Ӱс абаам амыр чуртас ӱчӱн чааласхан
Пістің колхозтаң Ада чир-суубысты азымахчы фашисттердең арачылирға 129 кізі партыр. Ол хан тӧгістіг чаадаң тӧреен-ӧскен чирінзер 87 кізі айланмаан. Ол санда Коковтар родынаң 30 кізі чуртазын пир салған, Трошкиннердең - 7 кізі, Тахтараковтардаң - 6 кізі, Попияковтардаң - 5 кізі, Аёшиннердең - 4 кізі. Пасха даа родтарның махачы ооллары чаада чат халғаннар.
Минің ағам Василий Петрович (Садай) Тодышевтер родынаң Таяны алып чуртаан. Ағам ууҷамнаң Иңнес, Илексей, Иким паза пис хыс ӧскіргеннер. Мин чооғымны ағамның оолларынаңар апарарға чараттым. Игнатий (Иңнес) Васильевич 1930 - 1939 чылларда колхозтың санҷызы полған. Анаң 1939 чылда аны потребительлер пірігізінің кнезіне тапханнар. Анда ол чаа пасталғанҷа тоғынып, Чир-суун арачылирға парған.
Ол тоғысха кӱс, тілге пыспас, сын кирек ӱчӱн турысчатхан, пазымнығ кізі полған. Позынаң кічіглерні, ӱгредіп, тоғысха кӧніктіряең, оңарылыстығ нимес нимелерні чарыда чоохтап пирҷең. Иңнес абаам 1933 чылда Тоғызаас аалда чурттығ Коковтар родынаң Акулина Лукьяновнаны алған. Пу ікӧлең ӱс палаа читіре чуртирға маңнанғаннар. Тӧріткен палалары - Нюра, Галя паза Юра. Амды олар даа тынағдалар, че Нюра ӱреен.
Мин Иңнес абаамның халғанҷы пічиин, Гурьевскай заводта тоғынчатханымда, алғам. Пічиинде ол Гитлер, чыынған тӱгенҷі кӱзін чыып, Курск тӱгеезінде чаалазарға тимнен тур тіп пасхан. Анда уғаа хазыр чаа полған. Абаам 1943 чылда августта сағбазы чох чіт парған.
Ефим (Иким) Васильевич 1915 чылда тӧреен. Колхозта хара тоғыстар толдырҷаң, чайғыда ат машиназынаң от сапчаң, кӱскӱ читсе, поом палғаҷаң. Ас сабыл турза, тамахты хазнаа пирерге Ширадағы заготзернозар тартчаң. Пір-ікі ат кӧлілген фургонзар 1 тонна 200 кг тамах кірҷең. Кӱскӱде, хазнаа ас пирілчеткен туста, уйғу-чадығ чох тоғынарға килісчең. Иким хада ӧскен арғыстарынаң тайғазар, Ах Ӱӱс пазынзар, ағас пилетирге чӧрҷең. Анда олар ідӧк тіспен тоғынҷаңнар. Чоохчылдағылар чахығларны аймахта тӧреміл норма азыра толдырҷаңнар, пастағы орынға сығып, Хызыл Знамяны холға кирҷеңнер.
Иким абаам уғаа кӱстіг, сынға пӧзік, толдыра кӧгістіг, чалбах чарыннығ, тоғысха пирінген кізі полған. Стахановец-ударник атты позытпин ал чӧрҷең. Ол ікі пуд (32кг) пасчатхан гирянаң ойнаҷахнаң на чіли ойнап турҷаң, онар хати чоғар кӧдіріп, ырах пӧзік тастабысчаң. Ол хоных хонарға, сӧбіре тӧстирге маңнанмаан, аның адын адап чӧрер палазы чоғыл. Чаада 124-ҷі алынҷа ротаның атығҷызы полған. 1941 чылда 24 июльда Смоленск облазындағы Ярцевскай аймахтағы Борисово аалда чат халған.
Алексей (Илексей) Васильевич Чоохчыл аалда 1910 чылда 30 мартта тӧреен. Чаа пасталғанда, ол 1941 чылдох армияа хабылған. Оларны чааға ызар алнында, Канск городта чаалазарға, тимнеп, ӱгреткеннер. Аның соонаң Калининградскай фронтсар ысханнар. Анда хан тӧгістіг чааны, ӧлімні ағаа позының хараанаң кӧрерге киліскен. Ол 1942 чылда июньда азаанаң аар палығладыбысхан. Анаң Кострома, Ярославль паза Киров городтардағы госпитальларда, имненіп, азаан ікі хати кистірген. 1943 чылда Алексей Васильевич тӧреен-ӧскен чирінзер пір азаа чох айланған.
Чаа тузында аалларда тоғынар кізі чидіспин турчат колхозта ӧӧнінде ипчілер, олғаннар ла тоғынҷаңнар. Чаадаң кинек айланып, Алексей Васильевич, чазы бригадазынаң устап, бригадир полған, чииттерні, олғаннарны ӱгретчең.
Илексей абаам ӱс оол, ӧскіріп, чон аразына кир салған. Ооллары - Иван, Владимир паза Василий. Олар прайзы пала-сӧлліг чуртапчалар. Хызы Галина, кізее парып, ідӧк олған-узахтығ чуртапча. Алексей Васильевич 2004 чылда, 94 чазын апарчадып, ах чарыхтаң парыбысхан. Пістің улуғларыбыс тобырған чобағларны пала - пархаларыбыс кӧрбезіннер. Амыр ла чуртас ползын.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |