ХАКАС ГИМНАЗИЯНЫҢ ӰГРЕНҶӀЛЕРІ - ХАКАСИЯНЫҢ «АЛТЫН ІЗЕНІЗІ»
28.06.2017
Статья
ХАС-ХАҶАННАҢ Н.Ф.КАТАНОВТЫҢ АДЫНАҢ НАЦИОНАЛЬНАЙ ГИМНАЗИЯ ПӦЗІК ПІЛІСТІГ, ӦТКІН, ХЫЙҒА ӰГРЕНҶІЛЕРНІ, ТИМНЕП, СЫҒАРЧА. ЧЫЛДАҢ АНДА АЛТЫН МЕДАЛЬҒА ТУРЫСХАН ПАЗА ПІРГЕ ХАЗНА СЫНЫХТААН ПӦЗІК БАЛЛҒА ТУДЫБЫСХАН ОЛҒАННАР ИЛЕЕДЕ ПОЛЧА.
Екатерина Евдюнинаны, Евгения Тютюбееваны, Сайера Шералиеваны паза Валерия Идимешеваны сынап таа Хакасияның «алтын ізенізі» адирға чарир. Чиит хыстар пӱӱл школа тоосчалар. Олар Н.Ф.Катановтың адынаң национальнай гимназияда ӱгренгеннер. Ӱгредігде чалтырама чидіглер кӧзіткен, гимназияның халых чуртазында ӧткін араласхан чииттерге пу неделяда Хакасия пазы Виктор Зимин «Хакасияның алтын ізенізі» паза «Ӱгредігде пӧзік чидіглерге читкені ӱчӱн» медальлар читірген.
Пӱӱл 8 ӱгренҷі «Ӱгредігде пӧзік чидіглерге читкені ӱчӱн» медальға турысхан, оларның тӧрті ідӧк «Хакасияның алтын ізенізі» медальнаң таныхтатхан. Чииттерзер Хакасия пазы Виктор Зимин айланған:
- Сибирьнің регионнарынаң тиңнестірзе, пістің республикада иң кӧп чииттер чуртапча. Оларға мында тоғыс полар ӱчӱн, Хакасияның правительствозы кӧп кӱс салча. Тиктең нимес піс нинҷе-де чыл мының алнында чиит сӧбірелерге паза специалисттерге чир участоктарын тикке пир сыххабыс. Анзы оол-хыстарға чахсы хабазығ . 2017 чылны, тізең, піс Хакасияда «Чииттер чылы» тіп таныхтапчабыс. Ол ідӧк чииттерге хайығ айландырылчатханын киречілепче. Чыл тоозыл парза даа, піс чииттерге хайығ саларын тохтатпаспыс. Пістің оол-хыстарыбыс профессиональнай ӱгредіг алып алған соонаң хайди даа ибзер , Хакасиязар, айланарға киректер. Мында сірерге тоғыс полар . Хакасияа таланттығ, чайаачы чииттернің кӱзі кирек, - таныхтаан Виктор Михайлович.
Национальнай гимназияның ӱгренҷізі Евгения Тютюбеева орыс тілінең тиксі Россия синіндегі олимпиаданың региондағы чардығының призёры полча. Ідӧк ӱгренҷі орыс тілінең пірге хазна сыныхтаан 96 баллға тудыбысхан, математикаҷа, тізең, 86 баллға. Евгенияны кічігдең ала ууҷазы Зоя Захаровна Тютюбеева ӧскірче. 5-ҷі классха Зоя Захаровна пархаҷаан национальнай гимназиязар ӱгренерге пирібіскен.
- Пархаҷаам кічігдең ала кӱстенҷік ӧсче . Гимназиязар иртен парыбысчаң, орай иирде ле айланҷаң. Литература кӧп хығырча, наа пілістерге тартылча. Экзаменнерге тимненчеткен туста ибдегі тоғыснаң харығ полбаҷаңмын, че Евгения ӱгренерге дее, мағаа даа иб аразында полызарға маңнанча, - чоохтапча Зоя Захаровна.
Позының на кӱзіне ізенерге кӧнік парған хыс Новосибирсктегі алай ба Томсктағы университеттерзер ӱгренерге кірерге пӧгін тутча. Аның кӧңніне техническай специальностьтар кірче.
- Школа тоосчатханымда ӧріністіг, че олох туста хомзыныстығ. Мин ыраххызар ӱгренерге парыбыссам, ууҷам ибде чалғызан халар. Піс аннаң ікӧлең не чуртапчабыс. Че мин пілчем, ӱгреніп алзам , хайди даа ибзер , Хакасиязар, чуртирға , тоғынарға айланарбын, - кӧңнінең ӱлесче алтын медальға турысхан хыс.
Пайрамнығ кӱнде чииттерге кӧп чылығ сӧстернең айланғаннар. Ӱгренҷілерге иң чағын сӧстер гимназия директоры Руслан Чугунековти полған полар. Ол пӱӱл 88 ӱгренҷіні улуғ чуртасха сығарча.
- Ӱгренҷілерге пӧзік синніг піліс пирердең пасха піс ідӧк оларны таңдағы улуғ чуртасха тимнепчебіс. Олар, аймах регионнарҷа тарасхлап, чон аразында иптіг, Хакасия адын пӧзік синде тударына пір дее ікінҷілебинчем, - теен ол.
Таныхтирға кирек, республикада «Хакасияның алтын ізенізі» медаль 2014 чылда пиріл сыххан. Пу тусха аны 230 ӱгренҷі алған. Пӱӱл, тізең, мындағ медальға Хакасияның 85 иң артых ӱгренҷізі турысхан.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы