ЧИВЕЙ
21.06.2017
Статья
Нымах
Пір аалда ирепчі чуртаан полтыр. Оларның чалғыс хыстары пар полған. Хаҷан хыс пала тӧреенде, пабазы ыңааҷағын минің чахайағым Чивей ползын тіп адаптыр.
Улуғ ӧс парғанда, хызыҷах арығзар чистек теерерге партыр. Чистек толдыра тееріп алғанда, ибзер килтір. Іҷезі, хызыҷаан махтап, чистек чіп алған, че кинетін тың ағырыбысхан. Чивей хамзар парған. Че хам чоохтапча:
- Мин сірерге полыс полбаспын. Парыңар Кӱзет чул тағзар, анда ікі обаа турча. Ол обаалар чоохтап пирерлер хайдағ им чарир сірернің іҷеңерге.
Пабазынаң хызыҷағы Кӱзет чул тағзар парғаннар. Андар читкенде, улуғ чил пол сыххан. Чивей хызыҷах чилдең сурынған:
- Полыс пир мағаа ікі обааны табарға.
Чил чоохтапча:
- Пу тағ кистінзер парзаңар, саар азах чол полар, ол чол сірерні обааларзар ағылар.
Обааларзар читкенде, тастар кистінең кӧлеткі сых килген. Олар ағаа іҷебіс ағырча тіп чоохтап пиргеннер, анаң полыс пирерге сурынғаннар. Кӧлеткі чоохтапча:
- Мӧгі суғ кирек паза чивей чахайахтың пӱріҷегінің сӱзӱні кирек. Че ол чахайах тирең ойымда ӧсче, хайда кӧп чылан чуртапча.
Чивейнің пабазы хызына чоохтапча:
- Андар парған кізі тіріг айланминча.
Че хызыҷах нандырча:
- Мин парарбын.
Чивей азых-тӱлӱк алып алған. Пабазынаң анымҷохтазып, кӱн сығызынзар пар сыххан. Ӱр бе, ас па парғанда, ағас аразында кізее тоғас парған. Хызыҷах сурча:
- Хайди синің адың.
- Аҷис.
- Мин Чивей полчабын. Іҷем тың ағырча, мин им тілеп парчам.
- Син мағаа ирге парар ползаң, - чоохтапча Аҷис, - мин сағаа полызарбын. Чивей ынабысхан. Ол кізі Чивейні адына одыртып алған, анаң олар ӱр парғаннар. Хайдағ-да тирең ойымда хайдар-хайдар улуғ тура турған. Аҷис чоохтапча:
- Пу минің турам, анда минің кізілерім. Син олардаң хорыхпа, олар сағаа теңместер.
Туразар кіргенде, кічиҷек хуртыҷахтар толдыра полғаннар. Олар табырах чиистер салыбысханнар. Чивейні тосханҷа азырабысханнар. Аҷис ағаа имнер пирген. Чивейні тағ азыра ӱдес салған. Чивей тӱрче поларынаң ибзер читкен. Имні іҷезіне пирген. Іҷезі чазыл парған. Чивей іҷезіне паза пабазына чоохтапча:
- Мин им пирген кізіні алғыстирға парчам. Хайди парарға чол пілчем. Минің ӱчӱн сағыссырабаңар. Анымҷохтар.
Іди Чивей хыс чылан ханы Аҷиске ирге парыбысхан.
Арина МАМЫШЕВА, 6-ҷы класс.
Истегі ортымах школа
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы