғалыс парғаннар, ол санда транспорт-логистика инфраструктуразын тӧстирге киректелчеткенінең. Оларның кӧбізі амох чуртасха кирілче, анзы таарлағлар синін чыл сай нинҷе-де миллион тоннаа ӧскіреріне ағылар. Чоохтазығда ідӧк тимір чолларҷа таарлағлар тартар оңдайны алғыдарынаңар чоох парған. Хазна устағҷызы Хакасия пазының энергетиканаң паза тимір чол инфраструктуразын тилідерінең палғалыстығ улуғ проекттерҷе Россия правительствозынаң пірге тоғынарға киректелчеткенінеңер чӧбіне хабасхан.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде