АҒБАНДА НАА ОЛҒАН САДЫ ПАЛАҶАХТАРНЫ УДУРЛАДЫ
23.06.2017
Хабарлар
ПУ НЕДЕЛЯДА АҒБАНДА 43-ҷі МУНИЦИПАЛЬНАЙ ОЛҒАН САДЫ АЗЫЛ ПАРДЫ. УЛИИ ӰС МУҢА ЧАҒЫН КВАДРАТ МЕТРЛІГ УЧРЕЖДЕНИЕ «НАСТЕНЬКА» АДАЛЧА. ОЛ ГОРОДТЫҢ АСКИЗСКАЙ ОРАМАЗЫНДА ОРНЫХЧА. ОЛҒАН САДЫ ПАЙРАМНЫҒ АЗЫЛҒАН. АНДА ХАКАСИЯ ПАЗЫ ВИКТОР ЗИМИН, ХАКАСИЯНЫҢ ӰГРЕДІГ ПАЗА НАУКА МИНИСТРІНІҢ ТОҒЫЗЫН ТОЛДЫРЧАТХАН ГАЛИНА САЛАТА, АҒБАН ПАЗЫ НИКОЛАЙ БУЛАКИН АРАЛАСХАННАР.
ПУ ОРЫНДА ХАҶАН-ДА ИРГІ ОЛҒАН ТУРАЗЫ ОРНЫХХАН. ИРТКЕН ЧЫЛДА ХАКАСИЯНЫҢ ПРАВИТЕЛЬСТВОЗЫ АНЫ ГОРОДХА ПИРЕРДЕҢЕР ЧАРАДЫҒ АЛҒАН. ИРГІ ТУРАНЫ НААҶЫЛИРЫНА ГОРОД БЮДЖЕДІНЕҢ 70 МИЛЛИОН АЗЫРА САЛКОВАЙ ПОЗЫДЫЛҒАН. «СТРОЙИНВЕСТ» ПӰДІРІГ КОМПАНИЯЗЫ ТУРАНЫҢ ФУНДАМЕНТІНЕҢ ПАСТИ ХЫРЫНА ТЕЕРЕ ПРАЙ АЛЫСТЫРҒАН. ПІР ЧЫЛ АРАЗЫНА НААҶЫЛАЛҒАН ПАЗА СІЛІГЛЕЛ ПАРҒАН ІКІ ХАДЫЛЛЫҒ ОЛҒАН САДЫ ПАЛАЛАРҒА ІЗИИН ХАТАП АСЧА.
«АҒБАНЗАР ИЛЕЕДЕ ЧОН КӦСЧЕ, МЫНДА ОЛАР, ЧУРТ АЛЫП, ІСТЕНЧЕЛЕР. АҒАА ХОЗА, ХАЛҒАНҶЫ ЧЫЛЛАРДА ГОРОДТА ЧИИТ ЧААҶЫЛАР САНЫ ӦСЧЕ. АННАҢАР, ІҶЕ-ПАБАЛАР САҒЫССЫРАБИН ТОҒЫНЗЫННАР ТІП, ОЛАРНЫҢ ПАЛАЛАРЫНА ОЛҒАН САДТАРЫН ПАЗА ШКОЛАЛАР ПӰДІРЕРГЕ КӰСТЕНЕРБІС.
Чоохтирға кирек, Хакасияда 3-7 частығ палаларға олған садтарында теес чох полза, амды пістің пӧгінібіс ясля группаларын азар тоғыс апарарға», - таныхтаан Виктор Михайлович.
«Настеньказар» 335 пала чӧр полар, анда тиксі 13 группа кӧріл парған. Оларның ікізі хакас группазы полар: «Харачхай» паза «Чулыҷах». Андар 3-4 частығ палалар чӧрерлер.
Хайди чоохтапча пу учреждениенің директоры Татьяна Елисеева, иң пастап олған садындағы хакас группазар палалар алыл парғаннар.
- Олған садында хакас группа азыларынаңар піл салғанда, іҷе-пабалар палаларын сах андох пеер пирерге маңзырааннар. Оларның аразында хакастар, орыстар, чуваштар, немецтер паза пасха даа нация палалары, - теен Татьяна Владимировна.
Хакас группаларында улуғ опыттығ паза Хакас хазна университедін ӱр ниместе тоосхан воспитательлер «Иркеҷек» программа хоостыра тоғынарлар.
- Ағбанда чылда школа алнындағы 1-2 учреждение азылча. Мыннаң мындар полған на олған садында хакас группаларын азарбыс. Палалар пос тілін иң кічіг частығдаң ӱгреніп пастазалар, школаа парзалар, оларға хакас тілін ӱгренерге ниик полар. Аннаң андар пілістерін алғыдып ла одырарлар, - таныхтаан Николай Булакин.
Хакас группазынаң пасха, наа олған садында ідӧк хазыхтары уйан палалар группалары азылған. Андар чӧрчеткен палаларнаң логопедтер, дефектологтар, психологтар алғым тоғынарлар.
Чиит специалист Арина Егоровна Ултургашева пу олған садында воспитатель полып тоғынча. Ол иң кічіг, 2-3 частығ, палаларнаң тоғынар. Ол, ХГУ-ның педагогика ӱгредии, информатика паза право колледжін тоозып, амды университеттің тӧреміл педагогика ӱгредии институдында заочно ӱгренче. Аның группазынзар 2 частығ Варя Ултургашева чӧрер. Мының алнында іҷе-пабазы хызыҷахты пасха олған садынзар ал чӧргеннер. Ол ибдең ырах полған, амды, тізең, наа олған сады ырах нимес.
Хайди чооғында таныхтаан Виктор Зимин, олған садтарын паза школалар пӱдірер паза нааҷылир тоғыс Ағбанда аннаң андар узарадылар. Пу чағынғы чылларда городтың ікі микрорайонында ідӧк ӱгредіг учреждениелері пӱдірілер.
Автор :
Оксана СУНЧУГАШЕВА
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
